ប៉ូលិសបារាំងកំពុងតាមប្រមាញ់ជនសង្ស័យពីរនាក់បងប្អូន
រហូតមកដល់ម៉ោងនេះ ជនដៃដល់ដែលបានបើកការវាយប្រហារទៅលើទស្សនាវដ្តី Charlie Hebdoនៅមិនទាន់ត្រូវបានវែកមុខនៅឡើយទេ។ ប៉ុន្តែ ប៉ូសិសបានកំណត់អត្តសញ្ញាណជនសង្ស័យពីរនាក់ដែលជាបងប្អូនបង្កើតនឹងគ្នាហើយកំពុងតាមប្រមាញ់យ៉ាងញាប់ដៃញាប់ជើង ខណៈដែលជនសង្ស័យម្នាក់ទៀតដែលមានវ័យ ១៨ឆ្នាំដែលបានប្រគល់ខ្លួនឲ្យប៉ូលិសកំពុងត្រូវគេចោទសួរ។
ចុះផ្សាយនៅថ្ងៃ៖
ស្តាប់ - ០២:១០
បន្ទាប់ពីការវាយប្រហារភេរវកម្មយ៉ាងសាហាវទៅលើទីស្នាក់ការទស្សនាវដ្តី Charlie Hebdo ប៉ូលិសបារាំងកំពុងតាមប្រមាញ់យ៉ាងសកម្មជនសង្ស័យពីរនាក់បងប្អូនក្នុងនោះជនសង្ស័យម្នាក់ត្រូវគេស្គាល់ថាជាក្រុមឥស្លាមជ្រុលនិយមជីហាត។ ប៉ូលិសបានផ្សព្វផ្សាយរូបថតជនសង្ស័យទាំងពីរគឺម្នាក់ឈ្មោះ សេរីហ្វ គួស៊ី (Chérif Kouachi) អាយុ ៣២ ឆ្នាំ និងម្នាក់ទៀតឈ្មោះ សេដ គួស៊ី (Said Kouachi) អាយុ ៣៤ ឆ្នាំ។ សេរីហ្វ ធ្លាប់ត្រូវបានតុលាការបារាំងកាត់ទោសម្តងហើយកាលពីឆ្នាំ ២០០៨ ពីបទថាបានចូលរួមជាមួយបណ្តាញមួយដែលបានបញ្ជូនក្រុមសកម្មប្រយុទ្ធទៅកាន់ប្រទេសអ៊ីរ៉ាក់។
ជនសង្ស័យពីរនាក់បងប្អូននេះកើតនៅទីក្រុងប៉ារីសនិងត្រូវបានប៉ូលិសប្រកាសថា ជាមនុស្សដ៏គ្រោះថ្នាក់។ អាជ្ញាធរប៉ូលិសក្រុងប៉ារីសបានប្រកាសលេខទូរស័ព្ទដើម្បីឲ្យបណ្តាជនដែលបានឃើញអ្នកទាំងពីររាយការណ៍ទៅកាន់ប៉ូលិស។ ប្អូនថ្លៃរបស់ជនសង្ស័យម្នាក់ឈ្មោះ មួរ៉ាដ ហាមីដ (Mourad Hamyd) អាយុ ១៨ ឆ្នាំ ដែលគេសង្ស័យថាបានជួយជនសង្ស័យទាំងពីរក្នុងអំពើភេរវកម្មនេះបានប្រគល់ខ្លួនឲ្យប៉ូលិសកាលពីកាលពីល្ងាចថ្ងៃពុធបន្ទាប់ពីបានឃើញឈ្មោះរបស់ខ្លួនត្រូវគេបង្ហោះតាមបណ្តាញសង្គម។ បច្ចុប្បន្ន យុវជនវ័យក្មេងរូបនេះត្រូវបានសួរចម្លើយដោយប៉ូលិស។
សូមបញ្ជាក់ថា បន្ទាប់ពីបានចូលទៅបាញ់សម្លាប់អ្នកកាសែតយ៉ាងរង្គាលដល់ក្នុងទីស្នាក់ការហើយនោះ ជនសង្ស័យទាំងពីរនាក់ដែលបិទមុខជិតក៏បានបាញ់សម្លាប់ភ្នាក់ងារប៉ូលិសពីរនាក់ដែលនៅក្បែរទីស្នាក់ការទស្សនាវដ្តីនោះផងដែរមុននឹងរត់ឡើងរថយន្តពណ៌ខ្មៅមួយគ្រឿងដែលចតចាំជាស្រេចនៅពីមុខទីស្នាក់ការទស្សនាវដ្តីនោះ។ ក្រោយពីបើករថយន្តរត់បានបន្តិចមក ជនសង្ស័យក៏បានរត់ចោលរថយន្តហើយក៏បាន គេចខ្លួនបាត់ស្រមោល។ រហូតដល់ពេលនេះ មនុស្ស៧នាក់ហើយដែលជិតស្និទ្ធនឹងជនសង្ស័យត្រូវបានឃាត់ខ្លួនដើម្បីសាកសួរ។
ការរឹតបន្តឹងសន្តិសុខត្រូវបានធ្វើឡើងក្នុងប្រទេសបារាំងជាពិសេសក្នុងទីក្រុងប៉ារីស។ គឺជាការរឹតបន្តឹងសន្តិសុខក្នុងកម្រិតដែលភេរវកម្មកំពុងកើតឡើង។ ប៉ូលិស ប៉េអឹម រួមទាំងទាហានផងត្រូវបានដាក់ពង្រាយ ខណៈដែលច្រកចេញចូលសាលារៀននានាត្រូវបានបិទ។ ប្រទេសបារាំងក៏បានប្រកាសកាន់ទុក្ខរយៈពេលបីថ្ងៃដោយបង្ហូតទង់ជាតិត្រឹមពាក់កណ្តាលដង ខណៈដែលការស៊ើបអង្កេតត្រូវបានបើកធ្វើយ៉ាងសកម្មបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ