នាយកអង្គការពាណិជ្ជកម្មពិភពលោកថ្មី ជាជនជាតិប្រេស៊ីល
មានអាយុ៥៥ឆ្នាំ ជាជនជាតិប្រេស៊ីល លោក Roberto Azevedo នឹងក្លាយជាអគ្គនាយកអង្គការពាណិជ្ជកម្មពិភពលោក (World Trade Organisation) ចាប់ពីថ្ងៃទី១កញ្ញា ឆ្នាំ២០១៣ សម្រាប់អណត្តិបួនឆ្នាំ។ រដ្ឋាភិបាលប្រេស៊ីល បានថ្លែងអបអរ ចំពោះការតែងតាំងជនជាតិប្រេស៊ីលជាថ្នាក់ដឹកនាំកំពូលរបស់អង្គការនេះ ដោយចាត់ទុកជាកត្តិយសដ៏ធំធេងមួយរបស់ប្រទេស ព្រោះថាប្រេស៊ីល មានសេដ្ឋកិច្ចកំពុងលូតលាស់ខ្លាំង ជាងគេមួយ នៅលើពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
អង្គការពាណិជ្ជកម្មពិភពលោក បានប្រកាសជ្រើសរើសលោក Roberto Azevedo ជានាយករបស់អង្គការ ជាផ្លូវការនៅថ្ងៃពុធទី ៨ឧសភានេះ និងចូលកាន់តំណែងជាផ្លូវការនៅថ្ងៃទី១កញ្ញា ២០១៣។ ប៉ុន្តែប្រភពការទូតបានជូនដំណឹងអំពីជោគជ័យតាំងពី ល្ងាចថ្ងៃអង្គារម្សិលមិញម៉្លេះ។
ជាឯកអគ្គរដ្ឋទូតប្រេស៊ីសប្រចាំអង្គការពាណិជ្ជកម្មពិភពលោក និងបានស្គាល់អង្គការនេះតាំងពីឆ្នាំ១៩៩៥ លោក Roberto Azevedo មានភាពប្រយ័ត្នប្រយែងខ្លាំង តែមិនខ្លាចនឹងការពារទម្រង់ខ្លះនៃនយោបាយការពារផលប្រយោជន៍ផលិតផលក្នុងស្រុក ទល់នឹងការនាំចូលពីបរទេស ដើម្បីអភិវឌ្ឍន៍ប្រទេសទើបមានសេដ្ឋកិច្ចក្មេងខ្ចីនោះទេ។ លោក Roberto Azevedo ចង់ផ្តល់ជីវិតថ្មីដល់ស្ថាប័នពាណិជ្ជកម្មអន្តរជាតិមួយនេះ តាមរយៈមហិច្ឆតាផ្តល់សន្ទុះដល់ការចរចាពាណិជ្ជកម្មរវាងក្រុមប្រទេសអភិវឌ្ឍន៍ និងកំពុងអភិវឌ្ឍន៍ ដែលជាប់គាំងអស់ជាច្រើនឆ្នាំមកហើយ។
លោក Roberto Azevedo ៖
“ចំណុចសំខាន់មួយនៃផែនការរបស់ខ្ញុំ គឺយើងមិនត្រូវអង្គុយរង់ចាំ ទាល់តែដល់ពេលវេលាល្អសម្រាប់គ្រប់គ្នាទេ។ អង្គការមានសមាជិកជិត១៦០ប្រទេស ប្រទេសមួយមានដំណើរសេដ្ឋកិច្ចមួយ មិនអាចមានដូចគ្នាទាំងស្រុង ទាំងជាងមួយប្រទេសបានទេ ... យើងមិនអាចរង់ចាំផ្កាយធ្លាក់ពីលើមេឃឡើយ ! យើងត្រូវតែធ្វើការ និងចាត់ចែងទៅតាមកាលៈទេសៈសេដ្ឋកិច្ចខុសគ្នានេះ និងតាំងជំហរចរចាគ្នា ! យើងត្រូវតែរួមរស់នៅមួយគ្នាក្នុងស្ថានភាពនេះ ព្រោះជាការពិតជាក់ស្តែង ដែលមិនអាចប្រកែកបាន"
លោក Roberto Azevedo មែន បានទទួលតំណែងកំពូលដឹកនាំអង្គការពាណិជ្ជកម្មពិភពលោក ជាជោគជ័យនៃផែនការរបស់លោក តែក៏ជាជាជោគជ័យរបស់ តំបន់អាមេរិកឡាទីន និងបណ្តាប្រទេសដែលមានសេដ្ឋកិច្ចកំពុងលូតលាស់ខ្លាំងដែរ។ សូមបញ្ជាក់ថា ការប្រកួតប្រជែង ជ្រើសរើសអគ្គនាយកថ្មី បន្តពីអគ្គនាយកចាស់ជាជនជាតិបារាំង បានប្រព្រឹត្តទៅ តាំងពីបួនខែមុន ដោយមានបេក្ខជនជាអ្នកឯកទេសផ្នែកពាណិជ្ជកម្មអន្តរជាតិចូលរួមសរុប ៩នាក់ មកពីប្រទេសខុសគ្នា។ គូប្រជែងចុងក្រោយរបស់លោក Roberto Azevedo ជាជើងឯកផ្នែក សេដ្ឋកិច្ចសេរីនិយម និងបើកចំហទីផ្សារ លោក Herminio Blanco ជាជនជាតិម៉ិចស៊ិក ដែលស្ថិតក្នុងចង្កោមប្រទេសកំពុងលូតលាស់ខ្លាំងដូចគ្នា។ រដ្ឋាភិបាលម៉ិចស៊ិក និងលោក Herminio Blanco បានថ្លែងកោតសរសើរ និងសន្យាគាំទ្រភារកិច្ចថ្មីរបស់លោក Roberto Azevedo ទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ