អាមេរិកបង្ហាញស្ថានភាពសិទ្ធិមនុស្សនៅកម្ពុជាដែលអាក្រក់ច្រើន
ដូចរៀងរាល់ឆ្នាំ ក្រសួងការបរទេសអាមេរិកបានចេញរបាយការណ៍សិទ្ធិមនុស្សពិភពលោកឆ្នាំ២០១២នេះ ដែលនិយាយអំពីស្ថានភាពនៃការគោរពសិទ្ធិមនុស្សនៅតាមប្រទេសនីមួយៗក្នុងឆ្នាំ២០១១កន្លងទៅ។ សម្រាប់អាមេរិក ស្ថានភាពសិទ្ធិមនុស្សកម្ពុជានៅតែជាបញ្ហាធ្ងន់ធ្ងរ។ មន្ត្រីជាន់ខ្ពស់រដ្ឋាភិបាលកម្ពុជាទទួលបន្ទុកផ្នែកសិទ្ធិមនុស្សបានរិះគន់របាយការណ៍របស់អាមេរិកវិញថា មិនមានភាពគ្រប់ជ្រុងជ្រោយឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
ចំពោះបញ្ហាសិទ្ធិមនុស្សនៅកម្ពុជា របាយការណ៍ប្រចាំឆ្នាំរបស់ក្រសួងការបរទេសអាមេរិកបាននិយាយអំពី៧ចំនុចធំៗដូចជា ការគោរពសិទ្ធិបុគ្គល ការគោរពសេរីភាពបុគ្គល ការគោរពសិទ្ធិនយោបាយ អំពើពុករលួយរបស់មន្ត្រីនិងតម្លាភាពរបស់រដ្ឋាភិបាល អាកប្បកិរិយារបស់រដ្ឋាភិបាលចំពោះការងាររបស់សង្គមស៊ីវិល សិទ្ធិកម្មករ ការរើសអើង និងការជួញដូរមនុស្ស។
យោងតាមខ្លឹមសារនៃរបាយការណ៍ នៅក្នុងគ្រប់ផ្នែកដែលត្រូវបានរៀបរាប់ខាងលើមិនសូវជាមានចំណុចល្អនោះឡើយ។ នៅក្នុងសេចក្តីសង្ខេបដែលមាននៅផ្នែកខាងដើមនៃរបាយការណ៍ដែលត្រូវបានចេញផ្សាយជាសាធារណៈកាលពីថ្ងៃព្រហស្បតិ៍ម្សិលមិញ អ្នកសរសេររបាយការណ៍ បានផ្តោតទៅលើភាពទន់ខ្សោយនៃប្រព័ន្ធតុលាការនៅកម្ពុជា។ ភាពទន់ខ្សោយមិនអាចផ្តល់ការកាត់ក្តីដែលយុត្តិធម៌ ហើយវាបាននាំអោយប៉ះពាល់ដល់បញ្ហាសិទ្ធិមនុស្ស។
របាយការណ៍សរសេរបន្តថា តុលាការដែលខ្វះខាតធនធានមនុស្ស និងហិរញ្ញវត្ថុបានក្លាយជាប្រធានបទនៃការប្រព្រឹត្តិអំពើពុករលួយ និងការជ្រៀតជ្រែកផ្នែកនយោបាយ។
ក្រៅពីបញ្ហាតុលាការ របាយការណ៍ដដែលបានលើកឡើងអំពីការសម្លាប់មនុស្សក្រៅប្រព័ន្ធច្បាប់ពីសំណាក់សមត្ថកិច្ចទៀតផង។ របាយការណ៍បានបង្ហាញករណីជាក់ស្តែងជាអំណះអំណាងផងដែរ។
យោងតាមរបាយការណ៍នេះ សិទ្ធិអ្នកជាប់ឃុំនៅក្នុងពន្ធនាគារ សេរីភាពនៃការជួបប្រជុំ ការជួញដូរស្រ្តីនិងកុមារ អំពើពុករលួយ និងសេរីភាពនៃការបញ្ចេញមតិ ទាំងនេះសុទ្ធតែនៅមានបញ្ហាទាំងអស់។
លោកទេសរដ្ឋមន្ត្រី ឱម យិនទៀង ប្រធានគណៈកម្មាធិការសិទ្ធិមនុស្សរបស់រដ្ឋាភិបាលកម្ពុជាថ្លែងថាលោកនៅមិនទាន់បានឃើញរបាយការណ៍នោះនៅឡើយទេ។ ប៉ុន្តែថា ប្រសិនបើរបាយការណ៍នោះសរសេរដូចការរៀបរាប់ខាងលើមែន របាយការណ៍នេះមិនមានលក្ខណៈពេញលេញគ្រប់ជ្រុងជ្រោយនោះឡើយ។ លោកទេសរដ្ឋមន្ត្រីបានចោទជាសំណួរថា តើរបាយការណ៍នេះត្រូវធ្វើឡើងដើម្បីលើកស្ទួយសិទ្ធិមនុស្សនៅកម្ពុជាពិតប្រាកដ ឬក៏គ្រាន់តែដើម្បីក្រសួងការបរទេសអាមេរិកខ្លួនឯងទេ? បើតាមលោកឱម យិនទៀង រដ្ឋាភិបាលកំពុងខិតខំពង្រីកប្រជាធិបតេយ្យនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ