ហាណូយ និងប៉េកាំងព្រមព្រៀងគ្នាដោះស្រាយវិបត្តិព្រំដែន
វៀតណាមនិងចិន កំពុងតែបោះជំហានទៅមុខរួមគ្នាក្នុងការដោះស្រាយជម្លោះព្រំដែន ដណ្តើមប្រជុំកោះប៉ារ៉ាសែល (Paracels) និងស្ព្រាតលី (Spratley)សមុទ្ទចិនខាងត្បូង។ ប្រទេសទាំងពីរ នឹងចុះហត្ថលេខា លើកិច្ចព្រមព្រៀង ជាមូលដ្ឋានមួយ ក្នុងពេលឆាប់ៗខាងមុខនេះ។ នេះបើតាមការគូសបញ្ជាក់របស់អ្នកនាំពាក្យក្រសួងការបរទេសវៀតណាម នៅល្ងាចថ្ងៃព្រហស្បតិ៍ទី២១មេសា២០១១។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
ក្នុងឱកាសដែលអនុរដ្ឋមន្ត្រីការបរទេសចិនអញ្ជើញមកបំពេញទស្សនកិច្ចនៅក្រុងហាណូយ និងក្រោយពីបានជួបសន្ទនាជាមួយនឹងនាយករដ្ឋមន្ត្រីវៀតណាម នាសប្តាហ៍នេះ ភាគីចិននិងវៀតណាម បានរកឃើញការយល់ព្រមព្រៀងគ្នា ឈានឆ្ពោះដល់ការចុះហត្ថលេខាលើកិច្ចព្រមព្រៀង ដោះស្រាយជម្លោះព្រំដែនសមុទ្ទរួមគ្នា។
កិច្ចព្រមព្រៀងជាមូលដ្ឋាន ដែលកំពុងពិភាក្សា និងដែលកំណត់អំពីគោលការណ៍សំខាន់ៗ សម្រាប់ដោះស្រាយជម្លោះព្រំដែន នឹងត្រូវយកមកអនុវត្តដោយជាក់ស្តែង ស្របទៅតាមសន្ធិសញ្ញារបស់អង្គការសហប្រជាជាតិ។ ពិធីចុះហត្ថលេខានឹងប្រព្រឹត្តទៅនៅក្នុងពេលឆាប់ៗខាងមុខនេះ។ នេះបើតាមការពន្យល់អះអាងរបស់អ្នកនាំពាក្យក្រសួងការបរទេសវៀតណាម ង្វៀន ភួង ង៉ា ទៅកាន់អ្នកសារព័ត៌មាន។
សូមបញ្ជាក់ថា ជម្លោះព្រំដែនរវាងចិននិងវៀតណាម បានអូសបន្លាយជាយូរមកហើយ ព្រោះតែម្នាក់ៗដណ្តើមចង់បានប្រជុំកោះ ប៉ារ៉ាសែល និង ស្ព្រាតលី ក្នុងសមុទ្ទចិនខាងត្បូង ឲ្យមកស្ថិតនៅក្រោមអធិបតេយ្យរបស់ខ្លួន រៀងៗខ្លួន។ ប្រទេសហ្វីលីពីន ព្រុយណេ ម៉ាឡេស៊ី និងតែវ៉ាន់ ក៏បានទាមទារគ្រប់គ្រងប្រជុំកោះស្ព្រាតលីដែរ។
ជានិច្ចកាលប្រទេសចិន តែងតែបង្ហាញពីមហិច្ឆតាពង្រីងដែនដីរបស់ខ្លួន ជាហេតុបង្កបង្កើតឲ្យមានភាពតានតឹងយ៉ាងខ្លាំងជាមួយបណ្តាប្រទេសក្នុងភូមិភាគ និងរហូតដល់ជាមួយសហរដ្ឋអាមេរិកទៀត។
ចំណែកសមាគមប្រជាជាតិអាស៊ីអាគ្នេយ៍ ហៅកាត់ថាអាស៊ានវិញ ដែលមានប្រទេសវៀតណាមជាសមាជិកម្នាក់ ប្រាថ្នាចង់បង្កើតឲ្យយន្តការតំបន់មួយក្នុងករណីមានជម្លោះព្រំដែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ