មហាសេដ្ឋីរុស្ស៊ី ត្រូវបានឃុំខ្លួនបណ្តោះអាសន្ន នឹងគ្រោងបណ្តេញចេញពីកម្ពុជា
មហាសេដ្ឋីរុស្ស៊ី ស៊ែហ្គេ ប៉ូឡុនស្គី ( Sergei Ponlonsky ) ត្រូវបានសមត្ថកិច្ចកម្ពុជាឃុំខ្លួនបណ្តោះអាសន្ន នៅឯនាយកដ្ឋានអន្តោប្រវេសន៍ ក្រោយពីសមត្ថកិច្ចកម្ពុជា បានចាប់ខ្លួនគាត់ រួមជាមួយនឹងបក្សពួក ៥នាក់ ផ្សេងទៀត នៅល្ងាចថ្ងៃទី១៥ ខែឧសភា ម្សិលមិញនេះ។ ការឃុំខ្លួនបណ្តោះអាសន្ននេះ បានធ្វើឡើងដោយរងចាំសេចក្តីប្រកាសបណ្តេញចេញពីកម្ពុជា ដោយរដ្ឋមន្ត្រីក្រសួងមហាផ្ទៃ។
ចុះផ្សាយនៅថ្ងៃ៖
ស្តាប់ - ០២:៣៦
ការចាប់ខ្លួនមហាសេដ្ឋីរុស្ស៊ីនោះ ធ្វើឡើងដោយប៉េអឹម នៅលើកោះដំឡូង ក្នុងខេត្តព្រះសីហនុ នៅល្ងាចថ្ងៃទី១៥ខែឧសភា ម្សិលមិញនេះ។ បន្ទាប់ពីការចាប់ខ្លួន ប៉េអឹម បានបញ្ជូនជនជាតិរុស្ស៊ីទាំង ៦នាក់នោះ ទៅឲ្យប៉ូលីសអន្តោប្រវេសន៍ ដើម្បីសួរនាំ និងចាត់ការបន្ត។ នេះបើតាមប្រភពពីមន្ត្រីជាន់ខ្ពស់ប៉ូលីសអន្តោប្រវេសន៍។
បើតាមលោក សុខ ផល អគ្គនាយកនៃនាយកដ្ឋានអន្តោប្រវេសន៍ បានបញ្ជាក់នៅព្រឹកនេះថា ជនជាតិរុស្ស៊ីទាំង៦រូបនេះ ត្រូវបានឃុំខ្លួននៅនាយកដ្ឋានអន្តោប្រវេសន៍ ហើយលោកស៊ែហ្គេ ប៉ូឡុនស្គី នឹងត្រូវបញ្ជូនចេញពីកម្ពុជាក្នុងពេលឆាប់ៗនេះ។ ចំណែកឯបក្សពួកសេដ្ឋីរូបនេះ នឹងត្រូវអាជ្ញាធរអន្តោប្រវេសន៍ បញ្ជូនចេញពីកម្ពុជានៅពេលក្រោយ ដោយសារតែត្រូវការពេលវេលា ដើម្បីពិនិត្យមើលឯកសារមួយចំនួន ដែលរួមមានលិខិតឆ្លងដែន និងទិដ្ឋាការស្នាក់នៅ ជាដើម។
លោកសុខ ផល បានបន្តថាក្រសួងមហាផ្ទៃមានសិទ្ធិបណ្តេញចេញរាល់ជនបរទេសណា ដែលប្រព្រឹត្តិខុសនឹងច្បាប់អន្តោប្រវេសន៍កម្ពុជា មាត្រា៣៥ ពោលគឺការបណ្តេញចេញពីកម្ពុជាអាចធ្វើឡើងប្រសិនបើគេធ្វើឲ្យមានការប៉ះពាល់ដល់សន្តិសុខសណ្តាប់ធ្នាប់សាធារណៈ អ្នកដែលគ្មានប័ណ្ឌការងារនៅកម្ពុជា និងអ្នកដែលធ្វើឲ្យប៉ះពាល់ដល់សណ្តាប់ធ្នាក់សង្គម។ ចំណែកឯជនជាតិរូស្ស៊ីរូបនេះ គឺមិនមានលិខិតឆ្លងដែន និងគ្មានប័ណ្ឌការងារត្រឹមត្រូវនោះទេ។
យោងតាមសារព័ត៌មានរុស្ស៊ី Rapsi News ដែលចេញផ្សាយកាលពីថ្ងៃទី១៥ ខែឧសភានេះដែរ បានដក់ស្រង់សម្តីរបស់អ្នកនាំពាក្យមហាសេដ្ឋីរុស្ស៊ីរូបនេះថា លោក ប៉ូឡុនស្គី មិនមានបំណងលាក់ខ្លួន ឬគេចខ្លួនពីការតាមចាប់របស់អ្នកណាម្នាក់នោះទេ។ ហើយការរស់នៅក្នុងប្រទេសកម្ពុជារបស់គាត់គឺធ្វើឡើងដោយមានការយល់ព្រមពីកម្ពុជា។
លោក ប៉ូឡុនស្គី ត្រូវបានប្រកាសចាប់ខ្លួនដោយប៉ូលីសអន្តរជាតិ អាំងទែប៉ូល តាមរយៈការស្នើសុំរបស់ក្រសួងមហាផ្ទៃនៃប្រទេសរុស្ស៊ី។ កាលពីខែកក្កដា ឆ្នាំ២០១៣កន្លងទៅ លោកត្រូវបានតុលាការក្រុងមូស្គូ ចោទប្រកាន់ដោយកំបាំងមុខពីបទលួចបន្លំប្រាក់ចំនួន១៧៦លានដុល្លារពីវិនិយោគិនប្រហែល៨០នាក់ក្នុងគំរោងលំនៅដ្ឋាននៅរុស្ស៊ី។ ហើយគាត់ត្រូវបានចាប់ខ្លួនម្តងរួចមកហើយកាលពីខែវិច្ឆិកា ឆ្នាំ២០១៣នៅកម្ពុជា និងត្រូវបានដោះលែងវិញក្នុងខែមករាឆ្នាំ២០១៤។
សូមបញ្ជាក់ថាលោក ស៊ែហ្គេ ប៉ូឡុនស្គី ត្រូវបានទស្សនាវដ្តី Forbe ចាត់ចំណាត់ថ្នាក់គាត់ក្នុងលេខរៀងទី៤០ គឺជាអ្នកមានបំផុតនៅក្នុងប្រទេសរុស្ស៊ីនៅឆ្នាំ២០០៨ ដែលមានទឹកប្រាក់ប្រមាណ ៤.៣៥ពាន់លានដុលា្លរអាមេរិក។ នេះបើតាមសារព័ត៌មានរុស្ស៊ី Rapsi News។
គួរជម្រាបជូនថា កាលពីថ្ងៃទី២០ ខែមេសាកន្លងទៅ ក្រសួងការបរទេសកម្ពុជា បានស្នើទៅក្រសួងយុត្តិធម៌ ឲ្យពិនិត្យឡើងវិញនូវសំណើរបស់សមភាគីរុស្ស៊ី ពីការធ្វើបត្យាប័នរបស់សេដ្ឋីរុស្ស៊ីរូបនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ