ថៃ
សភាថៃអាណត្តិថ្មីសម្បូរដោយក្រុមគាំទ្រលោកថាក់ស៊ីន
សភាថៃថ្មីបានបើក ជាផ្លូវការនៅថ្ងៃចន្ទទី១ សីហា ២០១១ នៅទីក្រុងបាងកក។ ព្រះរាជបុត្រទាយាទ Maha Vajiralongkornមានវត្តមានជាព្រះប្រធានកិត្តិយស ពិធីប្រកាសចូលកាន់អាសនៈរបស់សមាជិកសភាថៃថ្មីទាំង ៥០០រូប។ សភាថៃថ្មីដែលនាំមុខដោយក្រុមសម្ព័ន្ធមិត្តរបស់លោកថាក់ស៊ីន ត្រូវចាប់ផ្តើមការងាររបស់ខ្លួន ក្នុងសប្តាហ៍នេះ ហើយការងារចំបង គឺបោះឆ្នោតជ្រើសរើសនាយករដ្ឋមន្រ្តីថៃថ្មី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
ផ្សាយពាណិជ្ជកម្ម
តាមច្បាប់បោះឆ្នោត ចាប់តាំងពីថ្ងៃបើកសម្ពោធជាផ្លូវការរបស់ខ្លួន សភាថៃមានពេលយ៉ាងយូរ ៣០ថ្ងៃ ដើម្បីបោះឆ្នោតជ្រើសរើសនាយករដ្ឋមន្រ្តី ដែលនឹងមាននាទី រៀបចំរដ្ឋាភិបាលថៃថ្មី។ ដូច្នេះ នៅក្នុងពេលប៉ុន្មានថ្ងៃទៅមុខនេះ បើគ្មានអ្វីកើតឡើង ឬប្រែប្រួលទេ សមាជិកសភាថៃ ដែលភាគច្រើនមកពីគណបក្សភឿថៃ ត្រូវបោះឆ្នោតជ្រើសរើសលោកស្រីយីងឡាក់ ស៊ីណាវ៉ាត ឲ្យធ្វើជានាយករដ្ឋមន្រ្តី។ ក្នុងវ័យ៤៤ឆ្នាំ ប្អូនស្រីពៅរបស់លោកថាក់ស៊ីន នឹងក្លាយជានាយករដ្ឋមន្រ្តីស្រ្តី លើកដំបូងគេ ក្នុងប្រវត្តិសាស្រ្តនយោបាយថៃ។
លោកស្រីយីងឡាក់ ដែលត្រូវលោកថាក់ស៊ីន ជាបងប្រុសពិពណ៌នា ថាជាអ្នកតំណាងនយោបាយរបស់ខ្លួនត្រូវចូលរួមបង្កើតរដ្ឋាភិបាលចម្រុះជាមួយគណបក្ស ៥ទៀត បើទោះបីជាគណបក្សភឿថៃរបស់លោកស្រីអាចមានសំឡេងល្មមគ្រប់គ្រាន់បង្កើតរដ្ឋាភិបាលតែម្នាក់ឯង។ សម្រាប់អ្នកវិភាគ ការបង្កើតរដ្ឋាភិបាលចម្រុះជាមួយគណបក្សតូចៗផ្សេងទៀត គឺជាយុទ្ធសាស្រ្តរបស់លោកថាក់ស៊ីនដែលជា ទីប្រឹក្សានយោបាយរបស់លោកស្រីយីងឡាក់។ ធ្វើដូច្នេះ គឺដើម្បីពង្រឹងអំណាចរបស់រដ្ឋាភិបាលលោកស្រីយីងឡាក់ ដើម្បីជៀសវាងការរិះគន់របស់ប្រជាជនពីរឿងបង្កើតអំណាចផ្តាច់ការ និងជៀសវាងរដ្ឋប្រហារដែលលោកថាក់ស៊ីនធ្លាប់រងគ្រោះកន្លងមក។
លោកស្រីយីងឡាក់ អតីតស្រ្តីអ្នកជំនួញបានបង្ហាញសមត្ថភាពប្រមូលសំឡេងគាំទ្រ រហូតបានក្លាយជាប្រមុខដឹកនាំបក្សភឿថៃ និងបានទទួលសំឡេងឈ្នះឆ្នោតភាគច្រើន នៅក្នុងការបោះឆ្នោត។ ប៉ុន្តែ ចាប់ពីពេលដែលសភាបោះឆ្នោតឲ្យធ្វើជានាយករដ្ឋមន្រ្តី រាត្រីទឹកឃ្មុំរបស់លោកស្រីយីងឡាក់នឹងត្រូវចប់។ ក្នុងនាមជានាយករដ្ឋមន្រ្តីក្នុងប្រទេសមួយដែលត្រាំត្រែងនឹងវិបត្តិនយោបាយ ជាង៥ឆ្នាំមកនេះ លោកស្រីត្រូវប្រឈមមុខដោះស្រាយវិបត្តិយូរអង្វែងនេះ និងបញ្ហាសេដ្ឋកិច្ចដែលប្រទេសថៃកំពុងជួបប្រទះ។
ដំបូងបង្អស់លោកស្រីយីងឡាក់ត្រូវធានាបង្រួបបង្រួមគ្នារវាងប្រជាជននៅតាមជនបទ ជាមួយប្រជាជនទីក្រុង ជាពិសេសគឺក្រុមបញ្ញាវន្ត ទាហាន និងមន្រ្តីរាជការដែល រហូតមកមិនពេញចិត្តនយោបាយរបស់លោកថាក់ស៊ីន។ បន្ទាប់មកទៀត នាយករដ្ឋមន្រ្តីថៃត្រូវដំឡើងប្រាក់ខែទាបបំផុត ដែលលោកស្រីធ្លាប់បានសន្យាក្នុងពេលឃោសនាបោះឆ្នោត។ ចំណុចនេះធ្វើឲ្យថ្នាក់ដឹកនាំរតនាគារថៃព្រួយបារម្ភថា នឹងបង្កឲ្យមានអតិផរណាក្នុងប្រទេស។
បញ្ហាចុងក្រោយ ដែលរដ្ឋាភិបាលរបស់លោកស្រីយីងឡាក់នឹងអាចលើកយកមកនិយាយដែរគឺការសុំអត់អោនទោសពីព្រះមហាក្សត្រ ដល់មេដឹកនាំក្រុមអាវក្រហម ដែលមួយចំនួនជាសមាជិករបស់គណបក្សភឿថៃ កំពុងជាប់គុកពីបទរៀបចំភេរវកម្ម។ លោកស្រីយីងឡាក់អាចនឹងរកមធ្យោបាយសុំការលើកលែងពីព្រះមហាក្សត្រឲ្យបងប្រុសរបស់លោកស្រីដែរ។ ប៉ុន្តែអ្នកវិភាគខ្លះមើលឃើញថា រឿងនេះមិនអាចធ្វើឡើង ក្នុងពេលឆាប់ៗនេះ ព្រោះកងទ័ពដែលមិនចូលចិត្តលោកថាក់ស៊ីន អាចនឹងរកលេសដើម្បីផ្តួលរំលំរដ្ឋាភិបាលថ្មី ដូចដែលខ្លួនបានធ្វើទៅលើលោកថាក់ស៊ីន កាលពីឆ្នាំ ២០០៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ