ប្រធានាធិបតីចិនទស្សនកិច្ចស្ថាប័នសហភាពអឺរ៉ុបក្រុងព្រុចសែល
តាំងពីថ្ងៃអាទិត្យ៣០មីនា រហូតដល់ថ្ងៃអង្គារនេះ ប្រធានាធិបតីចិន ស៊ី ជីនពីងបានបំពេញទស្សនកិច្ចនៅក្រុងព្រុចសែល ប្រទេសបែលហ្ស៊ិក។ ឆ្លៀតឱកាសនេះ នៅថ្ងៃអង្គារនេះ លោកស៊ី ជីនពីង ឆ្លៀតចូលទៅជួបអ្នកទទួលខុសត្រូវស្ថាប័នអឺរ៉ុប ជាច្រើនរូប ហើយក៏ជួបជាមួយប្រធានក្រុមប្រឹក្សាអឺរ៉ុបគឺលោក អ៊ែរម៉ាន់ វ៉ាន់ រុំពុយ ផងដែរ។ សហភាពអឺរ៉ុបគឺជាដៃគូពាណិជ្ជកម្មទី១របស់ចិន។ ប្រធានាធិបតីចិននឹងថ្លែងសន្ទរកថា នៅថ្ងៃអង្គារនេះ ស្តីពីទំនាក់ទំនងរវាងចិន និងសហភាពអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
នៅថ្ងៃអង្គារ១មេសានេះ ប្រធានាធិបតីចិនត្រូវបញ្ចប់ដំណើរទស្សនកិច្ចរបស់លោក នៅទ្វីបអឺរ៉ុប ដោយធ្វើចូលទៅទស្សនា ក្រុងព្រុចសែល ប្រទេសបែលហ្ស៊ិក។ នៅថ្ងៃចន្ទនេះ លោកស៊ី ជីនពីង បានឆ្លៀតឱកាសចូលទៅស្ថាប័នអឺរ៉ុបជាច្រើនកន្លែង នៅព្រុចសែល ដើម្បីជួបថ្នាក់ដឹកនាំស្ថាប័នទាំងនេះ ក្នុងនោះមានប្រធានក្រុមប្រឹក្សាអឺរ៉ុប លោក អ៊ែរម៉ាន់ វ៉ាន់ រុំពុយ និងប្រធានគណៈកម្មការអឺរ៉ុបគឺលោក លោកហ្សូសេ ម៉ានុយអ៊ែល បារ៉ូសូផងដែរ។
ទស្សនកិច្ចរបស់ប្រធានាធិបតីចិន ធ្វើឡើងក្រោយទស្សនកិច្ចប្រធានាធិបតីអាមេរិក អូបាម៉ា ដែលទើបបានចុះទៅព្រុចសៃល កាលពីថ្ងៃ២៦មីនា កន្លងទៅប៉ុណ្ណោះ។ ទស្សនកិច្ចរបស់លោកស៊ី ជីនពីង សបង្ហាញពីសារៈសំខាន់នៃទំនាក់ទំនងរវាងសហភាពអឺរ៉ុបនិងចិន។ គួរបញ្ជាក់ថា សហភាពអឺរ៉ុបគឺជាដៃគូពាណិជ្ជកម្មទី១របស់ចិន។ គិត១០ឆ្នាំមកនេះ ការផ្តោះប្តូរពាណិជ្ជកម្មចិន-អឺរ៉ុប គិតជាទឹកប្រាក់ គឺមាន៤២៨ពាន់លានអឺរ៉ូ ពោលគឺកើនឡើងស្ទើរតែស្មើ ១គុណនឹង៣ទៅហើយ។
កាលពីអំឡុងដើមឆ្នាំ២០១៣មុននេះ ទំនាក់ទំនងរវាងភាគីទាំង២ ស្ថិតក្នុងភាពតានតឹងជាខ្លាំង ដោយសារសហភាពអឺរ៉ុប បានសម្រេចដំឡើងពន្ធបន្ថែមលើផលិតផលផ្ទាំងកញ្ចក់ស្រូបកំដៅព្រះអាទិត្យរបស់ចិន ដែលនាំចូលមកអឺរ៉ុប។ មូលហេតុនៃការដំឡើងពន្ធបន្ថែមនេះ ដោយសារតែផលិតផលទាំងនេះ ត្រូវបានចិនលក់ក្នុងតម្លៃថោកជ្រុល ធ្វើអោយខូចតម្លៃទីផ្សារ ធ្វើអោយរោងចក្រផលិតផ្ទាំងកញ្ចក់ស្រូបកំដៅថ្ងៃនៅអឺរ៉ុប ជាច្រើនត្រូវបិទទ្វារ។ ជាការសងសឹកនឹងអឺរ៉ុប ចិនក៏បានសម្រេចស៊ើបអង្កេតលើស្រាអឺរ៉ុបដែលនាំចូលមកលក់នៅចិនដូចគ្នាដែរ ដើម្បីរកមើលថា តើបណ្តាប្រទេសអឺរ៉ុបមានបញ្ចុះបង្ខូចតម្លៃស្រាដែររឺទេ។ ជាការសងសឹកបន្តទៅនឹងវិធានការរបស់ក្រុងប៉េកាំង សហភាពអឺរ៉ុប បានសម្រេចស៊ើបអង្កេតលើការលក់បង្ខូចតម្លៃសេវាទូរសព្ទរបស់ក្រុមហ៊ុនចិន។ ប៉ុន្តែ ក្រោយមក សហភាពអឺរ៉ុបបានសម្រេចបោះបង់ចោលនូវការស៊ើបអង្កេតនេះវិញ ធ្វើអោយទំនាក់ទំនងរវាងចិននិងអឺរ៉ុបបានធូរស្រាលឡើងវិញ។
ទោះយ៉ាងនេះក្តី រដ្ឋាភិបាលក្រុងប៉េកាំងនៅមានការទាមទារផ្សេងទៀត គឺចង់អោយអឺរ៉ុបលុបចោលនូវទណ្ឌកម្មផ្នែកអាវុធ ដែលអឺរ៉ុបបានដាក់ប្រឆាំងនឹងការដែលអាជ្ញាធរចិនបានបង្ក្រាបបាតុកម្មនៅទីលានធានអានមេន កាលពីឆ្នាំ១៩៨៩នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ