ប៉ូលិសថៃចាប់បានគ្រឿងសម្ភារសម្រាប់ផលិតគ្រាប់ផ្ទុះ
នៅថ្ងៃចន្ទទី ១៦ មករា ២០១២ អាជ្ញាធរថៃទើបរកឃើញសម្ភារសម្រាប់ផលិតគ្រឿងផ្ទុះ ដែលភេរវជនលាក់នៅខេត្តសាមុត សាខន ដែលស្ថិតនៅភាគនិរតីនៃទីក្រុងបាងកក ពោលគឺនៅពីរថ្ងៃក្រោយអាជ្ញាធរថៃចាប់ឃាត់ខ្លួនជនជាតិលីបង់ម្នាក់ ដែលគេសង្ស័យថា ជាភេរវជនមានផែនការបង្កអំពើភេរវកម្ម នៅក្នុងប្រទេសថៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
សន្តិសុខនៅក្នុងសង្កាត់ពាណិជ្ជកម្មជាច្រើនរបស់ទីក្រុងបាងកកត្រូវបានចាប់ពង្រឹងខ្លាំង កាលពីថ្ងៃសុក្រ បន្ទាប់ពីមានស្ថានទូតអាមេរិក និងអ៊ីស្រាអែលផ្តល់ដំណឹងដល់អាជ្ញាធរថៃ ពីវត្តមានរបស់ភេរវជនអ៊ីស្លាមជ្រុលនិយម ក្នុងប្រទេសថៃ។ ប៉ុន្មានម៉ោងក្រោយមក ជនសង្ស័យ ជាតិលីបង់ម្នាក់ដែលកាន់លិខិតឆ្លងដែនស៊ុយអែដ ត្រូវបានប៉ូលិសថៃចាប់ឃាត់ខ្លួន។ តាមអាជ្ញាធរថៃ ជនសង្ស័យរូបនោះមានទំនាក់ទំនងជាមួយចលនាលីបង់និកាយChiite របស់ពួកអ៊ីស្លាមជ្រុលនិយម Hezbollah។ ចលនាអ៊ីស្លាមជ្រុលនិយមដែលគាំទ្រដោយរបបស៊ីរី និងអ៊ីរ៉ង់ ត្រូវបានអាមេរិក និងអ៊ីស្រាអែលចាត់ចូលក្នុងបញ្ជីខ្មៅនៃក្រុមភេរវជន។
ទៅតាមការចង្អុលបង្ហាញរបស់ជនសង្ស័យលីបង់ ប៉ូលិសថៃ ក៏រកឃើញវត្ថុធាតុសម្រាប់ផលិតគ្រឿងផ្ទុះ ប្រមាណជិត៥គីឡូក្រាម ដែលភេរវជនលាក់ នៅក្នុងផ្ទះមួយ ក្នុងខេត្តសាមុត សាខន ដែលស្ថិតនៅភាគនិរតីទីក្រុងបាងកក។
យោងតាមមេប៉ូលិសថៃ ជនសង្ស័យឈ្មោះអារីស ហ៊ូសេនAtris Hussein បានឆ្លើយសារភាពថា ខ្លួនមានបំណងដឹកជញ្ជូនវត្ថុធាតុសម្រាប់ផលិតគ្រឿងផ្ទុះ ឆ្លងកាត់ប្រទេសថៃ សំដៅទៅប្រទេសទីបី ប៉ុន្តែ ក្រុមខ្លួនគ្មានបំណងបំផ្ទុះគ្រាប់នៅក្នុងប្រទេសថៃទេ។ តាមមេប៉ូលិសថៃដដែល ជនសង្ស័យម្នាក់ទៀត បានរត់គេចខ្លួនបានសម្រេចចេញពីប្រទេសថៃ។
គួររំលឹកថា កាលពីថ្ងៃសុក្រ ស្ថានទូតអាមេរិកបានចេញផ្សាយនៅក្នុងវិបសៃតិ៍ ជូនដំណឹងដល់ជនជាតិអាមេរិកាំង នៅក្នុងប្រទេសថៃ ឲ្យប្រុងប្រយ័ត្នខ្លួន នៅពេលដើរទស្សនានៅកន្លែងទេសចរណ៍ដែលសម្បូរដោយជនបរទេស។ រដ្ឋមន្រ្តីការពារជាតិថៃវិញ បានចេញមុខថ្លែងថា ជនសង្ស័យគឺជាពួកអ៊ីស្លាមដែលជាសត្រូវរបស់អ៊ីស្រាអែល ដូច្នេះ ប្រជាជនថៃគ្មានអ្វីគួរឲ្យព្រួយបារម្ភទេ៕
តាមរដ្ឋមន្រ្តីការពារជាតិថៃ ការប្រកាសរបស់ស្ថានទូតអាមេរិកនឹងធ្វើឲ្យប្រជាជនភ័យជ្រួលច្របល់ និងអាចប៉ះពាល់ដល់វិស័យទេសចរណ៍របស់ប្រទេសថៃ។ នាយករដ្ឋមន្រ្តីថៃ លោកស្រី យីងឡាក់ ស៊ីណាវ៉ាតបានអំពាវនាវប្រជាជនថៃ ឲ្យនៅស្ងប់ស្ងាត់ កុំជ្រួលច្របល់ និងនិយាយធានាថា ពេលនេះអាជ្ញាធរបានគ្រប់គ្រងស្ថានភាពទាំងស្រុងបានហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ