លោក ហោ ណាំហុង ទៅបំពេញទស្សនកិច្ចនៅប្រទេសចិន
លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេសកម្ពុជាបានចាកចេញពីភ្នំពេញនៅព្រឹកថ្ងៃអាទិត្យនេះដើម្បីបំពេញទស្សនកិច្ចរយៈពេល៣ថ្ងៃនៅប្រទេសចិន។ ទស្សនកិច្ចនេះត្រូវគេពន្យល់ថាដើម្បីរឹតចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរកម្ពុជាចិនឲ្យកាន់តែស៊ីជម្រៅថែមទៀត។ ប្រមុខការទូតកម្ពុជាក៏គ្រោងថ្លែងការណ៍ជាមួយមេដឹកនាំទីក្រុងប៉េកាំងអំពីកិច្ចការអន្តរជាតិមួយចំនួនផងដែរ។ នេះក៏ជាទស្សនកិច្ចលើកដំបូងក្នុងឋានៈកម្ពុជាកំពុងធ្វើជាប្រធានសមាគមអាស៊ាននៅឆ្នាំ២០១២នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
លោក ហោ ណាំហុង និងគណៈប្រតិភូជាន់ខ្ពស់កម្ពុជាបានចាកចេញពីភ្នំពេញនៅព្រឹកថ្ងៃអាទិត្យនេះឆ្ពោះទៅកាន់ទីក្រុងប៉េកាំងដើម្បីបំពេញទស្សនកិច្ចរយៈពេល៣ថ្ងៃនៅប្រទេសចិន។ នៅមុនចេញដំណើរ លោកប្រមុខកាទូតបានមានប្រសាសន៍ប្រាប់ក្រុមអ្នករាយការណ៍ព័ត៌មាននៅឯព្រលានយន្តហោះអន្តរជាតិភ្នំពេញថា លោកនឹងធ្វើសេចក្តីថ្លែងការណ៍នៅក្នុង កិច្ចប្រជុំជាមួយមេដឹកនាំចិនដើម្បីបញ្ជាក់និងពង្រឹងចំណងមិត្តភាពដ៏ពិសេសដែលប្រទេសទាំងពីរមានរួចទៅហើយនោះឲ្យកាន់តែស៊ីជម្រៅថែមទៀត។
ដំណើរទស្សនកិច្ចរបស់លោក ហោ ណាំហុង ទៅកាន់ប្រទេសចិនបានធ្វើឡើងតបតាមការអញ្ជើញរបស់ លោក យ៉ាង ឈាជី (Mr. Yang Jiechi) រដ្ឋមន្ត្រីការបរទេសចិន។ បើយោងតាម សេចក្តីប្រកាសព័ត៌មានរបស់ក្រសួងការបរទេសកម្ពុជា នៅក្នុងអំឡុងពេលទស្សនកិច្ចនោះ លោក ហោ ណាំហុង នឹងជួបពិភាក្សាការងារជាមួយសមភាគីចិនគឺ លោក យ៉ាង ឈាជី ដើម្បីពិភាក្សាអំពីទំនាក់ទំនងទ្វេភាគី និងបញ្ហាអន្តរជាតិ ដែលភាគីទាំងពីរយកចិត្តទុកដាក់។ ក្រៅពីនេះ ប្រមុខការទូតកម្ពុជា ក៏គ្រោងជួបជាមួយថ្នាក់ដឹកនាំកំពូលៗរបស់ចិនដើម្បីថ្លែងសុន្ទរកថា ស្ដីពីទំនាក់ទំនងអាស៊ាន-ចិន នៅឯមជ្ឈមណ្ឌលចិន-អាស៊ានផងដែរ។
នេះជាទស្សនកិច្ចលើកដំបូងហើយរបស់លោក ហោ ណាំហុង ទៅកាន់ប្រទេសចិនក្នុងឋានៈកម្ពុជាដែលកំពុងធ្វើជាប្រធានប្តូរវេនអាស៊ាន។ នៅក្នុងតួនាទីនេះ កម្ពុជាក៏នឹងត្រូវដើរតួជាអ្នកសម្របសម្រួលដោះស្រាយជម្លោះរវាងប្រទេសចិនជាមួយបណ្តាប្រទេសសមាជិកអាស៊ានស្តីពីជម្លោះដែនកោះក្នុងសមុទ្រចិនប៉ែកខាងត្បូងផងដែរ។ យ៉ាងណាក៏ដោយ នៅមិនទាន់មានរបៀបវារៈលម្អិតស្តីពីកិច្ចពិភាក្សានៅក្នុងដំណើរទស្សនកិច្ចរបស់លោក ហោ ណាំហុង ទៅកាន់ប្រទេសចិននៅពេលនេះនៅឡើយទេ។ លោក ហោ ណាំហុង គ្រាន់តែបានបញ្ជាក់ថា កិច្ចពិភាក្សានោះនឹងផ្តោតសំខាន់ទៅលើបញ្ហាទាំងអស់ដែលភាគីទាំងពីរយកចិត្តទុកដាក់។
គួរកត់សម្គាល់ថា ចិនដែលជាមហាយក្សអាស៊ី បាននិងកំពុងធ្វើឲ្យមានការភ្ញាក់ផ្អើលមួយនៅក្នុងទំនាក់ទំនងពិសេសជាមួយកម្ពុជា។ ទីក្រុងប៉េកាំងតែងផ្តល់ជំនួយឥតលក្ខខណ្ឌ និងច្រើនសន្ធឹកសន្ធាប់ដល់កម្ពុជា។ ប្រទេសចិនកុម្មុយនិស្តកំពុងទទួលបានការគាំទ្រពីអ្នកនយោបាយខ្មែរកាន់តែទូលំទូលាយឡើង។ មិនត្រឹមតែរដ្ឋាភិបាលប៉ុណ្ណោះទេ ប៉ុន្តែ លោក សម រង្ស៊ីមេដឹកនាំបក្សប្រឆាំងធំជាងគេនៅកម្ពុជាក៏បែរទៅគាំទ្រចិនយ៉ាងចំហដែរ នារយៈពេលចុងក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ