មរណភាពលោក Hugo Chavez អាចជះឥទ្ធិពលឬទេ មកលើទំនាក់ទំនងសេដ្ឋកិច្ច រុស្ស៊ី- វេណេស៊ុយអេឡា
ប្រព័ន្ធផ្សព្វផ្សាយនៅម៉ូស្គូ ដោយជូនដំណឹងអំពីមរណភាពនេះ ក៏សំដែងនូវក្តី ព្រួយបារម្ភចំពោះវាសនានៃកិច្ចសន្យានានា ដែលរុស្ស៊ីបានចុះជាមួយវេណេស៊ុយអេឡា តាំងពីវិស័យយោធា រហូតដល់ថាមពល។ កិច្ចព្រមព្រៀងទាំងនោះ មានចុះគឺក្រោមអំណាចលោកប្រធានាធិបតី Hugo Chavez ដែលល្បីខាង“ប្រឆាំងចក្រពត្រអាមេរិក” ហើយបែរមុខមកចងមិត្តភាពជាមួយរុស្ស៊ីវិញ។ តើអស់ពីរូបគាត់ទៅ ស្ថានការណ៍នឹងវិវឌ្ឍទៅយ៉ាងណា ?
ចុះផ្សាយនៅថ្ងៃ៖
ស្តាប់ - ០២:៤០
ជាបឋម គួរនិយាយថាបន្ទាប់ពីរុស្ស៊ី គឺវេណេស៊ុយអេឡាក្រោមការដឹកនាំរបស់លោក Hugo Chavez តែម្តងជាប្រទេសធំទី២ដែលសាមគ្គីជាមួយរុស្ស៊ី បានប្រកាសទទួលស្គាល់ដែនដីអបគមន៍របស់ហ្ស៊កហ្ស៊ី គឺដែនដី Abkhazie និង Ossetie ខាងត្បូងជារដ្ឋឯករាជ្យ ទាំងផ្គើនឲ្យបស្ចិមលោក។
តើខាងផ្នែកនយោបាយនេះ អាចនឹងមានការប្រែប្រួលសើរើឡើងវិញឬទេ គោលជំហររបស់វេណេស៊ុយអេឡា ក្រោយពីអ្នកដឹកនាំថ្មីឡើងកាន់អំណាច? ក្នុងអំឡុងជាង១០ឆ្នាំនៃអំណាចគាត់ លោក Hugo Chavez ដែលដាក់ទិសកសាងក្នុងប្រទេសខ្លួនជារបបសង្គមនិយមបែបថ្មី បានប្តេជ្ញាតាំងទំនាក់ទំនងមិត្តភាពយ៉ាងជិតស្និទ្ធជាមួយរុស្ស៊ី។
ហើយជាលទ្ធផល ទីក្រុងការ៉ាកាសបានក្លាយជាដៃគូយុទ្ធសាស្ត្រមួយដ៏សំខាន់បំផុតរបស់ ម៉ូស្គូប្រចាំនៅទ្វីបអាមេរិកឡាទីន មានវិស័យយោធានិងថាមពលជាដើម។
ខាងវិស័យយោធា វេណេស៊ុយអេឡាក្រោមអំណាចលោកប្រធានាធិបតី Hugo Chavez តែងបានទិញពីរុស្ស៊ី ក្នុងមួយឆ្នាំៗ នូវសព្វាវុធក្នុងទឹកប្រាក់រាប់ពាន់លានដុល្លារ។ ហើយតាមព្យាករណ៍នៃ “មជ្ឈមណ្ឌលខាងវិភាគអំពីការជួញអាវុធក្នុងលោក” ក្នុងចន្លោះឆ្នាំ២០១២-២០១៥ វេណេស៊ុយអេឡាត្រូវឈានឡើងដល់ចំណាត់ថ្នាក់ទី២ ខាងទំហំសព្វាវុធទិញពីរុស្ស៊ី ប្រកបដោយទឹកប្រាក់ ៣.២០០លានដុល្លារក្នុង១ឆ្នាំ គឺស្ថិតនៅតែពីក្រោយប្រទេសឥណ្ឌាប៉ុណ្ណោះ។
ខាងវិស័យថាមពល ក្រុមហ៊ុនរដ្ឋរុស្ស៊ីខាងប្រេងកាត ហៅថា Rosneftបានបញ្ចូលវិនិយោគទុន១០.០០០លានដុល្លារទៅហើយ ទៅក្នុងគម្រោងខាងជីកប្រេងឆៅ នៅតាមអណ្តូងប្រេងចំនួន៥កន្លែងឯណោះ នៅវេណេស៊ុយអេឡា ដោយបច្ចុប្បន្នជីកបានក្នុង១ឆ្នាំៗ បរិមាណប្រេងនេះ ១៥លានតោន។ តាមសំដី ប្រធានអគ្គនាយកក្រុមហ៊ុននេះ លោក Igor Sechine ដែលកាលពីចុងខែធ្នូកន្លងទៅ បានទៅកាន់ក្រុងការ៉ាកាស ក្នុងអនាគតគូភាគី គ្រោងបង្កើនការជីកបូមនេះឲ្យស្ទុះដល់ ៥០លានតោន ក្នុង១ឆ្នាំ។
ចំណែករដ្ឋមន្ត្រីក្រសួងថាមពលវេណេស៊ុយអេឡា លោក Raphael Ramires បានឲ្យដឹងថា៖ ក្នុងគម្រោងរួម រុស្ស៊ី-វេណេស៊ុយអេឡា ទំហំវិនិយោគសរុបនឹងមានទឹកប្រាក់ដល់ ៤៦.០០០លានដុល្លារ ដែលពីក្នុងនោះទុនសរុបពីខាងរុស្ស៊ី គឺ១៧.០០០លានដុល្លារ។
- ទៅទល់ឆ្នាំ២០២១ គូភាគីជាដៃគូនឹងគ្នា នឹងជីកបានក្នុង១ឆ្នាំៗ រហូតដល់១លានបារីល ឬ ១៥៩.០០០តោន ក្នុង១ថ្ងៃ បានន័យថាជិត ៦០លានតោនក្នុង១ឆ្នាំ។
ភាគីរុស្ស៊ី សង្ឃឹមថារាល់តែកិច្ចសន្យាដែលមានចុះ មុខជានឹងត្រូវបំពេញតាមក្នុងអនាគត ដោយមិនអាស្រ័យនឹងរបបគ្រប់គ្រងនៅវេណេស៊ុយអេឡា បន្ទាប់ពីលោក Hugo Chavez៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ