មូលនិធិរូបិយវត្ថុអន្តរជាតិអំពាវនាវអោយភូមាយកចិត្តទុកដាក់លើបញ្ហាភាពក្រីក្រក្នុងប្រទេស
នៅថ្ងៃសៅរ៍ម្សិលមិញនេះ មូលនិធិរូបិយវត្ថុអន្តរជាតិបានអំពាវនាវអោយរដ្ឋាភិបាលភូមា យកចិត្តទុកដាក់លើភាពក្រីក្រនៅភូមា។ ថ្វីបើសេដ្ឋកិច្ចភូមាកំពុងតែមានសំទុះទៅមុខក្តី យោងតាមទិន្នន័យឆ្នាំ២០១០ ប្រជាជនភូមា២៦ភាគរយ កំពុងរស់ក្នុងជីវភាពក្រីក្រ។ ប្រជាជន៣ភាគ៤ គ្មានអគ្គិសនីប្រើប្រាស់ មានស្ត្រីពេញវ័យត្រឹមតែ១៨ភាគរយប៉ុណ្ណោះ ដែលបានរៀនចប់មធ្យមសិក្សា រឺក៏បន្តការសិក្សាខ្ពស់ជាងនេះ។
ចុះផ្សាយនៅថ្ងៃ៖
នៅថ្ងៃសៅរ៍ម្សិលមិញនេះ លោកស្រី គ្រីស្ទីន ឡាហ្ការដឹ Christine Lagarde ប្រធានមូលនិធិរូបិយវត្ថុអន្តរជាតិបានអំពាវនាវអោយភូមា យកចិត្តទុកដាក់លើបញ្ហាភាពក្រីក្រក្នុងស្រុក។
លោកស្រី ឡាហ្ការដឹ ដែលបានបញ្ចប់ទស្សនកិច្ចនៅភូមា ម្សិលមិញ បានលើកឡើងថា នៅពេលដែលភូមាកំពុងតែបើកទ្វារចំហរ និងអភិវឌ្ឍទៅមុខ ភូមាត្រូវការគ្រឹះសេដ្ឋកិច្ចដ៏ទំនើប ដែលជាអាទិភាពបន្ទាន់មួយ។ ប្រធានមូលនិធិរូបិយវត្ថុអន្តរជាតិបានរំលឹករដ្ឋាភិបាលភូមាថា ប្រជាជនភូមា២៦ភាគរយ កំពុងរស់ក្នុងភាពក្រីក្រ។ ភូមានៅខ្វះផ្លូវថ្នល់ ខ្វះអគ្គិសនី អ៊ីនថឺនេត និងទូរសព្ទប្រើប្រាស់។
ភូមាជាប្រទេសមួយក្នុងចំណោមប្រទេសក្រីក្របំផុតក្នុងពិភពលោក។ ក្រោមអំណាចនៃរបបសឹកចាស់ អស់រយៈពេលច្រើនទស្សវត្សរកន្លងមក អំពើពុករលួយ និងការគ្រប់គ្រងសេដ្ឋកិច្ចមិនល្អ បានធ្វើអោយភូមារងគ្រោះធ្ងន់ធ្ងរ។ បន្ទាប់ពីរបបសឹកត្រូវបានរំលាយចោល នៅឆ្នាំ២០១១ រដ្ឋាភិបាលភូមាថ្មីបានខិតខំធ្វើកំណែទម្រង់សេដ្ឋកិច្ចយ៉ាងខ្លាំងក្លា ប៉ុន្តែ ឧបសគ្គនៅតែមានច្រើននៅឡើយ។
មូលនិធិរូបិយវត្ថុអន្តរជាតិបានផ្តល់យោបល់អោយរដ្ឋាភិបាលភូមា ដើរតាមមាគ៌ានៃកំណើនបែបស្ថិតស្ថេរមួយ សំរេចអោយបាននូវការអភិវឌ្ឍន៍ទិន្នផលកសិកម្ម ដើម្បីកាត់បន្ថយភាពក្រីក្រ។ ប្រធានមូលនិធិរូបិយវត្ថុអន្តរជាតិ លោកស្រី គ្រីស្ទីន ឡាហ្ការដឹ Christine Lagarde បានរិះគន់ចំណាយផ្នែកសុខភាពនិងអប់រំ របស់ភូមា ព្រោះថាសំរាប់ផ្នែកនេះ រដ្ឋាភិបាលភូមាចំណាយត្រឹមតែ១,៥ រឺក៏១,៧ភាគរយប៉ុណ្ណោះ នៃផលិតផលក្នុងស្រុកសរុប។ អត្រានេះជាអត្រាមួយទាបបំផុត នៅក្នុងចំណោមបណ្តាប្រទេសអាស៊ាន។ ជាក់ស្តែង ស្ត្រីពេញវ័យភូមាត្រឹមតែ១៨ភាគរយប៉ុណ្ណោះ ដែលទទួលបានបញ្ចប់ថ្នាក់មធ្យមសិក្សា រឺក៏បន្តការសិក្សាខ្ពស់ជាងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ