បេសកជនអង្គការយូណេស្កូមិនទៅពិនិត្យការខូចខាតប្រាសាទព្រះវិហារដោយផ្ទាល់ទេ
បេសកជនរបស់អង្គការ យូណេស្កូដែលគ្រោងមកដល់កម្ពុជា ថ្ងៃអាទិត្យស្អែកនេះ មិនធ្វើដំណើរទៅពិនិត្យការខូចខាតប្រាសាទព្រះវិហារដោយផ្ទាល់ ដូចព័ត៌មានពីដំបូងទេ។ បន្ទាប់ពីជំនួប ជាមួយនាយករដ្ឋមន្រ្តី រដ្ឋមន្រ្តីការបរទេសថៃ តំណាងយូណេស្កូលោក Koichiro Matsuura នឹងជួបនាយករដ្ឋមន្រ្តី មន្រ្តីការទូត ខាងកម្ពុជាដូចថៃដែរ។ លទ្ធផលដំណើរទស្សនកិច្ច ក្នុងប្រទេសថៃ របស់បេសកជនយូណេស្កូ ត្រូវកាសែតប្រទេសថៃផ្សាយ នៅថ្ងៃសៅរ៍នេះថា តំណាងយូណេស្កូ ថា នឹងពិនិត្យ លើសំណើអភិវឌ្ឈន៏ ប្រាសាទព្រះវិហារ របស់កម្ពុជា កាលពីឆ្នាំ២០១០ឡើងវិញ ប្រសិនសភាពការណ៏ព្រំដែននៅតានតឹង តែកម្ពុជាចាត់ទុកសម្តីនោះជាការកុហករបស់ថៃ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់អ៊ឹម ណាវិនពីទីក្រុងភ្នំពេញ
ទោះបីជាស្ថិតនៅក្នុងបេសកកម្មការពារ និងអភិរក្ស ប្រាសាទចំណាស់របស់ខ្មែរ ដែលបានរងក្នុងការបាញ់គ្នារវាងកងទ័ពកម្ពុជា និងថៃ ក៏ដោយ ក៏ក្នុងដំណើរទស្សនកិច្ច របស់ខ្លួន លោក Koichiro Matsuura បេសកជនរបស់អង្គការ យូណេស្កូ នឹងមិនទៅដល់តំបន់ប្រាសាទព្រះវិហារ ដើម្បីពិនិត្យការខូចខាច សម្បត្តិបេតិកភណ្ឌពិភពលោក ដោយផ្ទាល់នោះដែរ។
លោក ផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្រ្តី បានអោយដឹងថា លោក Koichiro Matsuura មិនមានគម្រោងទៅ ពិនិត្យការខូចខាត ប្រាសាទព្រះវិហារ ដល់ សមរភូមិមុខនោះទេ។ លោកផៃ ស៊ីផាន បន្ថែមថា គោលបំណងនៃដំណើរទស្សនកិច្ចរបស់ តំណាងយូណេស្កូ គឺ ដើម្បីគ្រាន់តែស្តាប់ពីស្ថានភាពតានតឹង នៅតំបន់ប្រាសាទព្រះវិហារ ហើយយូណេស្កូ ចង់អោយកម្ពុជា ថៃ គោរពការឈប់បាញ់គ្នា ដើម្បីការពារ និងអភិរក្សសម្បត្តិវប្បធម៌មនុស្សជាតិ គឺប្រាសាទព្រះវិហារ ដែលមិនអាចកាត់ថ្លៃបាន។
ទោះយ៉ាងណា លោក រដ្ឋលេខាធិការបានបញ្ជាក់ថា កម្ពុជាបានបញ្ជូនភស្តុតាង និងឯកសារ ពីការខូចខាតប្រាសាទព្រះវិហារ ដោយគ្រាប់កំាភ្លើងថៃ អោយទៅយូណេស្កូរួចហើយដែរ។ បេសកជនរបស់យូណេស្កូ លោក Koichiro Matsuura នឹងមកដល់កម្ពុជា នៅថ្ងៃអាទិត្យទី ២៧ កុម្ភៈនេះ បន្ទាប់ពី លោកបានជួប ប្រមុខដឹកនាំ ប្រមុខការទូតរបស់ថៃ កាលពីថ្ងៃសុក្រ និងថ្ងៃសៅរ៏ នេះ នៅក្នុងទីក្រុងបាងកក។ នៅកម្ពុជា បេសកជនយូណេស្កូគ្រោងជួបជាមួយនាយករដ្ឋមន្រ្តី ហ៊ុន សែន លោកសុខ អាន ឧបនាយករដ្នមន្រ្តី និងអាជ្ញាធរព្រះវិហារ។
ថ្ងៃសៅរ៍នេះ កាសែតបាងកកប៉ុស្តិ៍ របស់ថៃបានដកស្រង់សម្តីមន្រ្តីអ្នកនាំពាក្យ ក្រសួងការបរទេសថៃ ដែលនិយាយអំពីលទ្ឋផល នៃដំណើរទស្សនកិច្ច របស់លោក Koichiro Matsuura ក្នុងប្រទេសថៃថា នៅក្នុងជំនួបជាមួយ នាយករដ្ឋមន្រ្តី និងរដ្ឋមន្រ្តី ការបរទេសថៃ តំណាងអង្គការយូណេស្កូ បានលើកឡើងថា ដរាបណាស្ថានភាពព្រំដែនក្បែរប្រាសាទ ព្រះវិហារមិនទាន់ធូរស្រាល យូណេស្កូ នឹងពិនិត្យសំណើគម្រោងអភិវឌ្ឍន៍ប្រាសាទព្រះវិហារ របស់កម្ពុជាឡើងវិញ នៅក្នុងកិច្ចប្រជុំលើកទី ៣៥ របស់យូណេស្កូក្នុងខែកក្តដាខាងមុខនេះ។
គម្រោងអភិវឌ្ឍន៏ប្រាសាទ ព្រះវិហារស្នើដោយកម្ពុជា កាលពីឆ្នាំ២០១០ នៅក្នុងកិច្ចប្រជុំលើកទី៣៤ របស់យូណេស្កូ ក្នុងប្រទេសប្រេស៊ីល ត្រូវបានយូណេស្កូទទួលយក និងស្វាគមរួចហើយ។ លោកផៃ ស៊ីផាន ចាត់ទុកការលើកឡើង របស់ភាគីថៃប្រាប់បេសកជន យូណេស្កូ ថា ជាការបំផ្លើស។ លោកថា យូណេស្កូ គ្មានអាណត្តិ កំណត់ការសម្រេចរបស់ខ្លួននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ