ថៃបានបញ្ចៀសអន្តរាគមន៍របស់អន្តរជាតិក្នុងជម្លោះព្រះវិហារ
ចុះផ្សាយនៅថ្ងៃ៖
ស្តាប់ - ០៤:១២
ទីបំផុតទៅ លោក បាន គីមូន អគ្គលេខាធិការអង្គការសហប្រជាជាតិមិនបានក្លាយជាអ្នកសម្របសម្រួល ជម្លោះព្រំដែនខ្មែរ និងថៃដូចការរំពឹងទុកឡើយ។ មុនចេញដំណើរពីកម្ពុជា លោកបានប្រកាសថា លោកមិនលូកដៃចូលក្នុងកិច្ចការផ្ទៃក្នុងរវាងប្រទេសទាំងពីរទេ ដោយលោកសង្ឃឹមថា កម្ពុជា និងថៃអាចដោះស្រាយបញ្ហាខ្លួនឯងបាន។ការនេះស បញ្ជាក់ឲ្យឃើញថា រដ្ឋាភិបាលក្រុងបាងកកបានទទួលជោគជ័យជាថ្មីទៀត ក្នុងការបញ្ចៀសកិច្ចអន្តរាគមន៍របស់អន្តរជាតិលើបញ្ហាខ្មែរ និងថៃ បើទោះបីជាមុននេះបន្តិច កម្ពុជាបានប្រកាសថា ការចរចាទ្វេភាគីអស់ប្រសិទ្ធិភាពហើយក៏ដោយ។
ពិតជាគ្មានឡើយតួនាទីរបស់សហគមន៍អន្តរជាតិក្នុងជម្លោះព្រំដែនខ្មែរ និងថៃ។
មុននេះបន្តិច មានការរំពឹងទុកថាលោក បាន គីមូន គឺជាអ្នកដើរតួនាទីក្នុងការសម្របសម្រួលបញ្ហាព្រំដែនខ្មែរនិងថៃ។ ប៉ុន្តែ ក្តីរំពឹងនេះបានរលាយបាត់ទៅវិញនៅពេលដែលមេដឹកនាំអង្គការសហប្រជាជាតិប្រកាសកាលពីថ្ងៃព្រហស្បតិ៍ថាលោកនឹងមិនលូកដៃចូលកិច្ចការផ្ទៃក្នុងរវាងកម្ពុជានិងថៃទេ។
តើហេតុអ្វីបានជាមានការប្រែប្រួលយ៉ាងដូច្នេះ? ដើម្បីស្វែងយល់បញ្ហានេះ គេគួរគប្បីពិនិត្យមើលសេណារីយោមួយចំនួនរបស់ក្រុងបាងកក៖
គេនៅចាំបានថា កាលពីខែសីហាកន្លងទៅ លោកនាយករដ្ឋមន្ត្រី ហ៊ុន សែន បានប្រកាសជាឱឡារឹកថា ដល់ពេលដែលកម្ពុជាត្រូវប្រើប្រាស់យន្តការអន្តរជាតិហើយ ក្នុងបញ្ហាព្រះវិហារ។ កម្ពុជាក៏បានស្នើឲ្យលោក បាន គីមូន ដើរតួនាទីជាអ្នកសម្របសម្រួលបញ្ហាខ្មែរ និងថៃ។ សេចក្តីស្នើនេះបានទទួលចម្លើយជាវិជ្ជមានពីលោកអគ្គលេខាធិការអង្គការសហប្រជាជាតិ។
ប៉ុន្តែ ទីក្រុងបាងកកដែលមិនចង់ឲ្យមានអន្តរាគមន៍ពីខាងក្រៅទាល់តែសោះនោះ ក៏ប្រញាប់ប្រញាល់រៀបចំយុទ្ធសាស្រ្តដើម្បីបង្វែរក្រសែភ្នែកសហគមន៍អន្តរជាតិ តាមរយៈការបង្ហាញរូបភាពធូរស្រាលក្នុងជម្លោះបញ្ហាព្រះវិហារ។ ជាបឋម ថៃបានបញ្ជូនឯកអគ្គរាជទូតរបស់ខ្លួនមកកម្ពុជាវិញក្នុងអំឡុងខែសីហាដដែល។ ព្រឹត្តិការណ៍នេះបានទាក់ទាញចំណាប់អារម្មណ៍របស់ពិភពលោកទាំងមូលឲ្យមានការស្ញប់ស្ញែង និងសាទរចំពោះដំណោះស្រាយទ្វេភាគីកម្ពុជាថៃ។
អ្វីដែលគួរឲ្យកត់សម្គាល់នោះគឺ ការតភ្ជាប់ទំនាក់ទំនងថ្នាក់ឯកអគ្គរាជទូតឡើងវិញរវាងកម្ពុជា និងថៃ បានកើតឡើង ក្រោយពីជំនួបរវាងលោកនាយករដ្ឋមន្ត្រី ហ៊ុន សែន ជាមួយលោក ស៊ូរិន ពិតស៊ូវ៉ាន អគ្គលេខាធិការអាស៊ាននៅភ្នំពេញ។ ក្រោយពីជំនួបនេះក៏មានការលាលែងរបស់លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃចេញពីតំណែងទីប្រឹក្សាសេដ្ឋកិច្ចរបស់រដ្ឋាភិបាលកម្ពុជា។
ជំហានទី២របស់ថៃគឺ នៅមុនដំណើរទស្សនកិច្ចរបស់លោក បាន គីមូន បន្តិច ក្រុងបាងកកសុខចិត្តដាក់ខ្លួនស្នើឲ្យមានជំនួបរវាងនាយករដ្ឋមន្ត្រីខ្មែរ និងថៃ នៅទីក្រុងញូវយ៉ក កាលពីថ្ងៃ២៤កញ្ញាក្នុងឱកាសជំនួបកំពូលអាស៊ាន និងអាមេរិក និងនៅទីក្រុងប៊្រុចសែល នៅដើមខែតុលាក្នុងឱកាសកិច្ចប្រជុំកំពូលអាស៊ីអឺរ៉ុប ព្រមទាំងបានបង្ហាញគំរោងជួបគ្នា ជាបន្តបន្ទាប់ទៀត រវាងលោកនាយករដ្ឋមន្ត្រីហ៊ុន សែន និងលោកអាភីស៊ីត វាចាជីវ៉ា ដូចជាជំនួប នៅទីក្រុងហាណូយ នៅថ្ងៃទី២៨តុលាថ្មីៗនេះជាដើម។
ជំនួបទាំងនោះ បើទោះបីជាគ្មានទទួលបានលទ្ធផលជាដុំកំភួនសោះ សម្រាប់ដោះស្រាយជម្លោះខ្មែរថៃក៏ដោយ ក៏វាជាលទ្ធផលដ៏អស្ចារ្យមួយសម្រាប់រដ្ឋាភិបាលក្រុងបាងកកក្នុងការបង្ហាញសហគមន៍អន្តរជាតិថា កម្ពុជា និងថៃអាចដោះស្រាយបញ្ហារបស់ខ្លួនបាន ដោយមិនចាំបាច់មានការលូកដៃពីខាងក្រៅ។ ទីបំផុត យុទ្ធសាស្ត្រនេះពិតជាទទួលបានជោគជ័យប្រាកដមែន។ គឺជោគជ័យក្នុងការបង្វែរចំណាប់អារម្មណ៍របស់លោក បាន គីមូន មិនឲ្យលូកដៃក្នុងជម្លោះបញ្ហាព្រះវិហារ។
ប៉ុន្តែ នៅលើភាពជាក់ស្តែងវិញ គ្មានឡើយដំណោះស្រាយសម្រាប់ការឈ្លានពានរបស់ថៃមកលើបូរណភាពទឹកដីខ្មែរ ពោលគឺកងទ័ពថៃនៅតែមានវត្តមាននៅក្បែរវត្តកែវសិក្ខាគីរីស្វារៈតែដដែល។ រីឯកិច្ចព្រមព្រៀងទាំងបីដែលរដ្ឋាភិបាលថៃសន្យាថា នឹងស្នើឲ្យសភាអនុម័ត នៅក្នុងអំឡុងខែតុលានេះក៏នៅតែមិនទាន់អនុម័តអ្វីទាំងអស់។ យ៉ាងណាក៏ដោយ ក្នុងជំនួបជាមួយលោក បាន គីមូន កាលពីថ្ងៃពុធ លោកនាយករដ្ឋមន្ត្រី ហ៊ុន សែន បានស្នើឲ្យអគ្គលេខាធិការអង្គការសហប្រជាជាតិជួយជំរុញរដ្ឋាភិបាលថៃឲ្យដកទ័ពចេញពីទឹកដីកម្ពុជា និងនៅតែរក្សាសិទ្ធិ ស្នើប្តឹងទៅអង្គការសហប្រជាជាតិក្នុងករណីដែលមានជម្លោះប្រដាប់អាវុធបានផ្ទុះឡើង នៅតាមជាយដែនខ្មែរ និងថៃ។
គេប្រហែលជាអាចនឹងយល់បានអំពីការអត់ធ្មត់របស់រដ្ឋាភិបាលកម្ពុជាក្នុងការរង់ចាំដំណោះស្រាយទ្វេភាគីជាមួយថៃ ប៉ុន្តែអ្វីដែលគេមិនអាចយល់បាននោះ គឺតើថៃពិតជាមានសុឆន្ទៈក្នុងការដោះស្រាយបញ្ហាជាមួយកម្ពុជា ឬមួយក៏ប្រទេសនេះគ្រាន់តែប្រើល្បិចដើម្បីអូសបន្លាយការឈ្លានពានរបស់ខ្លួន? នេះជាសំណួរដែលកម្ពុជាត្រូវពិចារណា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ