អវត្តមានលោកសម រង្ស៊ីជាវិញ្ញាសាសាកល្បងពីភាពរឹងមាំរបស់គណបក្សសង្គ្រោះជាតិ
ចុះផ្សាយនៅថ្ងៃ៖
ស្តាប់ - ០៤:២០
ក្រោយពីបញ្ជីឈ្មោះបេក្ខជនតំណាងរាស្ត្រគណបក្សសង្គ្រោះជាតិត្រូវបាន គ.ជ.ប ប្រកាសទទួលស្គាល់ជាផ្លូវការរួចមក គ្មានអ្វីជាអាថ៌កំបាំងទៀតឡើយសម្រាប់ជីវិតនយោបាយរបស់លោកសម រង្ស៊ី។ មេដឹកនាំបក្សប្រឆាំងនៅកម្ពុជាដែលលេចធ្លោជាងគេរូបនេះគ្មានឈ្មោះនៅក្នុងបញ្ជីបេក្ខជនតំណាងរាស្ត្រទេ។ មានន័យថា ក្នុងរយៈពេល៥ឆ្នាំខាងមុខ លោក សម រង្ស៊ី មិនអាចក្លាយជាតំណាងរាស្ត្របានឡើយ។ អវត្តមានទាំងរូបកាយនិងទាំងតួនាទីសំខាន់ក្នុងឆាកនយោបាយរបស់លោកសម រង្ស៊ីគឺជាវិញ្ញាសាសាកល្បងមួយពីភាពរឹងមាំរបស់គណបក្សសង្គ្រោះជាតិ។
ទីបំផុតទៅ មិនត្រឹមតែមិនអាចវិលត្រឡប់ចូលស្រុកបានប៉ុណ្ណោះទេ តែលោកសម រង្ស៊ីក៏ត្រូវបាត់បង់តួនាទីសំខាន់ក្នុងឆាកនយោបាយទៀតផង ពីព្រោះតែលោកគ្មានឈ្មោះជាបេក្ខជនតំណាងរាស្ត្រទេ។ អវត្តមានទាំងរូបកាយនិងទាំងតួនាទីជាតំណាងរាស្ត្ររបស់លោក សម រង្ស៊ី គឺជាចំណោទដ៏ធំមួយរបស់គណបក្សសង្គ្រោះជាតិ។
គេពិតជានៅចាំបានថា គណបក្សសង្គ្រោះជាតិបានចាប់កំណើតឡើងក្នុងស្ថានភាពចាប់បង្ខំច្រើនជាងឆន្ទៈពិតប្រាកដរបស់គណបក្សគណបក្សសម រង្ស៊ី និងគណបក្សសិទ្ធិមនុស្ស។ ទម្រាំតែអាចបង្រួបបង្រួមគ្នាបាន គណបក្សប្រឆាំងទាំងពីរបានហែលឆ្លងកាត់ដំណាក់កាលដ៏ជូរចត់ជាច្រើនក្នុងបរិបទនៃការមិនទុកចិត្តគ្នា។ យ៉ាងណាក៏ដោយចុះ វត្តមានគណបក្សសង្គ្រោះជាតិក្នុងកាលៈទេសៈនេះបានផ្តល់ក្តីសង្ឃឹមយ៉ាងខ្លាំងដល់អ្នកគាំទ្រគណបក្សប្រឆាំង ក៏ដូចជាអ្នកដែលចង់ឃើញតុល្យភាពអំណាចនៅក្នុងរដ្ឋសភាដែរ។
ប៉ុន្តែ ទោះបីជាកកើតចេញជារូបរាងហើយក៏ដោយ ក៏គណបក្សសង្គ្រោះជាតិនៅតែប្រឈមមុខនឹងបញ្ហាធំៗជាច្រើនទៀត។ បញ្ហាសំខាន់ជាងគេ គឺលោកសម រង្ស៊ី ដែលជាតួអង្គសំខាន់ និងដ៏មានសក្តានុពលរបស់គណបក្សប្រឆាំងបានអវត្តមានពីទីលានប្រកួត។ ការបាត់បង់ឱកាសប្រកួតរបស់លោកសម រង្ស៊ី ជារឿងមួយ ប៉ុន្តែ រឿងដែលសំខាន់ជាងនេះទៅទៀតនោះគឺ អវត្តមានលោកសម រង្ស៊ី បានដាក់គណបក្សសង្គ្រោះជាតិឲ្យស្ថិតក្នុងស្ថានភាពដ៏ផុយស្រួយ។
បញ្ហាហាក់មិនពិបាកយល់ទេ! គ្រួសារមួយដែលមិនសូវចុះសម្រុងគ្នាទាមទារឲ្យមានឪពុកម្តាយស្ថិតនៅឃុំគ្រងយ៉ាងដិតដល់។ យ៉ាងណាមិញ គណបក្សមួយក៏ដូចជាប្រទេសមួយដែរ ពេលមានបញ្ហាមិនស្រួល ឬពេលស្ថិតក្នុងកាលៈទេសៈពិសេសណាមួយ ទាមទារឲ្យមានវត្តមានរបស់មេដឹកនាំជាដាច់ខាត ។ ក្នុងន័យនេះ គណបក្សសង្គ្រោះជាតិដែលទើបតែកើតចេញជារូបរាងថ្មីថ្មោងក្នុងស្ថានភាពបង្រួបបង្រួមដ៏រសើប និងជាពិសេសក្នុងដំណាក់កាលត្រៀមខ្លួនប្រកួតដ៏ស្រួចស្រាល់បែបនេះ អវត្តមានរបស់លោក សម រង្ស៊ី គឺជាហានិភ័យយ៉ាងធំមួយសម្រាប់គណបក្សប្រឆាំងយ៉ាងពិតប្រាកដ។
ទំនងជាមើលឃើញពីហានិភ័យនេះហើយបានជាគណបក្សកាន់អំណាចបង្កើនការវាយប្រហាររបស់ខ្លួន តាមរយៈសង្គ្រាមចិត្តសាស្ត្រយ៉ាងខ្លាំងក្លា ទៅលើគណបក្សសង្គ្រោះជាតិ។ ជាក់ស្តែង បក្សកាន់អំណាចបានបើកកកាយជម្លោះពីអតីតកាល រវាងគណបក្សសម រង្ស៊ី និងគណបក្សសិទ្ធិមនុស្ស ជុំវិញការបង្រួបបង្រួម ដែលជាចំណុចរសើបរបស់បក្សប្រឆាំង។ ទន្ទឹមនឹងនោះ អតីតមន្ត្រីបក្សប្រឆាំងដែលបានផ្តាច់ខ្លួនចូលជាមួយបក្សកាន់អំណាចក្នុងនោះក៏មានប្អូនបង្កើតរបស់លោក កឹម សុខា ផង ក៏បានចេញមុខមកបរិហារនយោបាយរបស់គណបក្សសង្គ្រោះជាតិយ៉ាងកងរំពង។
រីឯបណ្តាញផ្សព្វផ្សាយព័ត៌មានដែលមានសមានចិត្តជាមួយគណបក្សកាន់អំណាច និងក្រុមឃោសនិកគណបក្សនេះក៏បានចូលរួមចំណែកយ៉ាងសកម្មដែរក្នុងការវាយប្រហារទៅលើ គណបក្សប្រឆាំងថ្មីដ៏ក្មេងខ្ចីមួយនេះ។ សង្គ្រាមចិត្តសាស្ត្ររបស់គណបក្សកាន់អំណាចដែលប្រៀបបាននឹងព្យុះព្យោមាបោកបក់ទៅលើបក្សប្រឆាំង ច្បាស់ជានឹងមានឥទ្ធិពល ទោះតិចឬច្រើនក្តី ទៅលើស្មារតីមន្ត្រីនិងសកម្មជនគណបក្សនេះដោយចៀសមិនផុតឡើយ។
ដូច្នេះ នេះពិតជាវិញ្ញាសាសាកល្បងដ៏សំខាន់មួយ ដើម្បីវាស់ស្ទង់ពីភាពរឹងមាំរបស់គណបក្សសង្គ្រោះជាតិ។ តើគណបក្សនេះអាចទប់ទល់នឹងសម្ពាធដ៏ខ្លាំងក្លានេះបានដែរឬទេ? សម្រាប់ក្រុមអ្នកវិភាគនយោបាយប្រទេសកម្ពុជា ការកសាងទំនុកចិត្តគ្នាក្នុងចំណោមមន្ត្រីគណបក្សសម រង្ស៊ី និងគណបក្សសិទ្ធិមនុស្ស គឺជាគន្លឹះនៃភាពរឹងមាំរបស់គណបក្សសង្គ្រោះជាតិ។
ចាប់ពីពេលនេះរហូតដល់ក្រោយការប្រកាសលទ្ធផលនៃការបោះឆ្នោតគឺជាដំណាក់កាលសាកល្បងយ៉ាងសំខាន់ណាស់អំពីទំនុកចិត្តគ្នាក្នុងគណបក្សសង្គ្រោះជាតិ ជាពិសេស ក្នុងពេលអវត្តមានលោកសម រង្ស៊ី។ ប្រសិនបើទំនុកចិត្តគ្នាមិនរឹងមាំទេនោះ ប្រវត្តិសាស្ត្រនៃសម្ពន្ធ័ភាពបក្សប្រឆាំងច្បាស់ជានឹងច្រំដែលជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ