លោក សម រង្ស៊ី និងគ្រួសារត្រូវបានលុបឈ្មោះចេញពីបញ្ជីឈ្មោះបោះឆ្នោត
ក្រុមប្រឹក្សាជំនុំជម្រះ គណៈកម្មការជាតិរៀបចំការបោះឆ្នោត បានសម្រេចលប់ឈ្មោះលោក សម រង្ស៊ី ចេញពីបញ្ជីឈ្មោះបោះឆ្នោតហើយនៅព្រលប់ថ្ងៃនេះ ដោយសំអាងលើសាលដីការរបស់តុលាការកំពូលដែលបានកាត់ទោសលោក សម រង្ស៊ី កំបាំងមុខ ឲ្យជាប់ពន្ធនាគារចំនួន ១២ឆ្នាំ ពីបទបំផ្លាញតម្រុយបង្គោលព្រំដែនកម្ពុជា-វៀតណាម។ រីឯគ្រួសាររបស់លោកក៍ត្រូវបានលុបឈ្មោះចេញពីបញ្ជីបោះឆ្នោតផងដែរដោយសារបានផ្លាស់ប្តូរទីលំនៅទៅរស់នៅទីកន្លែងថ្មី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
មិនត្រឹមតែលុបឈ្មោះលោក សម រង្ស៊ី អតីតប្រធានគណបក្សប្រឆាំងដែលកំពុងរស់នៅនិរទេសខ្លួននៅឯក្រៅប្រទេសដើម្បីគេចពីការជាប់ពន្ធនាគារ ចេញពីបញ្ជីឈ្មោះបោះឆ្នោតប៉ុណ្ណោះទេ ក្រុមគ្រួសាររបស់លោក សម រង្ស៊ី ក៍ត្រូវបានលុបឈ្មោះចេញពីបញ្ជីឈ្មោះបោះឆ្នោតផងដែរ។
សេចក្តីសម្រេច របស់ក្រុមប្រឹក្សាជំនុំជម្រះ គ.ជ.ប. ដែលមានសមាសភាព ៩ រូបដែលទើបតែប្រកាសចូលកាន់តំណែងកាលពីព្រឹកថ្ងៃទី៥វិច្ឆិកា ឆ្នាំ២០១២ បានសម្រេចលុបឈ្មោះលោក សម រង្ស៊ី ចេញពីបញ្ជីបោះឆ្នោត។ ការលុបឈ្មោះនេះ ដោយសំអាងលើសាលដីការរបស់តុលាការកំពូលទាក់ទិនទៅនឹងរឿងបំផ្លាញតម្រុយបង្គោលព្រំដែនកម្ពុជា-វៀតណាម។ ទណ្ឌិតត្រូវលុបឈ្មោះចេញពីបញ្ជីឈ្មោះបោះឆ្នោត។
រីឯសមាជិកគ្រួសាររបស់លោក សម រង្ស៊ីក៍ត្រូវបានចៅសង្កាត់បឹងរាំងលុបឈ្មោះចេញពីបញ្ជីឈ្មោះបោះឆ្នោតផងដែរ ដោយគ្រួសាររបស់លោកបានផ្លាស់ប្តូរទីលំនៅពីសង្កាត់បឹងរាំង ខណ្ឌដូនពេញ ទៅរស់នៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ដែលជាទីស្នាក់ការគណបក្ស សម រង្ស៊ី។
មេធាវីការពារក្តីឲ្យលោកសម រង្ស៊ីគឺលោកជួង ជូងី បានថ្លែងនៅក្នុងអង្គសវនាការថា ការសម្រេចលុបឈ្មោះកូនក្តីរបស់លោកចេញពីបញ្ជីឈ្មោះបោះឆ្នោតនោះ គឺពុំបានអនុវត្តតាមច្បាប់ជាគតិយុត្តនោះទេ គឺអនុវត្តតាមការបង្គាប់បញ្ជាពីអ្នកនយោបាយតែប៉ុណ្ណោះ។
កាលពីល្ងាចថ្ងៃទី៥ ខែវិច្ឆិកា ក្រុមប្រឹក្សាជំនុំជម្រះ គ.ជ.ប. ដែលមានសមាសភាព ៩ រូប ក៍បានសម្រេច លុបឈ្មោះអ្នកបោះឆ្នោតចំនួន ១១នាក់ក្នុងចំណោម៣៥៧នាក់ចេញពីបញ្ជីឈ្មោះបោះឆ្នោតផងដែរ តាមពាក្យបណ្តឹងរបស់តំណាងគណបក្សសម រង្ស៊ីដែលបានដាក់ពាក្យបណ្តឹងស្នើឲ្យលុបឈ្មោះចេញពីបញ្ជីបោះឆ្នោត។ ការលុបឈ្មោះអ្នកទាំង១១នាក់នោះ ត្រូវបានគ.ជ.ប អះអាងថា ដោយសារ ២ នាក់ស្លាប់ និង ៩នាក់ ផ្សេងទៀតបានផ្លាស់ប្តូរទីលំនៅ។ រីឯអ្នកផ្សេងទៀតមានឯកសារបញ្ជាក់អត្តសញ្ញាណត្រឹមត្រូវ ស្របតាមច្បាប់ មិនអាចលុបឈ្មោះ ចេញពីបញ្ជីបោះឆ្នោតបានទេ។
ដើមបណ្តឹងនៃគណបក្សសមរង្ស៊ី លោក តុល ប្រាសាទក៍មានប្រតិកម្មជំទាស់ថា លោកមិនអាចទទួលយកការសម្រេចរបស់ក្រុមប្រឹក្សាជំនុំជម្រះនៃគ.ជ.ប បានឡើយ។ លោកនឹងបន្តដាក់ពាក្យបណ្តឹងទៅក្រុមប្រឹក្សាធម្មនុញ្ញបន្តទៀត។ ដើមបណ្តឹងរបស់គណបក្សសមរង្ស៊ី ដែលមាន លោក តុល ប្រាសាទ និងលោក លី សុភ័ណ្ឌ បានប្តឹងជំទាស់ទៅនឹងសេចក្តីសម្រេចរបស់ក្រុមប្រឹក្សាឃុំលើកដែក ឃុំពោធិ៍បាន ឃុំព្រែកថ្មី និងឃុំសំពៅពូន ស្រុកកោះធំ ខេត្តកណ្តាលទាមទារឲ្យលុប ឈ្មោះជនជាតិវៀតណាមចំនួន ៣៥៧ នាក់ នៅក្នុងបញ្ជីបោះឆ្នោត។ ពាក្យបណ្តឹងនេះដោយសម្អាងថា អ្នកមានឈ្មោះក្នុងបញ្ជីបោះឆ្នោត មានឈ្មោះជាជនជាតិវៀតណាម និយាយភាសាវៀតណាម ស្តាប់វិទ្យុវៀតណាម មើលទូរទស្សន៍វៀតណាម រស់នៅជាក្រុមនៅតាមទូក ដូចអ្នកនេសាទ និងសំលៀកបំពាក់វប្បធម៌វៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ