គ្រោះអាសន្នរបស់សាលាក្តីខ្មែរក្រហមបានមកដល់?
ចុះផ្សាយនៅថ្ងៃ៖
ស្តាប់ - ០៤:២១
កង្វះថវិកាគឺជាបញ្ហាដ៏ធំធេងមួយដែលកំពុងគំរាមកំហែងសាលាក្តីកាត់ទោសអតីតមេដឹកនាំខ្មែរក្រហម។ ខែទី១នៃឆ្នាំ ២០១៣ បានកន្លងផុតទៅហើយ ប៉ុន្តែ បុគ្គលិកខ្មែរជិត ៣០០ នាក់ដែលបម្រើការឲ្យសាលាក្តីនេះនៅតែមិនទាន់បើកប្រាក់បៀរវត្សរ៍ខែធ្នូឆ្នាំ ២០១២ នៅឡើយ។ ធ្ងន់ធ្ងរជាងនេះ នៅមិនទាន់មានប្រទេសណាមួយបានសន្យាផ្តល់ថវិកាសម្រាប់គាំទ្រដំណើរការឆ្នាំ ២០១៣ នេះនៅឡើយទេ។ បញ្ហានេះបានធ្វើឲ្យបុគ្គលិកជនជាតិខ្មែរជ្រួលច្របល់ហើយគំរាមលាឈប់បើគ្មានដំណោះស្រាយ។ ប្រសិនបើដូច្នេះមែន គ្រោះអាសន្នរបស់សាលាក្តីខ្មែរក្រហមបានមកដល់យ៉ាងពិតប្រាកដហើយ។
បញ្ហាថវិការបស់សាលាក្តីខ្មែរក្រហមដែលកើតឡើងលើកនេះមានទំហំធំធេងគួរឲ្យព្រួយបារម្ភជាងពេលណាៗទាំងអស់។ ធំធេងដោយហេតុថា រហូតដល់ដើមខែកុម្ភៈទៅហើយនៅមិនទាន់មានប្រទេសម្ចាស់ជំនួយណាមួយបានសន្យាផ្តល់ថវិកាគាំទ្រដល់ភាគីកម្ពុជាដើម្បីបន្ត ការងារក្នុងឆ្នាំ ២០១៣ នៅឡើយទេ។
ស្ថានភាពនេះនឹងធ្វើឲ្យបញ្ហាថវិកាត្រូវអូសបន្លាយរយៈពេលយូរតទៅទៀតពីព្រោះការអនុម័តថវិកា រហូតដល់ការផ្ទេរសាច់ប្រាក់ចូលក្នុងគណនី សុទ្ធតែត្រូវការពេលវេលាយ៉ាងយូរ។ សូម្បីតែថវិកាដែលមានរួចហើយសម្រាប់ខែធ្នូឆ្នាំ ២០១២ ក៏មិនទាន់អាចប្រើប្រាស់បានផងដោយសារតែនីតិវិធីស្មុគស្មាញ។ ដោយមើលឃើញបញ្ហានេះហើយបានជាបុគ្គលិកខ្មែរក្នុងសាលាក្តីខ្មែរក្រហមបាននាំគ្នាជ្រួលច្របល់នឹងគំរាមមិនធ្វើការបើគ្មានប្រាក់ខែ។ ដោយយោង ទៅលើបញ្ហាសុខភាពជនជាប់ចោទ នេះជាពេលវេលាដែលសាលាក្តីត្រូវបញ្ចប់នីតិវិធីឲ្យបានលឿនបំផុតតាមដែលអាចធ្វើបាន គឺមិនមែនជាពេលដែលត្រូវអូសបន្លាយទេ។
ម្យ៉ាងទៀត បញ្ហាថវិកាហាក់ដូចជាមិនគួរនឹងកើតទាល់តែសោះក្នុងខណៈដែលសាលាក្តីកំពុងដំណើរការសំណុំរឿង ០០២ ដែលជាសំណុំរឿងសំខាន់ជាងគេក្នុងបេសកកម្មស្វែងរកយុត្តិធម៌របស់សាលាក្តីខ្មែរក្រហម។ ដូច្នេះ មានមូលហេតុពិតប្រាកដមួយចំនួនដែលគេអាចលើកមកពន្យល់បញ្ហានេះបាន។ វិបត្តិហិរញ្ញវត្ថុដែលប្រទេសម្ចាស់ជំនួយខ្លួនឯងកំពុងជួបប្រទះគឺជាមូលហេតុសំខាន់ជាងគេបំផុតមួយ។ ជាធម្មតាទេ នៅពេលដែលខ្លួនឯងកំពុងខ្វះខាត ការផ្តល់ជំនួយដល់អ្នកដទៃលែងជាអាទិភាពទៀតហើយ។
ក្រៅពីនោះ បញ្ហាប្រទាំងប្រទើសមួយចំនួននៅក្នុងសាលាក្តីខ្មែរក្រហមក៏ត្រូវគេមើលឃើញថា មានចំណែកធ្វើឲ្យអាក់សទ្ធារបស់ម្ចាស់ជំនួយផងដែរ។ ជាក់ស្តែង ការលាឈប់ពីតំណែងជាបន្តបន្ទាប់របស់ភាគីអន្តរជាតិក្នុងការិយាល័យសហចៅក្រមស៊ើបអង្កេត ក្រោមហេតុផលនៃការជ្រៀតជ្រែកផ្នែកនយោបាយរបស់រដ្ឋាភិបាលកម្ពុជាបានជះរូបភាពអវិជ្ជមានរបស់សាលាក្តីទៅលើឆាកអន្តរជាតិ បើទោះជាតិចឬច្រើនក្តី។
ម្យ៉ាងទៀត ការរារែកក្នុងការផ្តល់ថវិកាគាំទ្រដល់ភាគីកម្ពុជាក្នុងសាលាក្តីខ្មែរក្រហម ក៏អាចជាសម្ពាធមួយដែលប្រទេសម្ចាស់ជំនួយចង់ដាក់ទៅលើភាគីដែលបង្កើតសាលាក្តីក៏ថាបានដែរ។ ប៉ុន្តែ សម្ពាធនេះធ្លាក់ទៅលើភាគីសហប្រជាជាតិច្រើនជាងភាគីកម្ពុជា ពីព្រោះសូមកុំភ្លេចថា បរាជ័យរបស់សាលាក្តីខ្មែរក្រហមគឺជាបរាជ័យរបស់អង្គការសហប្រជាជាតិពីព្រោះរដ្ឋាភិបាលក្រុងភ្នំពេញនឹងនៅតែបន្តដំណើរការតុលាការនេះរហូតដល់ចប់តែម្នាក់ឯងដោយប្រើប្រាស់ប្រពន្ធ័តុលាការជាតិ។ នេះជាក្រឡាអុកដែលភាគីកម្ពុជាបានគ្រោងទុករួចជាស្រេចនៅក្នុងច្បាប់ស្តីពីការបង្កើតតុលាការខ្មែរក្រហម។
កន្លងទៅនេះ ប្រទេសម្ចាស់ជំនួយខ្លះបានរិះគន់អង្គការសហប្រជាជតិថាមានជំហរទន់ជ្រាយពេកនៅចំពោះមុខភាគីកម្ពុជានៅពេលមានវិវាទកើតឡើងនៅក្នុងសាលាក្តីម្តងៗ។ ដូច្នេះ ការរារែករឿងថវិការបស់សហគមន៍អន្តរជាតិខណៈដែលសំណុំរឿងសំខាន់កំពុងដំណើរការពិតជាមិនមែនគ្មានហេតុផលនោះឡើយ។ យ៉ាងណាក៏ដោយ សហគមន៍អន្តរជាតិក៏ដូចជាអង្គការសហប្រជាជាតិដែរទំនងជាមិនទុកឲ្យសាលាក្តីនេះបរាជ័យកណ្តាលទីដោយសារតែបញ្ហាថវិកាទេ។
ប៉ុន្តែ ការអូសបន្លាយពេលយូររឿងថវិកានឹងបង្កផលប៉ះពាល់ធ្ងន់ធ្ងរដល់ដំណើរការរបស់សាលាក្តី។ ប្រសិនបើបុគ្គលិកជាច្រើនលាឈប់ពីការងារមែន ដំណើរការតុលាការនឹងត្រូវជាប់គាំងជាមិនខាន។ ការជាប់គាំងក្នុងពេលដែលជនជាប់ចោទកំពុងមានបញ្ហាសុខភាពធ្ងន់ធ្ងរបែបនេះគឺជាល្បែងដ៏គ្រោះថ្នាក់មួយដែលមិនគួរនឹងលេងឡើយ។ ដូច្នេះ បញ្ហាថវិកាគួរតែត្រូវដោះស្រាយឲ្យបានលឿនបំផុត ប្រសិនបើមិនដូច្នេះទេ សាលាក្តីខ្មែរក្រហមពិតជាមិនអាចចៀសផុតពីគ្រោះអាសន្នបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ