វ៉ាស៊ីនតោនមិនលក់យន្តហោះប្រដេញទៅឲ្យតៃវ៉ាន់ទេ !
នៅទីបំផុត សហរដ្ឋអាមេរិក បានសម្រេចចិត្តមិនលក់យន្តហោះប្រដេញប្រភេទ F-១៦ ដ៏ទំនើប ទៅឲ្យក្រុងតៃប៉ិទេ ប៉ុន្តែវ៉ាស៊ីនតោន នឹងធ្វើទំនើបកម្មគ្រឿងសព្វាវុធ យន្តហោះចាស់ៗទាំងប៉ុន្មាន ដែលតៃវ៉ាន់កំពុងប្រើប្រាស់បច្ចុប្បន្ន។ នេះបើតាមប្រភពព័ត៌មានពីសភាអាមេរិកនៅយប់មិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ពុំទាន់មានសេចក្តីប្រកាសជាផ្លូវការ នៅឡើយទេ ! ប៉ុន្តែបើយោងតាមប្រភពសភាអាមេរិកដែលសុំមិនបញ្ចេញឈ្មោះ ក្រសួងការបរទេសអាមេរិក ដែលទំនងជាបានជួបប្រជុំផ្តល់ព័ត៌មានដល់ក្រុមសភាអ្នកតំណាង នៅថ្ងៃសុក្រម្សិលមិញ បានអះអាងថា អាមេរិកនឹងជួយធ្វើទំនើបកម្មវិស័យយោធាឲ្យតៃវ៉ាន់ តែមិនមែនយល់ព្រមលក់យន្តហោះប្រដេញ ប្រភេទ F-១៦C/Dឡើយ។ ការធ្វើទំនើបកម្មយន្តហោះចម្បាំងតៃវ៉ាន់ ដែលមានតម្លៃប្រមាណ៤ពាន់ពីររយលានដុល្លារ គឺជាចំណែកមួយនៃកិច្ចព្រមព្រៀងរវាងរដ្ឋការលោក អូបាម៉ា និង តៃវ៉ាន់។
បើយោងតាមទស្សនាវដ្តី Defense News ចេញផ្សាយកាលពីថ្ងៃព្រហស្បតិ៍ អាមេរិកធ្លាប់បានព្រលយប្រាប់តៃវ៉ាន់ ឲ្យដឹងពីចេតនារបស់អាមេរិក មិនលក់យន្តហោះប្រដេញ នេះដែរ ប៉ុន្តែត្រូវបានអ្នកទទួលខុសត្រូវតៃវ៉ាន់ និងអាមេរិកច្រានចោល ដោយអះអាងថាពុំទាន់មានសេចក្តីសម្រេចចិត្តចុងក្រោយនៅឡើយទេ។
សូមបញ្ជាក់ថា ប្រឈមមុខនឹងការពង្រឹងពង្រីកមហិទ្ធិឫទ្ធិយោធាដ៏ខ្លាំងក្លា និងឥតឈប់ឈររបស់ចិន ក្រុងតៃប៉ិ បានស្នើសុំទិញពីសហរដ្ឋអាមេរិក យន្តហោះប្រដេញ ដែលមានបំពាក់ទៅដោយប្រព័ន្ធរ៉ាដា និងអាវុធដ៏ទំនើប ប្រភេទ F-១៦ ដល់ទៅ៦៦គ្រឿង តាំងពីឆ្នាំ២០០៧មក។
ប៉ុន្តែអាមេរិកហាក់មានការអល់អែកក្នុងការសម្រេចចិត្តលក់សព្វាវុធទៅតៃវ៉ាន់យ៉ាងខ្លាំង ព្រោះ ជានិច្ចកាល ចិនតែងព្រមាន និងគំរាមអាមេរិក ជាហេតុធ្វើឲ្យទំនាក់ទំនងចិន-អាមេរិកធ្លាក់ចុះដុនដាបយ៉ាងខ្លាំង។ ជាក់ស្តែងកាលពីដើមខែកញ្ញានេះ ក្រុងប៉េកាំងបានព្រមានថានឹងបញ្ចេញសកម្មភាព យ៉ាងរហ័ស និងស្វាហាប់ ខ្លាំង ខុសពីសព្វមួយដង ប្រសិនបើអាមេរិកនៅតែចចេសលក់យន្តហោះប្រដេញឲ្យតៃវ៉ាន់។
ក្រុងប៉េកាំង ចាត់ទុក តៃវ៉ាន់ជាខេត្តមួយរបស់ខ្លួនដែលរង់ចាំការចរចាបង្រួបបង្រួមចិនតែមួយ ហើយអាចប្រើកម្លាំងទ័ពវាយយកតៃវ៉ាន់ផង ប្រសិនបើចាំបាច់។ ចំណែកអាមេរិក ទោះបីជាខ្លួនបានភ្ជាប់ទំនាក់ទំនងការទូតជាមួយក្រុងប៉េកាំង តាំងពីទសវត្សឆ្នាំ៧០ និងទោះបីទទួលស្គាល់នយោបាយចិនតែមួយ ជាងតៃវ៉ាន់ក៏ដោយ ក៏ក្រុងវ៉ាស៊ីនតោនត្រូវតែជាអ្នកផ្គត់ផ្គង់អាវុធយុទ្ធភណ្ឌ និងជួយការពារតៃវ៉ាន់ យ៉ាងសកម្មជានិច្ច ព្រោះអាមេរិកមិនអាចបណ្តោយឲ្យចិនអភិវឌ្ឍវិស័យយោធាស្រេចតែនឹងចិត្ត ម្នាក់ឯងក្នុងតំបន់បានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ