បញ្ហាប្រាក់ខែកម្មករនិងមន្ត្រីរាជការ ក្លាយជាប្រធានបទនយោបាយ
ចុះផ្សាយនៅថ្ងៃ៖
ស្តាប់ - ០៤:១៥
ខណៈដែលសហជីពកំពុងចរចាជាមួយថៅកែ អំពីការដំឡើងប្រាក់ខែជូនកម្មករ គណបក្សសង្គ្រោះជាតិ ដែលកើតឡើងដោយការរួមគ្នារវាងគណបក្សសម រង្ស៊ី និងគណបក្សសិទ្ធិមនុស្ស បានប្រកាសសន្យាជាឧឡារឹកថា ខ្លួនអាចដំឡើងប្រាក់ខែដល់កម្មករនិងមន្ត្រីរាជការ តាមការទាមទាររបស់ពួកគេបាន ប្រសិនបើគណបក្សនេះឈ្នះឆ្នោត។ ប៉ុន្តែ គណបក្សកាន់អំណាចបានហៅការសន្យានេះថា ជាការសន្យាខ្យល់តែប៉ុណ្ណោះ។ ដូច្នេះ បញ្ហាប្រាក់ខែត្រូវគេមើលឃើញថានឹងក្លាយជាប្រធានបទក្តៅមួយ សម្រាប់ការបោះឆ្នោតជ្រើសរើសតំណាងរាស្ត្រ នាខែកក្កដា ខាងមុខនេះ។
ខុសពីការបោះឆ្នោតលើកមុនៗ បញ្ហាប្រាក់ខែកំពុងក្លាយជាប្រធានបទកាន់តែក្តៅគគុកឡើងជាលំដាប់ ខណៈដែលការបោះឆ្នោតកាន់តែខិតជិតចូលមកដល់។ ក្តៅដោយហេតុថា ប្រាក់ខែតិចតួចរបស់កម្មករនិងមន្ត្រីរាជការ ដែលមិនអាចតាមទាន់ការឡើងថ្លៃទំនិញសព្វសារពើ ត្រូវបានបក្សនយោបាយបញ្ចូលទៅក្នុងកម្មវិធីនយោបាយរបស់ខ្លួន។
គណបក្សប្រឆាំងបានប្រកាសដាក់ចេញគោលនយោបាយប្រាក់ខែ ដោយសន្យាថានឹងដំឡើងប្រាក់ខែកម្មករឲ្យដល់ ១៥០ ដុល្លារ និងប្រាក់ខែមន្ត្រីរាជការឲ្យដល់មួយលានរៀនឬស្មើ ២៥០ ដុល្លារក្នុងមួយខែ។ មិនតែប៉ុណ្ណោះ បក្សប្រឆាំងក៏បានសន្យាផ្តល់ប្រាក់ឧបត្ថម្ភដល់ជនចាស់ជរាអាយុចាប់ពី ៦០ឆ្នាំឡើង ចំនួន៤ម៉ឺនរៀល ឬ១០ដុល្លារ ក្នុងមួយខែ ផងដែរ។ បច្ចុប្បន្ន នៅពេលដែលសហជីពកម្មករ និងថៅកែរោងចក្រកំពុងចរចាគ្នារឿងប្រាក់ខែ បក្សប្រឆាំងក៏ប្រញាប់បញ្ចេញសំឡេងអំពីប្រាក់ខែម្តងទៀត។
បក្សប្រឆាំងហាក់ដូចជាច្បាស់ក្នុងចិត្តថាខ្លួនអាចសម្រេចគោលនយោបាយនេះបានដោយគ្រាន់តែលុបបំបាត់អំពើពុករលួយ និងគ្រប់គ្រងចំណូលចំណាយថវិកាជាតិឲ្យបានត្រឹមត្រូវ។ ដោយឈរលើតួលេខរបស់អង្គការសង្គមស៊ីវិលខ្លះដែលបានវាយតម្លៃថា អំពើពុករលួយបានធ្វើឲ្យបាត់បង់ថវិកាជាតិដល់ទៅច្រើនរយលានដុល្លារក្នុងមួយឆ្នាំ បក្សប្រឆាំងសង្ឃឹមលើប្រាក់ទាំងនោះដើម្បីធ្វើដើមទុន។
ប៉ុន្តែ គណបក្សកាន់អំណាចមិនទទួលយកការវាយតម្លៃបែបនេះឡើយ បើទោះបីជាខ្លួនទទួលស្គាល់ថាមានអំពើពុករលួយក្នុងរាជរដ្ឋាភិបាលមែនក៏ដោយ។ មិនទទួលយកដោយហេតុថា ម្យ៉ាងការវាយតម្លៃនោះត្រូវបានរាជរដ្ឋាភិបាលចាត់ទុកថាគ្មានមូលដ្ឋានច្បាស់លាស់ និងមានចរិតនយោបាយ និងម្យ៉ាងទៀត បើទោះជាមានអំពើពុករលួយមែនក៏គេមិនអាចប្រមូលប្រាក់ទាំងនោះបានមកវិញដោយស្រួល ដូចការអង្គុយគិតរបស់បក្សប្រឆាំងដែរ ពីព្រោះអំពើពុករលួយគឺជាការឃុបឃិតគ្នាយ៉ាងសម្ងាត់បំផុតដែលពិបាកនឹងមើលឃើញ។
ជាការពិតណាស់ គណបក្សកាន់អំណាចក៏មិនបានមើលរំលងបញ្ហាប្រាក់ខែមន្ត្រីរាជការដែរ។ ការដំឡើងប្រាក់ខែជារៀងរាល់ឆ្នាំដល់មន្ត្រីរាជការស៊ីវិល និងកងកម្លាំងប្រដាប់អាវុធ គឺជាភស្តុតាងបញ្ជាក់ថា បក្សកាន់អំណាចក៏មានគោលនយោបាយគិតគូររឿងប្រាក់ខែនេះដែរ។ ប៉ុន្តែ ការដំឡើងដ៏តិចតួចមិនអាចដោះស្រាយបញ្ហាបានទេ។ គណបក្សបក្សប្រឆាំងធ្លាប់បានត្រូវរិះគន់លើបញ្ហាប្រាក់ខែជាយូរមកហើយ តែការរិះគន់នេះហាក់គ្មានប្រសិទ្ធភាពទេ ពោលគឺគណបក្សប្រជាជនកម្ពុជាកាន់តែឈ្នះឆ្នោតច្រើនឡើងជាលំដាប់។
យ៉ាងណាក៏ដោយ ពេលនេះ បញ្ហាប្រាក់ខែមិនត្រឹមតែជាប្រធានបទនៃការរិះគន់ធម្មតាដូចពីមុនទៀតទេ ប៉ុន្តែវាបានក្លាយជាគោលនយោបាយអាទិភាពរបស់គណបក្សប្រឆាំង ដែលបានប្រកាសចេញជាឧឡារឹកដាក់ជូនអ្នកបោះឆ្នោតតែម្តង។
ដូច្នេះ អំណឹះតទៅ សង្គ្រាមពាក្យសម្តីរវាងបក្សប្រឆាំង និងបក្សកាន់អំណាច ប្រាកដជាផ្ទុះឡើងកាន់តែខ្លាំងជុំវិញបញ្ហាប្រាក់ខែនេះ ជាពិសេសនៅពេលយុទ្ធនាការឃោសនាបោះឆ្នោត ដែលចូលមកដល់នាពេលខាងមុខ។
ដោយហេតុថា បញ្ហាប្រាក់ខែជារឿងដ៏រសើបមួយសម្រាប់ប្រទេសកម្ពុជា ពីព្រោះតែប្រាក់ខែដ៏ស្តួចស្តើងរបស់មន្ត្រីរាជការ និងកម្មករ គឺជាសម្ពាធដ៏ធ្ងន់មួយដែលគ្របសង្កត់ទៅលើជីវភាពរបស់ពួកគេ ដូច្នេះទោះតិចឬច្រើន គោលនយោបាយប្រាក់ខែច្បាស់ជានឹងទាក់ទាញចំណាប់អារម្មណ៍អ្នកបោះឆ្នោតជាមិនខាន។
ម្យ៉ាងទៀត ការប្រកួតគ្នាតាមរយៈការដាក់ចេញគោលនយោបាយជាក់លាក់ឲ្យអ្នកបោះឆ្នោតជ្រើសរើស គឺជាការវិវឌ្ឍន៍ប្រកបដោយវិជ្ជមានមួយ នៅក្នុងឆាកនយោបាយកម្ពុជា។ វិជ្ជមាននៅត្រង់ថា វាអាចធ្វើឲ្យគណបក្សនីមួយៗ ខិតខំប្រឹងប្រែងលុបបំបាត់ភាពអសកម្មនានា ដើម្បីដណ្តើមប្រជាប្រិយភាព។ គោលនយោបាយប្រាក់ខែ គឺជាវិញ្ញាសាសាកល្បងដ៏សំខាន់មួយសម្រាប់ការបោះឆ្នោត នាខែកក្កដាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ