គ.ជ.បអំពាវនាវអោយអ្នកមានបណ្តាញសង្គមផ្សព្វផ្សាយព័ត៌មានត្រឹមត្រូវអំពីបោះឆ្នោត
គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានអំពាវនាវជាសាធារណៈអោយពលរដ្ឋអ្នកមានគណនីបណ្តាញសង្គមនានានៅតាមប្រព័ន្ធអ៊ីថឺនែត ជួយផ្សព្វផ្សាយអំពីព័ត៌មានត្រឹមត្រូវស្តីអំពីការបោះឆ្នោតខាងមុខ។ អគ្គលេខាធិការរបស់គ.ជ.ប បានពន្យល់ថា គ.ជ.បបានមើលឃើញសារៈសំខាន់របស់បណ្តាញសង្គមតាមប្រព័ន្ធអ៊ីថឺនែតនេះ ទើបក្រើនរម្លឹកអ្នកលេងបណ្តាញសង្គម មិនអោយផ្សព្វផ្សាយព័ត៌មានដែលធ្វើអោយមានការភាន់ច្រឡំផ្សេងៗ។
ចុះផ្សាយនៅថ្ងៃ៖
ស្តាប់ - ០១:៥៨
ជាលើកដំបូងហើយដែលគណៈកម្មាធិការជាតិរៀបចំការបោះឆ្នោត ដែលគេហៅជាទូទៅថា គ.ជ.បនោះ ប្រកាសអំពាវនាវដល់អ្នកប្រើប្រាស់បណ្តាញសង្គម អោយជួយផ្សព្វផ្សាយព័ត៌មានត្រឹមត្រូវអំពីការបោះឆ្នោត។ អគ្គលេខាធិការនៃគណៈកម្មាធិការជាតិរៀបចំការបោះឆ្នោត លោកទេព នីថាដែលទទួលស្គាល់ឥទ្ធិពលនៃបណ្តាញសង្គម បានថ្លែងប្រាប់វិទ្យុបារាំងអន្តរជាតិ នៅរសៀលថ្ងៃទី២៣ឧសភានេះថា គ.ជ.បមិនបានទទួលព័ត៌មានអវិជ្ជមានអ្វីដែលកើតចេញពីការផ្សព្វផ្សាយក្នុងបណ្តាញសង្គមនោះទេ។ ប៉ុន្តែ គ.ជ.បចង់បានការចូលរួមចំណែកពីក្រុមអ្នកមានបណ្តាញសង្គមទាំងនោះ ក្នុងការផ្សព្វផ្សាយព័ត៌មានត្រឹមត្រូវទាក់ទងនឹង កាលបរិច្ឆេទនៃការបោះឆ្នោតជាដើម។
នៅក្នុងសេចក្តីអំពាវនាវជាលាយលក្ខណ៍អក្សរដែលគ.ជ.បបានចែកផ្សាយដល់អ្នកសារព័ត៌មាន នៅថ្ងៃព្រហស្បតិ៍នេះ គ.ជ.បបានសរសេរថា គណៈកម្មាធិការជាតិរៀបចំ ការបោះឆ្នោតសូមអំពាវនាវដល់អ្នកប្រើប្រាស់ប្រព័ន្ធផ្សព្វផ្សាយសង្គមដូចជា Facebook Twitter Google plus Myspace និង blogs ជាដើម អោយពួកគេចៀសវាង ការផ្សព្វផ្សាយព័ត៌មានដែលធ្វើអោយមានការភ័យខ្លាច ភាន់ច្រឡំ និងបាត់ទំនុកចិត្តលើការសំងាត់នៃការបោះឆ្នោត។
ផ្ទុយទៅវិញ គ.ជ.បចង់អោយបណ្តាញសង្គមចូលរួមចំណែកផ្សព្វផ្សាយអោយពលរដ្ឋអ្នកបោះឆ្នោតយល់អោយបានកាន់តែច្បាស់អំពីដំណើរការបោះឆ្នោត និងអោយការបោះឆ្នោតនេះប្រព្រឹត្តទៅដោយសុខសន្តិភាព និងប្រកបដោយជោគជ័យ។
អត្ថាធិប្បាយទៅលើការអំពាវនាវរបស់គ.ជ.បចំពោះអ្នកលេងបណ្តាញសង្គមនេះ នាយកប្រតិបត្តិអង្គការខុមហ្វ្រែល លោកគល់ បញ្ញាបានស្វាគម។ ប៉ុន្តែលោកគល់ បញ្ញាបញ្ជាក់ថា វាមានឥទ្ធិពលតែក្នុងរង្វង់យុវជនដែលមានការអប់រំខ្ពស់រួចហើយ។
និយាយអំពីការផ្សព្វផ្សាយដល់អ្នកបោះឆ្នោតនោះ លោកគល់ បញ្ញាបានស្នើអោយគ.ជ.ប ធ្វើការអោយបានច្រើនជាមួយបណ្តាញផ្សព្វផ្សាយទូរទស្សន៍ និងវិទ្យុទៅវិញ ដើម្បីផ្សព្វផ្សាយព័ត៌មានសំខាន់ៗទាក់ទងនឹងការបោះឆ្នោតនោះ។ នាយកប្រតិបត្តិអង្គការខុមហ្វ្រែលនេះបានរម្លឹកថា យោងតាមច្បាប់ គ.ជ.បមានសិទ្ធិស្នើអោយបណ្តាញទូរទស្សន៍ និងវិទ្យុរបស់រដ្ឋជួយផ្សព្វផ្សាយព័ត៌មានស្តីពីការបោះឆ្នោតដោយមិនបាច់បង់ថ្លៃឈ្នួលទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ