វិធានការទប់ស្កាត់របស់ចិននៅចំពោះមុខការវាយលុករបស់អ៊ីនធ័រណែត
នៅថ្ងៃព្រហស្បតិ៍ទី១៩មករានេះ អាជ្ញាធរចិនបានប្រកាសពង្រឹងនិងពង្រីកវិធានការត្រួតពិនិត្យទៅលើអ៊ីនធ័រណែត ជាពិសេសទៅលើអ្នកប្រើប្រាស់ microblogs ដែលមួយថ្ងៃៗបង្ហោះសាររាប់រយពាន់សន្លឹករិះគន់រដ្ឋាភិបាល។ ការប្រកាសម្តងហើយម្តងទៀតនូវវិធានការជាបន្តបន្ទាប់ដើម្បីក្តាប់ប្រព័ន្ធអ៊ីនធ័រណែតស្តែងឲ្យឃើញនូវក្តីព្រួយបារម្ភខ្លាំងឡើងៗរបស់ទីក្រុងប៉េកាំងនៅចំពោះមុខការរីកចម្រើនលឿនរហ័សនៃមធ្យោបាយឃោសនាមហាជនឈានមុខមួយនេះ។ តើហេតុអ្វីបានជាអ៊ីនធ័រណែតធ្វើឲ្យរបបចិនកុម្មុយនិស្តភ័យ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:២៧
ការត្រួតពិនិត្យទៅលើអ៊ីនធ័រណែត គឺជាអាទិភាពចម្បងរបស់ទីក្រុងប៉េកាំង ជាច្រើនឆ្នាំកន្លងមកហើយ។ តាំងពីឆ្នាំ១៩៩៤មក ឆ្នាំដែលអ៊ីនធ័រណែតបានផ្តើមចូលទៅក្នុងសង្គមចិន រដ្ឋអំណាចបានផ្តើមច្រោះព័ត៌មានមកពីបរទេស និងបិទខ្ទប់គេហទំព័រផ្សេងៗដែលនិយាយប៉ះពាល់ដល់កេរ្តិ៍ឈ្មោះរបស់បក្សកុម្មុយនិស្ត។
ក៏ប៉ុន្តែ តាំងពីចុងឆ្នាំ២០១០ ដើមឆ្នាំ២០១១រហូតមកទល់សព្វថ្ងៃ ការត្រួតពិនិត្យពីសំណាក់អាជ្ញាធរទៅលើអ្នកប្រើប្រាស់អ៊ីនធ័រណែត បាននិងកំពុងបន្តកើនខ្លាំងលើសសព្វដង។ ជាក់ស្តែង នៅចុងឆ្នាំ២០១០ ក្រសួងសន្តិសុខសាធារណៈរបស់ប្រទេសចិន បានប្រកាសថា«ការបង្កើតឡើងនូវប្រព័ន្ធសន្តិសុខដ៏ធំមួយ សម្រាប់ត្រួតពិនិត្យអ៊ីនធ័រណែត គឺជាការមួយចាំបាច់»។ ដូចគ្នាអ៊ីចឹងដែរ នៅខែតុលាឆ្នាំ២០១១ ក្នុងឱកាសសម័យប្រជុំមួយនៅទីក្រុងប៉េកាំង បក្សកុម្មុយនិស្តចិនបានតម្រូវឲ្យពង្រឹងវិធានការត្រួតពិនិត្យទៅលើអ៊ីនធ័រណែត។
តើហេតុអ្វីបានជាអ៊ីនធ័រណែតក្លាយជាផ្ទាំងស៊ីបសំខាន់ជាងគេរបស់រដ្ឋាភិបាលចិន? មានមូលហេតុពីរសំខាន់ៗ។ ទីមួយ គឺចលនាបដិវត្តន៍នៅពិភពអារ៉ាប់ បដិវត្តន៍ដែលបានផ្ទុះឡើងតាមរយៈការប្រកូកប្រកាសកេណ្ឌគ្នីគ្នាដោយប្រើបា្រស់អ៊ីនធ័រណែត ជាអាទិ៍បណ្តាញសង្គមFacebook។ រីឯមូលហេតុទីពីរ គឺការកើនឡើងលឿនរហ័សជាទីបំផុតនៃចំនួនអ្នកប្រើប្រាស់អ៊ីនធ័រណែតនៅក្នុងប្រទេសចិន។ ជាក់ស្តែងតួលេខជាផ្លូវការចុងក្រោយ ដែលបានធ្លាក់មកដល់កាលថ្ងៃចន្ទទី១៦មករាដើមសប្តាហ៍នេះបង្ហាញថា នៅដំណាច់ឆ្នាំ២០១១កន្លងទៅនេះ អ្នកប្រើប្រាស់អ៊ីនធ័រណែតនៅប្រទេសចិនមានចំនួនប្រមាណ ៥១៣លាន នាក់ ក្នុងនោះជាង២៥០លាននាក់ជាអ្នកប្រើប្រាស់microblogs។
វិធានការពង្រឹងនិងពង្រីកការត្រួតពិនិត្យដែលអាជ្ញាធរចិនបានប្រកាសនៅថ្ងៃនេះ សំដៅជាពិសេស ទៅលើអ្នកប្រើប្រាស់microblogsនេះតែម្តង ពីព្រោះការត្រួតពិនិត្យទៅលើmicroblogs ពិបាកជាងការត្រួតពិនិត្យទៅលើគេហទំព័រអ៊ីនធ័រណែត។ microblogs នៅប្រទេសចិនក៏ដូចនៅគ្រប់ទីកន្លែងក្នុងពិភពលោកដែរ បាននិងកំពុងក្លាយជាវេទិកាមួយដ៏ពេញនិយម។ ជាក់ស្តែង តាំងពីមានចលនាបដិវត្តន៍នៅពិភពអារ៉ាប់ នាដើមឆ្នាំ២០១១ និងតាំងពីមានគ្រោះថ្នាក់ភ្លូករថភ្លើងល្បឿនលឿនជាទីបំផុតនៅប្រទេសចិន កាលពីខែកក្កដាឆ្នាំ២០១១មក សាររាប់រយលានសន្លឹកដែលរិះគន់រដ្ឋាភិបាលចិនត្រូវបានបង្ហោះតាមmicroblogs។
ម្ល៉ោះហើយ តាំងពីចុងឆ្នាំ២០១១មក អាជ្ញាធរចិនតម្រូវឲ្យអ្នកដែលបើកaccount microblogsប្រើប្រាស់ឈ្មោះពិតរបស់ខ្លួននៅទីក្រុងប៉េកាំង នៅទីក្រុងសៀងហៃនិងនៅក្នុងខេត្តកង់តុង (Guangdong)។ ប៉ុន្តែ មកដល់ឥឡូវ វិធានការនេះអនុវត្តទៅលើតែអ្នកប្រើប្រាស់microblogsថ្មីថ្មោងប៉ុណ្ណោះ ពោលគឺទៅលើអ្នកដែលទើបតែបានបើកaccountនារយៈពេលជាងមួយខែចុងក្រោយនេះ ។ ឥឡូវ អាជ្ញាធរចិនចង់អនុវត្តវិធានការនេះទៅលើអ្នកប្រើប្រាស់microblogs ទាំងអស់តែម្តង បានន័យថា ទាំងអ្នកប្រើប្រាស់ចាស់ ទាំងអ្នកប្រើប្រាស់ថ្មី នៅប៉េកាំង នៅសៀងហៃ និងនៅខេត្តកង់តុង ត្រូវតែដាក់ឈ្មោះពិតរបស់ខ្លួន និងបោះបង់ចោលឈ្មោះក្លែងក្លាយ។
ទន្ទឹមនេះ អាជ្ញាធរចិនបាននិងកំពុងបន្តចាប់ខ្លួនច្រើនឡើងៗ អ្នកប្រើប្រាស់អ៊ីនធ័រណែតណាដែលបង្ហោះសាររិះគន់រដ្ឋាភិបាល និងដាក់ទោសធ្ងន់ឡើងៗទៅលើពពួកអ្នកប្រឆាំងបែបថ្មីទាំងនេះ។ ជាក់ស្តែង គេទើបតែបានដឹងនៅថ្ងៃនេះថា លោកលី ទី (Li Tie) ដែលជាសកម្មជនប្រជាធិបតេយ្យម្នាក់ ត្រូវបានកាត់ទោសឲ្យជាប់ពន្ធនាគារដប់ឆ្នាំ ដ្បិតបុរសនេះបានសរសេរនិងបានបង្ហោះតាមអ៊ីនធ័រណែតអត្ថបទមួយដើម្បីទាមទារឲ្យមានកំណែទម្រង់ប្រជាធិបតេយ្យនៅប្រទេសចិន។
យ៉ាងណាក៏ដោយ នយោបាយទប់ទល់នឹងពួកអ្នកប្រឆាំងដែលប្រើប្រាស់អ៊ីនធ័រណែត គឺជាវិញ្ញាសាមួយកាន់តែពិបាកឡើងជាលំដាប់សម្រាប់ទីក្រុងប៉េកាំង ពីព្រោះអ៊ីនធ័រណែតកំពុងបន្តវាយលុកចូលទៅក្នុងសង្គមចិន រីឯវិធានការរបស់រដ្ឋាភិបាលដែលរហូតមកទល់ពេលនេះគ្រាន់តែជាវិធានការទប់ស្កាត់ ពិតជាមិនគ្រប់គ្រាន់ឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ