ព្រះអង្គម្ចាស់ស៊ីសុវត្ថិ ធម្មិកោ ធ្វើកូដកម្មអត់អាហារទាមទារ«យុត្តិធម៌»បោះឆ្នោត
ព្រះអង្គម្ចាស់ស៊ីសុវត្ថិ ធម្មិកោ អតីតជំនួយការសម្តេចតា នរោត្តម សីហនុ នៅថ្ងៃទី ២០កញ្ញានេះ បានបេ្តជ្ញាចិត្តធ្វើកូដកម្ម ដោយការបង្អត់អាហារ នៅមុខវត្តភ្នំ ក្នុងរាជធានីភ្នំពេញ។ ការពិត កាលពីព្រឹកថ្ងៃនេះ ព្រះអង្គចង់នៅគង់បង្អត់អាហារនៅមុខព្រះបរមរាជវាំង។ ប៉ុន្តែ ដោយសារមានការហាមឃាត់ពីក្រុមអាជ្ញាធរ ប៉ូលិស ព្រះអង្គក៏បានប្តូរទីតាំងទៅរមណីយដ្ឋានវត្តភ្នំវិញ។
ចុះផ្សាយនៅថ្ងៃ៖
ស្តាប់ - ០១:៥៣
អតីតជំនួយការព្រះមហាវីរក្សត្រ ដែលឥឡូវក្លាយជាមន្ត្រីបក្សប្រឆាំង បេ្តជ្ញាថានឹងបង្អត់អាហារ ដោយមិនមានថ្ងៃកំណត់ ប្រសិនបើពុំមានដំណោះស្រាយណាមួយគាប់ប្រសើរ សម្រាប់ប្រជាជនខ្មែរ ដែលជាម្ចាស់ឆ្នោតទេនោះ។ ថ្លែងប្រាប់វិទ្យុបារាំង នៅថ្ងៃនេះ នៅពេលដែលព្រះអង្គ កំពុងអង្គុយជាមួយ ព្រះសង្ឃដទៃទៀត ប្រមាណជា ៣០អង្គ ព្រះអង្គម្ចាស់ស៊ីសុវត្ថិ ធម្មិកោ បានមានបន្ទូលថា ព្រះអង្គពុំអាចទទួលយកស្ថានភាពនយោបាយរបៀបផ្តាច់ការ ដូចដែលគណបក្សកាន់អំណាច កំពុងតែធ្វើរាល់ថ្ងៃនេះទេ។
ព្រះអង្គ បានប្រៀបប្រដូចស្ថានភាពបច្ចុប្បន្ន ទៅនឹងថ្ងៃទី១៧មិនា ឆ្នាំ ១៩៧០ ដែលពេលនោះទ័ពលន់ នុល បានដាក់ទ័ពចល័តពង្រាយពាសពេញផ្ទៃប្រទេស។ ព្រះអង្គថា ពេលនេះក៏មានការដាក់កងកម្លាំងសមត្ថកិច្ចដូចកាលគ្រានោះផងដែរ។ បេក្ខជនតំណាងរាស្ត្រគណបក្សសង្គ្រោះជាតិរូបនេះ មានបន្ទូលថា គណបក្សប្រជាជនកម្ពុជា កំពុងតែយកស្ថាប័នព្រះមហាក្សត្រ មកលេងសើច ជាល្ខោន កំប្លុកកំប្លែង។ ព្រះអង្គបន្តថា នឹងបូជាជីវិតដើម្បីឲ្យរាស្ត្រខ្មែរជាម្ចាស់ឆ្នោតទទួលបានយុត្តិធម៌ពិតប្រាកដ។
ក្នុងពេលដែលព្រះអង្គម្ចាស់ស៊ីសុវត្ថិ ធម្មិកោ កំពុងបង្អត់អាហារនេះផងដែរ ក៏មានព្រះសង្ឃប្រមាណជា៣០អង្គ មកពីវត្តផ្សេងៗគ្នា បានមកជួបជុំគាំទ្រសកម្មភាពកូដកម្មរបស់ព្រះអង្គ។ ព្រះសង្ឃ ណន ភារៈ មកពីវត្តសំពៅមាស មានសង្ឃដីការថា ការដែលព្រះអង្គនិមន្តមកនេះ គឺពុំមានការបង្ខិតបង្ខំពីអ្នកណាទេ ព្រះអង្គមកដោយចិត្តឯង។ ព្រះអង្គបន្តថា ទោះជាមានការគំរាមកំហែងពីព្រះចៅអធិការវត្ត ប៉ុន្តែ ព្រះអង្គត្រូវតែចូលរួមក្នុងសកម្មភាពណាដែលអាចរកយុត្តិធម៌ជូនជាតិបាន។
គួរបញ្ជាក់ថា កូដកម្មអត់អាហាររបស់ទ្រង់ ស៊ីសុវត្ថិ ធម្មិកោ បានធ្វើឡើងខណៈដែលព្រះមហាក្សត្រកោះអោយមានការប្រជុំសភាដំបូង នៅថ្ងៃទី ២៣ កញ្ញា ដើមសប្តាហ៍ក្រោយនេះ។ គណបក្សសង្គ្រោះជាតិបានប្រកាសធ្វើពហិការមិនចូលរួមកិច្ចប្រជុំនេះទេ។ ការធ្វើកូដកម្មបង្អត់អាហាររបស់ខ្សែរាជវង្សអង្គនេះ គឺមកពីព្រះអង្គចង់យកគំរូតាមវីរបុរសនៃប្រទេសឥណ្ឌា លោក មហាត្មៈ គន្ធី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ