មេធាវីការពារជនសង្ស័យ ៥រូប លើសំណុំរឿង ០០៣ និង ០០៤ ត្រូវបានតែងតាំង
នៅថ្ងៃនេះ អង្គភាពគាំពារការការពារក្តី របស់តុលាការខ្មែរក្រហម បានប្រកាសពីការតែងតាំងលោកមេធាវី គង់ សំអុន ដើម្បីការពារផលប្រយោជន៍ជនសង្ស័យ មិនស្គាល់អត្តសញ្ញាណ ៥ រូប នៅក្នុងសំណុំរឿង ០០៣ និង ០០៤។ ក៏ប៉ុន្តែលោក រាជ សម្បត្តិ ប្រធានផ្នែកកិច្ចការសាធារណៈរបស់តុលាការខ្មែរក្រហម បានបញ្ជាក់ថា ការតែងតាំងមេធាវីការពារអតីតមេដឹកនាំខ្មែរក្រហម ៥ រូបបន្ថែមទៀតនេះ ជាការដើរលឿនហួសស្ថានភាពជាក់ស្តែង។ នោះគឺសំណុំរឿង ០០៣ និង ០០៤ មិនមានដំណើរការអ្វីទេ រហូតមកដល់ពេលនេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ
ដោយប្រកាន់ខ្ជាប់តាមបទដ្ឋានអន្តរជាតិ អង្គភាពគាំពារការការពារក្តីរបស់តុលាការខ្មែរក្រហម បានប្រកាសតែងតាំងមេធាវីជាតិមួយរូប គឺលោកមេធាវី គង់ សំអុន ដើម្បីការពារផលប្រយោជន៍របស់ជនសង្ស័យ ជាមេដឹកនាំខ្មែរក្រហម នៅក្នុងសំណុំរឿង ០០៣ និង ០០៤។
តាមសេចក្តីប្រកាសព័ត៌មានរបស់អង្គភាពគាំពារការការពារក្តី នៅថ្ងៃ៣០វិច្ឆិកានេះ ជនសង្ស័យជាអតីតមេដឹកនាំខ្មែរក្រហម ៥ រូប ដែលបច្ចុប្បន្ន ស្ថិតនៅក្រោមការស៊ើបអង្កេត ដោយការិយាល័យសហចៅក្រមស៊ើបអង្កេត ក្នុងសំណុំរឿង ០០៣ និង ០០៤ មិនត្រូវគេបញ្ជាក់អត្តសញ្ញាណទេ។
ក៏ប៉ុន្តែសេចក្តីប្រកាស បានកត់សម្គាល់ថា ជនសង្ស័យមិនស្គាល់អត្តសញ្ញាណទាំង៥រូប ក្នុងសំណុំរឿង ០០៣ និង ០០៤ ប្រឈមនឹងការប៉ះពាល់យ៉ាងច្រើន ពីការស៊ើបអង្កេតដោយគ្មានពេលកំណត់របស់ការិយាល័យសហចៅក្រមស៊ើបអង្កេត របស់តុលាការខ្មែរក្រហម។ ការិយាល័យសហចៅក្រមស៊ើបអង្កេត បានប្រមូលភស្តុតាងដាក់បន្ទុកសក្តានុពល ដោយមានការចូលរួមពីសហព្រះរាជអាជ្ញា ប៉ុន្តែគ្មានការត្រួតពិនិត្យពីមេធាវីការពារក្តីឡើយ។
សេចក្តីប្រកាសដដែល បានបន្ថែមថា ការតែងតាំងមេធាវី ដើម្បីការពារផលប្រយោជន៍ទូទៅរបស់ជនសង្ស័យមិនស្គាល់អត្តសញ្ញាណនៅចំពោះមុខតុលាការ ប្រព័ន្ធផ្សព្វផ្សាយ និងសាធារណជន។ ដោយធ្លាប់ការពាររឿងក្តីសំខាន់ៗ ព្រមទាំងធ្លាប់ជាមេធាវីការពារលោកស្រី មូរ សុខហួរ ផងនោះ លោកមេធាវី គង់ សំអុន នឹងឆ្លើយតបចំពោះសំណើសុំផ្តល់យោបល់ពីអ្នក ដែលគិតថា ខ្លួនអាចប៉ះពាល់ដោយការស៊ើបអង្កេតក្នុងសំណុំរឿង ០០៣ និង ០០៤ ដែលកំពុងតែបន្តលើអតីតមេដឹកនាំខ្មែរក្រហម។
យ៉ាងណាក៏ដោយ នៅថ្ងៃនេះ លោក រាជ សម្បត្តិ ប្រធានផ្នែកកិច្ចការសាធារណៈរបស់តុលាការខ្មែរក្រហម បានគូសបញ្ជាក់ថា មកដល់ពេលនេះ សំណុំរឿង ០០៣ និង ០០៤ មិនមានដំណើរការអ្វីទេ ដោយសារតែសហចៅក្រមស៊ើបអង្កេតជាតិ លោក យូ ប៊ុនឡេង មិនទាន់ចាត់វិធានការអ្វីឡើយ។
តាមលោក រាជ សម្បត្តិ អង្គភាពគាំពារការការពារក្តី មានស្វ័យភាពរបស់ខ្លួន លើការតែងតាំងមេធាវីការពារជនសង្ស័យក្នុងសំណុំរឿង ០០៣ និង ០០៤ ដែលជារឿងដើរលឿនហួសពីតថភាពជាក់ស្តែង។ ពោលគឺនៅតុលាការខ្មែរក្រហម មកដល់ពេលនេះ មានតែសំណុំរឿង ០០១ និង០០២ ដែលមានតែមេខ្មែរក្រហម ៥ រូប ប៉ុណ្ណោះ កំពុងទទួលការជំនុំជម្រះក្តី។
កាលពីឆ្នាំមុន លោកសហចៅក្រមស៊ើបអង្កេតបារាំង Marce Lemond និងលោកសហចៅក្រម យូ ប៊ុនឡេង បានខ្វែង គំនិតគ្នា ចំពោះការចោទប្រកាន់បន្ថែមលើមេដឹកនាំខ្មែរក្រហម ក្នុងសំណុំរឿង ០០៣ និង ០០៤។ ចៅក្រមបារាំង បានសម្រេចចិត្ត ដំណើរការស៊ើបអង្កេតលើសំណុំរឿងថ្មីទាំងពីរនោះតែម្នាក់ឯង។
យ៉ាងណាក៏ដោយ លោកនាយករដ្ឋមន្ត្រី ហ៊ុន សែន បានព្រមានទៅកាន់លោក បាន គីមូន អគ្គលេខាធិការអង្គការសហប្រជាជាតិ កាលពីខែមុនថា តុលាការខ្មែរក្រហម នឹងត្រូវបិទទ្វារ ប្រសិនបើបើកឲ្យមានដំណើរការលើសំណុំរឿង ០០៣ និង ០០៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ