ទាហានបដិសេធដំណឹងដែលថា នឹងមានរដ្ឋប្រហារជាថ្មី
កាលពីថ្ងៃម្សិលមិញ លោកចាតុផន សមាជិកសភាមកពីគណបក្សប្រឆាំង Puea Thai និងជាសហប្រធានរណសិរ្សដើម្បីប្រជាធិបតេយ្យ ប្រឆាំងនឹងអំណាចផ្តាច់ការ បានលើកឡើងថា ពួកទាហានបានជួបប្រជុំគ្នា និងយល់ព្រមធ្វើរដ្ឋប្រហារទំលាក់លោកអាភីស៊ីត។ ព័ត៌មាននេះត្រូវបានរដ្ឋាភិបាល និងមេបញ្ជាការទ័ពថៃរុញច្រានចោល។
ចុះផ្សាយនៅថ្ងៃ៖ កែប្រែថ្ងៃទី៖
បទអត្ថាធិប្បាយរបស់ឈាង បុប្ផា
ដំណឹងធ្វើរដ្ឋប្រហារត្រូវបានគណបក្សប្រឆាំងលើកយកមកនិយាយ នៅចំថ្ងៃដែលនាយករដ្ឋមន្រ្តីថៃ បង្ហាញពីលទ្ធភាពរំលាយសភា និងការបោះឆ្នោតមុនកាលកំណត់។ បើតាមលោក ចាតុផន ពួកទាហានមានហេតុផលបួនយ៉ាងដើម្បីធ្វើរដ្ឋប្រហារ។ ពួកទាហានអាចបន្ទោស ទំលាក់ទំនួលខុសត្រូវទៅលើរដ្ឋាភិបាលបច្ចុប្បន្ន នោះ ថា ធ្វើឲ្យមានការបែកបាក់ប្រជាជន បាត់បង់ទឹកដីទៅខាងកម្ពុជា អសម្ថភាពក្នុងការដោះស្រាយវិបត្តិនៅតំបន់ភាគខាងត្បូងថៃ។ ហេតុផលចុងក្រោយ គឺពួកទាហាននេះឯងក៏ធ្លាប់បានចូលបង្រ្កាបពួកក្រុមអាវក្រហម រហូតដល់មានស្លាប់មនុស្ស ៩០នាក់ កាលពីខែមេសាកន្លងទៅ។
ឧបនាយករដ្ឋមន្រ្តីថៃ លោកស៊ូថេប ថងស៊ូបាន ដែលបានរុញច្រានចោលការលើកឡើងរបស់ក្រុមបក្សប្រឆាំង ទទួលស្គាល់ថា មានមនុស្សមួយចំនួន ចង់ឲ្យមានរដ្ឋប្រហារ ប៉ុន្តែ សម្រាប់រូបលោក រដ្ឋប្រហារយោធាមិនមែនជាដំណោះស្រាយឡើយ។ មេបញ្ជាការទ័ពថៃឯណោះវិញ អះអាងថា លោកនឹងមិនរៀបចំធ្វើរដ្ឋប្រហារជាដាច់ខាត។ ហើយរហូតមកដល់ពេលនេះ គ្មានអ្នកទទួលខុសត្រូវណាម្នាក់ហ៊ានចេញមុខធ្វើរដ្ឋប្រហារដែរ។
ប្រទេសថៃល្បីឈ្មោះខាងរដ្ឋប្រហារយោធាផ្តួលអំណាចនាយករដ្ឋមន្រ្តី។ ចាប់តាំងពីឆ្នាំ ១៩៣២មក រដ្ឋប្រហារទំលាក់នាយករដ្ឋមន្រ្តីមានដល់ទៅ១៨លើក ចាប់តាំងពីឆ្នាំ។ ប៉ុន្តែ លើកនេះ អ្វីដែលគួរឲ្យចាប់អារម្មណ៍ នោះគឺ ពួកយោធាថៃធ្លាប់ធ្វើរដ្ឋប្រហារ ទំលាក់លោកថាក់ស៊ីន និងក្រោយមកបានចូលរួមគាំទ្រលោកអាភីស៊ីត ឲ្យចូលកាន់តំណែង ជានាយករដ្ឋមន្រ្តីចាប់តាំងពីឆ្នាំ ២០០៨។
ក្រៅពីព័ត៌មានចរាម អារ៉ាមទាក់ទងនឹងរដ្ឋប្រហារយោធា នាយករដ្ឋមន្រ្តីថៃបច្ចុប្បន្នកំពុងរងការរិះគន់ខ្លាំងពីខាងក្រុមអាវលឿង (ដែលធ្លាប់តែគាំទ្ររូបលោក)។ ពួកក្រុមអាវលឿង បានបន្ទោសរដ្ឋាភិបាលថា ដោះស្រាយបញ្ហាព្រំដែនរហូតធ្វើឲ្យថៃបាត់បង់ទឹកដីទៅខាងកម្ពុជា។ ពួកគេជាច្រើនពាន់នាក់បានធ្វើការតវ៉ានៅមុខវិមានរដ្ឋាភិបាលថៃបីថ្ងៃមកហើយ និងគម្រាមសម្រុកចូលអុកឡុកវិមានរដ្ឋាភិបាល ប្រសិនបើសំណើឲ្យដោះស្រាយបញ្ហាព្រំដែនរបស់ពួកគេ មិនត្រូវបានរដ្ឋាភិបាលយកទៅគិតគូរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ