ប៉ាគីស្ថានបើកជំនួបកំពូលត្រីភាគី ក្នុងបរិបទភេវនិយមដ៏តានតឹង
តាំងពីម្សិលមិញមកដល់ថ្ងៃនេះ ក្រុងអ៊ីស្លាម៉ាបាតទទួលរៀបចំជំនួបកំពូលត្រីភាគី ប៉ាគីស្ថាន-អាហ្វហ្កានិស្ថាន-អ៊ីរ៉ង់ ដោយមានការចូលរួមពីសំណាក់ប្រធានាធិបតីអ៊ីរ៉ង់ ម៉ាមូតអាម៉ាឌីនិនចាត ប្រធានាធិបតីអាហ្វហ្កានិស្ថាន អាមីត កាហ្សៃ។ ជាជំនួបកំពូលដែលផ្តោតទៅលើដំណើរការស្វែងរកសន្តិភាពឱ្យអាហ្វហ្កានិស្ថាន និងបញ្ហាភេរវនិយម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
សង្គ្រាមប្រឆាំងនឹងភេរវនិយម ! នេះជាប្រធានបទចំបងនៃជំនួបកំពូលត្រីភាគី ប៉ាគីស្ថាន-អាហ្វហ្កានិស្ថាន-អ៊ីរ៉ង់ រយៈពេលពីរថ្ងៃនៅទីក្រុងអ៊ីស្លាម៉ាបាត ប្រទេសប៉ាគីស្ថាន។ ក្នុងនាមជាម្ចាស់ផ្ទះ និងជាអ្នកធ្លាប់មានទំនាក់ទំនងជាមួយពួកតាលីបង់ ប៉ាគីស្ថានសង្ឃឹមក្លាយជាចំណែកមួយក្នុងការស្វែងរកសន្តិភាពឱ្យអាហ្វហា្កនិស្ថាន។
គឺក្នុងន័យនេះដែលលោកប្រធានាធិបតីអាហ្វហ្កានិស្ថាន អាមីត កាហ្សៃ បានឆ្លៀត ស្នើសុំជំនួយអន្តរាគមន៍ពីភាគីប៉ាគីស្ថាន ឱ្យប្រើឥទ្ធិពលជួយនាំពួកតាលីបង់មកចរចារកសន្តិភាព។ ការចរចាដែលជាយុទ្ធសាស្ត្រ ជាក្តីប្រាថ្នារបស់អាហ្វហ្កានិស្ថាន និងសហរដ្ឋអាមេរិក អាចសម្រេចទៅបាន ក៏អាស្រ័យលើចេតនាពិតរបស់ពួកតាលីបង់ និងប៉ាគីស្ថានផងដែរ។ អាហ្វាហ្កានិស្ថានព្រួយបារម្ភ និងសង្ស័យថា ប៉ាគីស្ថានចង់ប្រើកម្លាំងតាលីបង់ ដើម្បីទប់ទល់នឹងឥទ្ធិពលឥណ្ឌា។
ប៉ុន្តែសម្រាប់ លោក ម៉ាមូត អាម៉ាឌីនិនចាត ប្រធានាធិបតីអ៊ីរ៉ង់ ជាប្រទេសជិតខាងប៉ាគីស្ថាន និងអាហ្វហ្កានិស្ថានវិញ អសន្តិសុខ និងបញ្ហាកើតមានក្នុងតំបន់ទាំងអម្បាលម៉ាន គឺបណ្តាលមកពីការជ្រៀតជ្រែករបស់បរទេស។
ក្នុងសន្និសីទកាសែតជាមួយសមភាគីប៉ាគីស្ថាន និងអាហ្វហ្កានិស្ថាននេះ លោក ម៉ាមូត អាម៉ាឌីនិនចាត មិនបានវាយប្រហារដៅចំលើប្រទេសណាមួយទេ ប៉ុន្តែសូមបញ្ជាក់ថាជំនួបកំពូលត្រីភាគីនេះ ប្រព្រឹត្តទៅក្នុងបរិបទដ៏តានតឹងបំផុត។ ព្រោះម្យ៉ាងអាមេរិកទើបចោទប្រកាន់អ៊ីរ៉ង់ ថាជាអ្នកគាំទ្រក្រុមចលនាភេរវនិយមអាល់កៃដា (អាល់កៃដានៅអ៊ីរ៉ាក់ អាល់កៃដាHezbollah និងពួកចលនាហាម៉ាសនៅប៉ាឡេស្ទីន)។ ជាមួយប្រទេសអ៊ីស្រាអែលក៏កាន់តែដុនដាបខ្លាំង។ បន្ទាប់ពីគំរាមចង់វាយប្រហារអ៊ីរ៉ង់ អ៊ីស្រាអែលបានចោទប្រកាន់ក្រុងតេអេរ៉ង់ថាជាដើមហេតុបង្កអំពើភេរវកម្មប្រឆាំងនឹងប្រយោជន៍អាមេរិក ឬអ៊ីស្រាអែល នៅបរទេស ដូចយ៉ាងភេរវកម្មមិនសម្រេចនៅក្រុងបាងកក កាលពីថ្ងៃអង្គារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ