ទស្សនកិច្ចជាប្រវតិ្តសាស្ត្ររបស់ប្រធានាធិបតីអាគីណូនៅតំបន់អ៊ីស្លាមភាគខាងត្បូងហ្វីលីពីន
នៅប្រទេសហ្វីលីពីន នៅថ្ងៃចន្ទនេះ ប្រធានាធិបតី Benigno Aquino បានធ្វើទស្សនកិច្ចជាប្រវត្តិសាស្ត្រមួយ នៅតំបន់អ៊ីស្លាមភាគត្បូងប្រទេស ហើយបានអំពាវនាវអោយក្រុមឧទ្ទាមអ៊ីស្លាម ចូលរួមសំរេចអោយបានឆាប់រហ័ស នូវដំណើរការស្វែងរកសន្តិភាពក្នុងប្រទេស។ នេះជាលើកទីមួយហើយ តាំងពីទស្សវត្សរ៍ឆ្នាំ៧០មក ដែលមេដឹកនាំប្រទេស ឈានជើងទៅកាន់តំបន់ភាគខាងត្បូងប្រទេសហ្វីលីពីន។ មុននឹងចប់អណត្តិដឹកនាំរបស់ខ្លួននៅឆ្នាំ ២០១៦ លោក អាគីណូ ចង់សំរេចអោយបាននូវកិច្ចព្រមព្រៀងសន្តិភាពមួយ ជាស្ថាពរ។
ចុះផ្សាយនៅថ្ងៃ៖
ស្តាប់ - ០១:៥៥
“ពេលវេលានៅសល់សំរាប់យើង មានតែបីឆ្នាំនិងបួនខែទៀតប៉ុណ្ណោះ។ យើងត្រូវធ្វើការសំរេចដំណើរការអោយបានឆាប់រហ័ស ដើម្បីអោយដំណើរការនេះស្ថិតនៅជាអចិន្ត្រៃយ៍។”
នេះជាការប្រកាសរបស់ប្រធានាធិបតី ហ្វីលីពីន នៅថ្ងៃចន្ទនេះ ទាក់ទងនឹងដំណើរការនៃកិច្ចចរចារសន្តិភាពក្នុងប្រទេស រវាងក្រុមឧទ្ទាមនិងរដ្ឋាភិបាល។
ប្រធានាធិបតី អាគីណូ បានធ្វើទស្សនកិច្ចទៅកាន់តំបន់ភាគខាងត្បូងប្រទេស ដើម្បីបង្ហាញកម្មវិធីសង្គម ដល់ជនជាតិអ៊ីស្លាមក្នុងបណ្តាភូមិនានា ដែលមានទីតាំងនៅក្នុងតំបន់ពួកឧទ្ទាម។ ទស្សនកិច្ចរបស់លោក អាគីណូ គឺជាទស្សនកិច្ចប្រវត្តិសាស្ត្រសំរាប់តំបន់អ៊ីស្លាមភាគខាងត្បូង ព្រោះថានេះជាលើកទីមួយហើយ តាំងពីទស្សវត្សរ៍ឆ្នាំ៧០មក ដែលមេដឹកនាំប្រទេសបានចុះទៅក្នុងតំបន់នេះ។
ក្នុងកិច្ចចរចាស្វែងរកសន្តិភាពកន្លងមក ក្រុមឧទ្ទាមអ៊ីស្លាម ដែលមានឈ្មោះថា “រណសិរ្សរំដោះនៃជនជាតិអ៊ីស្លាមនៅហ្វីលីពីន” ធ្លាប់បានចុះហត្ថលេខាលើកតិកាសញ្ញាមួយជាមួយរដ្ឋាភិបាល។ កតិកាសញ្ញានេះចែងពីដំណាក់កាលនីមួយៗ នៃវិធានការដែលនឹងត្រូវប្រើ ដើម្បីបញ្ចប់អំពើហិង្សាបះបោរ ដែលមានជាច្រើនទស្សវត្សរ៍កន្លងមកនេះ។
ចាប់ពីពេលនេះ រហូតដល់ឆ្នាំ ២០១៦ មុននឹងអណត្តិគ្រប់គ្រងរបស់ប្រធានាធិបតី អាគីណូ ត្រូវបញ្ចប់ រដ្ឋាភិបាលនិងក្រុមឧទ្ទាមអ៊ីស្លាមត្រូវតែសំរេចអោយបាននូវកិច្ចព្រមព្រៀងសន្តិភាពមួយជាស្ថាពរ។ លោក អាគីណូ ចង់អោយមានការចុះហត្ថលេខាលើកិច្ចព្រមព្រៀងសន្តិភាពនេះក្នុងអណត្តិរបស់លោក ហើយប្រធានាធិបតីដែលបន្តតំណែងពីលោក មិនត្រូវរុះរើ កែប្រែកិច្ចព្រមព្រៀងនេះឡើយ។
អំពើហិង្សាបះបោរនៅហ្វីលីពីន ក្នុងរយៈពេលច្រើនទស្សវត្សរ៍កន្លងមក បានបង្កអោយស្លាប់មនុស្សប្រហែលជាមួយសែនប្រាំម៉ឺននាក់ និងជាងមួយសែននាក់ទៀតភៀសខ្លួន។
យោងតាមកតិកាសញ្ញា ក្រុមឧទ្ទាមអ៊ីស្លាមសុខចិត្តបោះបង់ចោលនូវឯករាជ្យភាពតំបន់ភាគខាងត្បូង តែត្រូវអោយមានការបង្កើតតំបន់អ៊ីស្លាមពាក់កណ្តាលស្វ័យយតមួយ នៅមួយភាគនៃកោះ Mindano ដែលស្ថិតនៅភាគខាងត្បូងហ្វីលីពីន។ តំបន់ពាក់កណ្តាលស្វ័យយតនេះ ប្រហែលជានឹងត្រូវគេដាក់ឈ្មោះអោយថា Bangsamoro៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ