កម្លាំងកងទ័ពរក្សាសន្តិភាពកម្ពុជាចេញដំណើរទៅប្រទេសលីបង់
កងរក្សាសន្តិភាពកម្ពុជាចំនួន ២១ នាក់ ដែលជាកម្លាំងនាំមុខបានចេញដំណើរពីប្រទេសកម្ពុជានៅរសៀលថ្ងៃនេះ ដើម្បីទៅបំពេញបេសកកម្មនៅប្រទេសលីបង់។ កម្លាំងនេះនឹងត្រូវចូលរួមបន្ថែមដោយកងរក្សាសន្តិសុខ និងដោះមីនខ្មែរ ២០០នាក់ផ្សេងទៀតនៅពាក់កណ្តាលខែវិច្ឆិកានេះ។ មន្ត្រីរដ្ឋាភិបាលកម្ពុជា បានថ្លែងថា បេសកកម្មដែលទទួលបាននៅប្រទេសលីបង់គឺកាន់តែបង្កើនកេរ្តិ៍ឈ្មោះកម្ពុជាលើឆាកអន្តរជាតិ ក្នុងកិច្ចការរក្សាសន្តិភាព និងការដោះមីន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នេត្រ ភក្ត្រា ពីទីក្រុងភ្នំពេញ
កម្លាំងកងទ័ពរក្សាសន្តិភាព និងដោះមីនកម្ពុជា ចំនួន ២១ នាក់ របស់អង្គការសហប្រជាជាតិបានចាកចេញពីប្រទេសកម្ពុជានៅរសៀលថ្ងៃចន្ទម្សិលមិញឆ្ពោះទៅកាន់ប្រទេសលីបង់។ ជាកម្លាំងនាំមុខ កងទ័ពមួកខៀវកម្ពុជានេះ មានភារកិច្ចក្នុងការរៀបចំបន្ទាយ និងទទួលសម្ភារៈ ដើម្បីប្រតិបត្តិការនៅលើទឹកដីនេះ។ ក្រុមមន្ត្រីបានឲ្យដឹងថា កម្លាំងធំចំនួន ២០០នាក់ផ្សេងទៀតនឹងត្រូវធ្វើដំណើរទៅប្រទេសលីបង់នៅថ្ងៃទី ១៧ ខែវិច្ឆិកាខាងមុខនេះ។ កម្លាំងទ័ពកម្ពុជាដែលនឹងបំពេញបេសកកម្ម មានក្រុមកងវិស្វកម្មកសាងផ្លូវថ្នល់ និងក្រុមដោះមីន។
លោក ប្រាក់ សុខុន រដ្ឋលេខាធិការទីស្តីការគណៈរដ្ឋមន្ត្រី និងជាប្រធានគណៈកម្មាធិការជាតិសម្របសម្រួលកិច្ចការងារបញ្ជូនកងកម្លាំងចូលរួមថែរក្សាសន្តិភាពរបស់អង្គការសហប្រជាជាតិ បានថ្លែងនៅចំពោះមុខក្រុមកងរក្សាសន្តិភាព នៅមុនការចាកចេញដំណើរថា បេសកកម្មនៅលីបង់ គឺកម្ពុជាទទួលបានមកដោយលំបាក ហើយបេសកកម្មនេះនឹងផ្តល់ផលចំណេញដល់ប្រទេសកម្ពុជា និងប្រជាពលរដ្ឋខ្មែរ។
លោកបានបញ្ជាក់ថា ៖ «កម្ពុជាមានកេរ្តិ៍ឈ្មោះក្នុងការថែរក្សាសន្តិភាព និងដោះមីននៅលើឆាកអន្តរជាតិ។ កម្ពុជាមិនមែនបញ្ជូនទ័ពទៅក្រៅប្រទេសដើម្បីធ្វើសង្គ្រាមឡើយ»។ លោក ប្រាក់ សុខុន បានបន្ថែមថា៖ «កម្លាំងដែលកម្ពុជាបញ្ជូនទៅក្នុងបេសកកម្មក្នុងក្របខ័ណ្ឌអង្គការសហប្រជាជាតិ គឺជាអ្នកមានសមត្ថភាព និងវិជ្ជាជីវៈខ្ពស់ និងជាតំណាងឲ្យកម្ពុជា និងប្រជាជនខ្មែរ»។
ជាមួយគ្នានេះដែរ លោក ប្រាក់ សុខុន ក៏បានថ្លែងឲ្យកងកម្លាំងថែរក្សាសន្តិភាពកម្ពុជាធ្វើការប្រុងប្រយ័ត្នជាមុនថា បេសកកម្មនៅលីបង់អាចមានការលំបាកជាងនៅប្រទេសស៊ូដង់ ដោយលោកពន្យល់ថា កម្លាំងថែរក្សាសន្តិភាពកម្ពុជាជាកម្លាំងទ្រនាប់ នៅចន្លោះកម្លាំងលីបង់ និងអ៊ីស្រាអែលដែលកំពុងតែមានជម្លោះនឹងគ្នា។
គួរបញ្ជាក់ថា ប្រទេសកម្ពុជាបានបញ្ជូនកង កម្លាំងថែរក្សាសន្តិភាពរបស់ខ្លួនទៅប្រទេសស៊ូដង់ជាច្រើនក្រុមមកហើយ និងទទួលបានជោគជ័យនៅក្នុងបេសកកម្ម មនុស្សធម៌នេះ។ លោក ប្រាក់ សុខុន បានគូសបញ្ជាក់ថា កងកម្លាំងដែលធ្វើបេសកកម្មមនុស្សធម៌នៅប្រទេសលីបង់ ត្រូវនាំមកនូវជ័យជំនះ និងកេរ្តិ៍ឈ្មោះល្អសម្រាប់ប្រទេសជាតិ និងប្រជាជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ