អ៊ីស្រាអែល៖រដ្ឋាភិបាលមិនអាចធ្វើការចរចាដោយប្រថុចញ៉ុចនោះទេ
រដ្ឋមន្រ្តីការបរទេសអាមេរិកបានប្រកាសប្រាប់ទៅថ្នាក់ដឹកនាំ អ៊ីស្រាអែល និងប៉ាឡេស្ទីនកាលពីថ្ងៃសុក្រថា ពួកគេត្រូវចាប់ផ្តើមធ្វើការឲ្យបានឆាប់បំផុតដើម្បីរកច្រកចេញក្នុង ដំណើរស្វែងរកសន្តិភាពនៅដើមបូព៌ា។ ប្រតិកម្មតបនឹងការអំពាវនាវនេះ រដ្ឋមន្រ្តីអ៊ីស្រាអែលម្នាក់ដែលជិតស្និទ្ធនឹងប្រមុខដឹកនាំរដ្ឋាភិបាលបាននិយាយថា អ៊ីស្រាអែលមិនអាចធ្វើការចរចាដោយចាប់បង្ខំ របៀបរត់ប្រណាំងដោយផ្ទៀងម៉ោងនាឡិកានោះទេ។ រដ្ឋមន្រ្តីការបរទេសជប៉ុន និងអូស្ត្រាលីដែលកំពុងមានវត្តមាន នៅតំបន់ដើមបូព៌ានៅចុងសប្តាហ៍នេះ បានអំពាវនាវឲ្យអ៊ីស្រាអែលងាកមកការចរចាដោយសន្តិភាពជាមួយ ប៉ាឡេស្ទីន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
រដ្ឋមន្រ្តីការបរទេសជប៉ុនដែលបានចូលរួមសម្ពោធវេទិកាសេដ្ឋកិច្ចជប៉ុន អារ៉ាប់ នៅក្នុងប្រទេសទុយណេស៊ី កាលពីថ្ងៃសៅរ៍បានអំពាវនាវដល់អ៊ីស្រាអែលឲ្យបញ្ឈប់ជាបន្ទាន់អាណានិគមកិច្ចរបស់ខ្លួន និងផ្អាករាល់ការសាងសង់លំនៅឋាន នៅខាងកើតទីក្រុងយេរូសាឡឹម។ នៅចំពោះដៃគូអារ៉ាប់របស់ខ្លួន លោករដ្ឋមន្រ្តីជប៉ុន Seiji Maeharaបាននិយាយបញ្ជាក់ថា លោកគាំទ្រឲ្យមានការចរចាឡើងវិញរវាងអ៊ីស្រាអែល និងប៉ាឡេស្ទីនដើម្បីស្វែងរកសន្តិភាព និងស្ថិរភាពនៅដើមបូព៌ា។
ចំណែក លោកAmr Moussa អគ្គលេខាធិការរបស់សម្ព័ន្ធអារ៉ាប់បានបញ្ជាក់បន្ថែមដែរថា បើគ្មានសន្តិភាព ហើយ បើការចរចារកសន្តិភាពរវាងអ៊ីស្រាអែល និងប៉ាឡេស្ទីននៅតែជាប់គាំងស្ទះ ការអភិវឌ្ឍន៍សេដ្ឋកិច្ចនៅក្នុងតំបន់នឹងមិនអាចកើតមានបានទេ។
រដ្ឋមន្រ្តីការបរទេសអូស្ត្រាលីឯណោះវិញដែលបានចូលជួបប្រធានាធិបតីអេហ៊្សីប កាលពីថ្ងៃសៅរ៍ម្សិលមិញ បាននិយាយព្រមានថា ពេលវេលានៃការចរចាដើម្បីសន្តិភាពនៅដើមបូព៌ាកាន់តែខើចណាស់ទៅហើយ។ លោកKevin Rudd បានបង្ហាញពីកង្វល់របស់អូស្ត្រាលីដែលមិនបានឃើញការងារជឿនលឿនទៅមុខ នៅក្នុងដំណើរការរកសន្តិភាពនៅដើមបូព៌ា។ រដ្ឋមន្រ្តីការបរទេសអូស្ត្រាលី បានបន្ទោសទៅអ៊ីស្រាអែលថា ការបន្តសាងសង់លំនៅឋានអ៊ីស្រាអែល នៅខាងកើតទីក្រុងយេរូសាឡឹម កំពុងតែបំផ្លាញឱកាសស្វែងរកសន្តិភាពជាមួយប៉ាឡេស្ទីនហើយ។
អ៊ីស្រាអែលនឹងមិនដកខ្លួនចេញពីតំបន់Cisjordanie និងពីភាគខាងកើតទីក្រុងយេរូសាឡឹមទាំងស្រុងនោះទេ ពីព្រោះតំបន់ទាំងនោះនឹងអាចពួកអ៊ីស្លាមជ្រុលនិយមដែលជាសម្ព័ន្ធមិត្តរបស់អៀរ៉ង់ យកទៅប្រើប្រាស់ដើម្បីធ្វើការវាយប្រហារមកលើអ៊ីស្រាអែល។ នេះជាការនិយាយបញ្ជាក់របស់រដ្ឋមន្រ្តីក្រសួងបរិស្ថានអ៊ីស្រាអែល។ ជាការឆ្លើយតបទៅនឹងការអំពាវនាវរបស់រដ្ឋមន្រ្តីកាបរទេសអាមេរិក នៅថ្ងៃអាទិត្យនេះ រដ្ឋមន្រ្តីអ៊ីស្រាអែលរូបនេះបានបា្រប់ឲ្យដឹងជាមុនថា ដើម្បីផលប្រយោជន៍របស់អ៊ីស្រាអែល រដ្ឋាភិបាលរបស់លោកមិនអាចបើកការចរចាដោយលឿនរហ័ស ក្នុងការដោះស្រាយជម្លោះជាមួយនឹងប៉ាលេស្ទីនបានទេ។ “អ៊ីស្រាអែលនឹងបន្តស្វែងរកការចរចាដើម្បីសន្តិភាព ប្រសិនបើសន្តិភាពនោះមិនប៉ះពាល់ដល់អនាគត និងវត្តមានប្រទេសអ៊ីស្រាអែលក្នុងផែនទីពិភពលោក"៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ