សេដ្ឋកិច្ចជប៉ុនបន្តដើរថយក្រោយ តែអាចនឹងផ្តើមកើនឡើងវិញ នៅត្រីមាសទី៣
សេដ្ឋកិច្ចជប៉ុនបន្តដើរថយក្រោយ នៅត្រីមាសទី២ឆ្នាំ២០១១ ក្រោយពីមានគ្រោះរញ្ជួយដីនិងរលកយក្សស៊ូណាមីនៅប៉ែកឦសាននៃប្រទេស កាលពីថ្ងៃទី១១មីនារួចមក។ នេះបើយោងទៅតាមតួលេខដែលរដ្ឋាភិបាលទីក្រុងតូក្យូបានផ្សព្វផ្សាយជាសាធារណៈ នៅថ្ងៃចន្ទទី១៥សីហានេះ។ យ៉ាងណាមិញ តួលេខដដែលទាំងនេះ ដែលក៏បង្ហាញដែរនូវភាពមាំមួនហួសការស្មាននៃសេដ្ឋកិច្ចជប៉ុន កំពុងបំផុសឲ្យមានសុទិដ្ឋិនិយមឡើងវិញ នៅក្នុងជួរថ្នាក់ដឹកនាំនិងក្នុងមជ្ឈដ្ឋានអ្នកជំនួញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
«ប្រទេសយើងបានងើបក្បាល និងបានដើរចេញរួចពីភាពហិនហោច នៅក្រោយសង្គ្រាមលោក។ យើងនឹងច្បាស់ជាអាចកសាងស្ថាបនាឡើងវិញតំបន់ខូចខាតទាំងប៉ុន្មាន» នៅប៉ែកឦសាននៃប្រទេស”។ លោកនាយករដ្ឋមន្ត្រីNaoto Kan បានប្រកាសយ៉ាងដូច្នេះ នៅថ្ងៃចន្ទនេះ នាឱកាសខួបគម្រប់៦៦ឆ្នាំនៃការចាញ់សង្គ្រាមលោកលើកទីពីររបស់ប្រទេសជប៉ុន។
លោកNaoto Kan បានសម្តែងនូវសុទិដ្ឋិនិយមរបស់លោកបែបនេះ ជួនចំពេលដែលតួលេខផ្សេងៗជាផ្លូវការបង្ហាញថា សេដ្ឋកិច្ចប្រទេសជប៉ុនបានបន្តដើរថយក្រោយបីត្រីមាសជាប់ៗគ្នា។ ផលិតផលដុលក្នុងស្រុកនៅត្រីមាសទី២ឆ្នាំ២០១១បានថយអស់០,៣ភាគរយ បើធៀបទៅនឹងត្រីមាសទីមួយ។
ការដើរថយក្រោយនៃសេដ្ឋកិច្ចជប៉ុននៅក្នុងចន្លោះខែមេសានិងមិថុនាកន្លងទៅនេះ គឺជាផលវិបាកដែលហូរចេញពីគ្រោះរញ្ជួយដីនិងគ្រោះរលកយក្សស៊ូណាមី ថ្ងៃទី១១មីនា។ គ្រោះមហន្តរាយនេះដែលបានបណ្តាលឲ្យស្លាប់២០ ០០០នាក់ បានធ្វើឲ្យការនាំទំនិញទៅក្រៅប្រទេស ការវិនិយោគ និងឧបភោគបរិភោគធ្លាក់ចុះ។
យ៉ាងណាក៏ដោយ តួលេខសេដ្ឋកិច្ចចេញផ្សាយនៅថ្ងៃចន្ទនេះ ក៏បានបំផុសឲ្យមានសុទិដ្ឋិនិយមដែរ ដោយសារថា អត្រានៃឧបភោគបរិភោគមិនបានធ្លាក់ចុះខ្លាំងដូចការព្យាករណ៍ទេ។ ដោយឡែក វិនិយោគសាធារណៈដែលបានកើនឡើងចំនួន៣ភាគរយក្រោយគ្រោះរញ្ជួយដីបានជួយប៉ះប៉ូវការធ្លាក់ចុះនៃវិនិយោគឯកជន។ អ៊ីចឹងហើយបានជាសេដ្ឋវិទូជប៉ុនខ្លះអះអាងថា សេដ្ឋកិច្ចនៃប្រទេសនឹងប្រហែលជាអាចផ្តើមកើនឡើងវិញ នៅក្នុងត្រីមាសទី៣ឆ្នាំ២០១១នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ