អឺរ៉ុប និងអាមេរិកជួបវិបត្តិ អាស៊ីត្រូវពង្រីកតម្រូវការក្នុងស្រុក
តំបន់អាស៊ី នឹងបន្តស្គាល់កំណើនសេដ្ឋកិច្ច នាឆ្នាំខាងមុខទៀត ! នេះបើយោងតាមការព្យាករណ៍របស់មូលនិធិរូបិយវត្ថុអន្តរជាតិ IMF។ ប៉ុន្តែ ដោយហេតុតែ អឺរ៉ុប និងអាមេរិក កំពុងជួបបញ្ហាឩនភាពថវិកា និងបំណុលសាធារណៈធ្ងន់ធ្ងរពេក អាស៊ីមិនអាចពឹងពាក់តែលើការនាំចេញបានឡើយ។ ដូច្នេះ ដើម្បីរក្សាលំនឹងនៃកំណើនសេដ្ឋកិច្ចឲ្យបានរឹងមាំ អាស៊ីចាំបាច់ត្រូវតែបង្កើនតម្រូវការក្នុងស្រុករបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
ការនាំចេញរបស់តំបន់អាស៊ី ទាំងមូល នឹងចុះថយ ព្រោះបណ្តាប្រទេសជឿនលឿន នៅអឺរ៉ុប និងនៅអាមេរិក កំពុងជួបវិបត្តិសេដ្ឋកិច្ច ដែលបណ្តាលមកពីវិបត្តិបំណុលសាធារណៈ និងឩនភាពថវិកា។ បើការនាំចេញថយចុះ នោះកំណើនសេដ្ឋកិច្ចក៏នឹងថយចុះដែរ នៅឆ្នាំ២០១២ ប៉ុន្តែ អាស៊ី នឹងនៅតែរឹងមាំ ប្រសិនបើប្រទេសនីមួយៗ អាចផ្តល់សន្ទុះ និងពង្រីកសេចក្តីត្រូវការនៅក្នុងស្រុក។
កំណើនសេដ្ឋកិច្ចធ្លាក់ចុះ យ៉ាងទាន់ហន់ នៅតាមបណ្តាប្រទេសសំខាន់ៗក្នុងតំបន់អាស៊ី អាចបង្កឲ្យសកម្មភាពសេដ្ឋកិច្ចក្នុងតំបន់ និងនៅលើពិភពលោក ជាប់គាំងតែម្តង។ ហេតុដូច្នេះហើយបានជាអង្គការមូលនិធិរូបិយវត្ថុអន្តរជាតិ បានណែនាំឲ្យបណ្តាប្រទេសនៅអាស៊ី គិតគូរបង្កើនតម្រូវការ និងលទ្ធភាពចាយវាយ នៅក្នុងស្រុកឲ្យបានប្រសើរឡើង និងឲ្យបានយូរអង្វែង ដើម្បីអាចបំពេញកំណើនសេដ្ឋកិច្ច ឲ្យមានលំនឹងជាមួយនឹងការនាំចេញ។
វិបត្តិទំនិញឡើងថ្លៃ ក៏ជាកត្តាសំខាន់មួយ ក្នុងការអូសទាញកំណើនសេដ្ឋកិច្ច ដែលរដ្ឋាភិបាលត្រូវចាត់វិធានការឲ្យបានសមស្រប។ នេះជាការព្រមានរបស់អង្គការមូលនិធិរូបិយវត្ថុអន្តរជាតិ ទៅកាន់ប្រទេសមួយចំនួន ដូចជា ឥណ្ឌា កូរ៉េខាងត្បូង និងប្រទេសវៀតណាម។
អង្គការមូលនិធិរូបិយវត្ថុអន្តរជាតិ បានប៉ាន់ប្រមាណថា ផលិតផលសរុបក្នុងស្រុករបស់ចិន មហាអំណាចសេដ្ឋកិច្ចទីពីរលើលោក នឹងមានត្រឹមតែ៩,៥% នៅឆ្នាំ២០១១ និង៩%នៅឆ្នាំ២០១២។ ២,៣% សម្រាប់ប្រទេសជប៉ុន។ ៧,៥% នៅប្រទេសឥណ្ឌា។ ចំណែកប្រទេសធំទាំង៥នៅតំបន់អាស៊ីអាគ្នេយ៍ ( ឥណ្ឌូណេស៊ី ថៃ ម៉ាឡេស៊ី ហ្វីលីពីន និងវៀតណាម) នឹងមានកំណើនសេដ្ឋកិច្ចតែ៥,៦% ប៉ុណ្ណោះ នៅឆ្នាំ២០១២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ