អាមេរិករៀបចំទស្សនកិច្ចសម្រាប់លោកហោ ណាំហុងដែលគ្រោងទស្សនកិច្ចព្យុងយ៉ាង
លោកស្រី ហ៊ីលឡារី គ្លីនតុនបានអញ្ជើញលោកឧបនាយករដ្ឋមន្ត្រីហោ ណាំហុងអោយបំពេញទស្សនកិច្ចនៅអាមេរិកនៅថ្ងៃទី១២មិថុនាខាងមុខនេះ។ លិខិតអញ្ជើញទស្សនកិច្ចនេះធ្វើឡើងនៅពេលដែលលោកឧបនាយករដ្ឋមន្ត្រីហោ ណាំហុងក៏មានគម្រោងទស្សនកិច្ចកូរ៉េខាងជើងផងដែរនៅក្នុងខែមិថុនានោះ។
ចុះផ្សាយនៅថ្ងៃ៖
ស្តាប់ - ០១:៤៤
មិនមែនជាការអញ្ជើញតាមបែបពិធីការ ដូចថ្នាក់ដឹកនាំទូទៅដែលអញ្ជើញគ្នាអោយទៅទស្សនកិច្ចប្រទេសខ្លួនតាមពេលវេលាសមស្របណាមួយនោះទេ។
លិខិតអញ្ជើញទស្សនកិច្ចរបស់លោកស្រីហ៊ីលឡារី គ្លីនតុន រដ្ឋមន្ត្រីការបរទេសអាមេរិក ផ្ញើជូនលោកឧបនាយករដ្ឋមន្ត្រីហោ ណាំហុង គឺសុំអញ្ជើញលោកប្រមុខការទូតកម្ពុជាអោយទស្សនកិច្ចសហអាមេរិកនៅថ្ងៃទី១២មិថុនាតែម្តង។
នៅក្នុងលិខិតអញ្ជើញនេះមានបញ្ជាក់គោលបំណងច្បាស់ៗ។ លោកស្រីហ៊ីលឡារី គ្លីនតុន
បានសរសេរប្រាប់លោកហោ ណាំហុងថា៖«ទស្សនកិច្ចរបស់លោកនឹងជាកាលានុវត្តភាពដ៏សំខាន់ដើម្បីយើងអាចស្វែងរកមធ្យោបាយដែលយើងអាចធ្វើការជាមួយគ្នាបាន ដើម្បីពង្រីកទំនាក់ទំនងទ្វេភាគី និង សំដៅអភិវឌ្ឍគោលដៅតំបន់រួមគ្នា ក្នុងឋានៈលោកជាប្រធាន
អាស៊ាន»។
ការអញ្ជើញរបស់សហរដ្ឋអាមេរិកបានកើតឡើងមុនពេលដែលកម្ពុជាត្រូវធ្វើជាម្ចាស់ផ្ទះរៀបចំកិច្ចប្រជុំអន្តរជាតិធំៗចំនួន៣នៅក្នុងខែកក្កដាខាងមុខ។ ហើយគឺនៅក្នុងខែកក្កដានោះហើយ ដែលរដ្ឋមន្ត្រីការបរទេសកម្ពុជាធ្លាប់បានប្រកាសថា នឹងធ្វើយ៉ាងណាអោយមានការជួបគ្នា៦ភាគីឡើងវិញស្តីពីបញ្ហានុយគ្លេអ៊ែរកូរ៉េខាងជើង ដែលអាមេរិកទន្ទឹងចង់បានខ្លាំង។
អ្នកនាំពាក្យក្រសួងការបរទេសកម្ពុជាធ្លាប់បានថ្លែងអោយដឹងថា លោកប្រមុខការទូតកម្ពុជាមានគម្រោងទស្សនកិច្ចទីក្រុងព្យុងយ៉ាងនៃប្រទេសកូរ៉េខាងជើងក្នុងខែមិថុនានោះដែរ។
កិច្ចប្រជុំក្នុងខែកក្កដានោះរួមមាន៖
ទី១ កិច្ចប្រជុំរដ្ឋមន្ត្រីអាស៊ាន ដែលមានប្រទេសចំនួន១០ចូលរួម។
ទី២ សន្និសីទក្រោយកិច្ចប្រជុំថ្នាក់រដ្ឋមន្ត្រី និងទី៣ គឺ«វេទិកាតំបន់អាស៊ាន»ដែលមានប្រទេសចូលរួមចំនួន២៨ប្រទេស។ គឺនៅក្នុងវេទិកាតំបន់អាស៊ាននេះហើយ ដែលនឹងមានវត្តមានកូរ៉េខាងជើង និងកូរ៉េខាងត្បូងទាំងពីរតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ