ថៃដង្ហែអង្គកឋិនពីបាងកកមកភ្នំពេញ
មហាវិទ្យាល័យថៃមួយ នៅទីក្រុងបាងកកឈ្មោះ ចុឡាឡុងកនរាជវិទ្យាល័យ រួមជាមួយមូលនិធិមនុស្សធម៌មួយបានផ្តួចផ្តើមដង្ហែអង្គកឋិនទានមួយ មកកាន់វត្តពោធិយារាម ហៅវត្តចាស់ ស្ថិតនៅក្នុងសង្កាត់ជ្រោយចង្វាខណ្ឌប្ញស្សីកែវ រាជធានីភ្នំពេញ។ អង្គកឋិនទានបានចាប់ផ្តើមដង្ហែចេញពីក្រុងបាងកក នៅព្រឹកថ្ងៃសៅរ៍ម្សិលមិញ និងបានចាប់ផ្តើមប្រារព្ធពិធីបុណ្យជាផ្លូវការ នៅថ្ងៃអាទិត្យនេះ។ នេះទំនងជាចំណែកមួយនៃការខិតខំស្តារឡើងវិញនៃទំនាក់ទំនង ការទូតខ្មែរ និងថៃដែលបានធ្លាក់ដុនដាបយ៉ាងខ្លាំង ចាប់តាំងពីមានជម្លោះព្រំដែន នៅព្រះវិហារមក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ប៉ែន បូណាពីទីក្រុងភ្នំពេញ
ព្រះសង្ឃ និងពុទ្ធបរិស័ទថៃសរុបប្រមាណជាង៦០នាក់បានដង្ហែអង្គកឋិនទានមួយចេញពីទីក្រុងបាងកកប្រទេសថៃ ឆ្ពោះមកកាន់វត្តពោធិយារាម ហៅវត្តចាស់ស្ថិតក្នុងសង្កាត់ជ្រោយចង្វា រាជធានីភ្នំពេញនៅព្រឹកថ្ងៃអាទិត្យនេះ។
អង្គកឋិនទាននេះផ្តួចផ្តើមដោយមហាវិទ្យាល័យ ចុឡាឡុងកនរាជវិទ្យាល័យ រួមជាមួយមូលនិធិមនុស្សធម៌ OICT ដែលមានមូលដ្ឋាន នៅក្នុងក្រុងបាងកក។ យោងតាមលិខិតមួយច្បាប់របស់សម្តេចមហាសង្ឃរាជ ទេព វង្ស អង្គកឋិនទាននេះបានដង្ហែពីបាងកក តាមច្រកអន្តរជាតិប៉ោយប៉ែតមួយផ្នែក និងមួយផ្នែកទៀតតាមព្រលានយន្តហោះអន្តរជាតិភ្នំពេញ។
ក្រុមអ្នកផ្តើមកឋិនជាតិថៃទាំងនោះបានជួបជុំគ្នា នៅព្រឹកថ្ងៃអាទិត្យនេះ នៅក្នុងវត្តឧណ្ណាលោម ដើម្បីប្រគេនគ្រឿងបរិក្ខារកឋិន ថ្វាយសម្តេចមហាសង្ឃរាជ ទេព វង្សមុននឹងដង្ហែទៅកាន់វត្តពោធិយារាម ហៅវត្តចាស់ក្នុងសង្កាត់ជ្រោយចង្វា ខណ្ឌប្ញស្សីកែវ។ ការដង្ហែកឋិនពីប្រទេសថៃចូលមកប្រទេសកម្ពុជាធ្លាប់បានធ្វើជាហូរហែរួចមកហើយ នៅតាមបណ្តាខេត្តជាយដែន។ ប៉ុន្តែ នេះជាលើកដំបូងហើយដែលអង្គកឋិនទានថៃបានដង្ហែមកដល់ភ្នំពេញ បេះដូងនៃប្រទេសកម្ពុជាតែម្តង។
មានការកត់សម្គាល់ថា ព្រឹត្តិការណ៍នេះបានកើតឡើង ខណៈពេលដែលមេដឹកនាំប្រទេសទាំងពីរកំពុងស្វែងរកការផ្សះផ្សាមុខរបួសការទូតដែលបានធ្លាក់ចុះ ដុនដាបយ៉ាងខ្លាំង ចាប់ពីពេលដែលទាហានថៃចូលឈ្លានពានទឹកដីព្រះវិហារ កាលពីខែកក្កដាឆ្នាំ២០០៨មក។
នៅថ្ងៃសៅរ៍ម្សិលមិញ លោកនាយករដ្ឋមន្ត្រី ហ៊ុន សែន ក្នុងនាមរដ្ឋាភិបាលបានផ្តួចផ្តើមបុណ្យកឋិនទានមួយដង្ហែទៅកាន់វត្តស្វាយជ្រំ ស្ថិតក្នុងតំបន់អភិរក្សប្រាសាទព្រះវិហារ។ អង្គកឋិនទាននេះបាននាំយកនូវបច្ច័យចំនួនជាង២០ម៉ឺនដុល្លារសម្រាប់កសាងវត្តនៅតំបន់ជាយដែនមួយនេះ។ តំបន់ព្រះវិហារបានទទួលការយកចិត្តទុកដាក់ពីរដ្ឋាភិបាលក៏ដូចជាពីសំណាក់មហាជនខ្មែរជាទូទៅដែរ ចាប់តាំងពីមានជម្លោះព្រំដែនជាមួយថៃមក។ ជម្លោះនេះបានបង្កអរិភាពយ៉ាងខ្លាំងរវាងប្រទេសជិតខាងទាំងពីរ។
យ៉ាងណាក៏ដោយ ឆ្លងតាមជំនួប៣លើកចុងក្រោយរវាងនាយករដ្ឋមន្ត្រីខ្មែរ និងថៃ រដ្ឋាភិបាលទាំងពីរបានខិតខំស្តារទំនាក់ទំនងការទូតជាមួយគ្នាឡើងវិញ តាមរយៈការបង្កើនភាពជិតស្និទ្ធជាមួយគ្នាលើគ្រប់វិស័យ ក្នុងនោះអង្គកឋិនទានក៏ទំនងជាមធ្យោបាយមួយដែរសម្រាប់ការផ្សះផ្សាមុខរបួសការទូតរវាងខ្មែរ និងថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ