ការទទួលយកជនភៀសខ្លួនពីអូស្ត្រាលី ៖ ការសម្រេចចិត្ត«ធំហួសមាឌ»!
ចុះផ្សាយនៅថ្ងៃ៖
ស្តាប់ - ០៥:១១
ការសម្រេចទទួលយកជនភៀសខ្លួនពីប្រទេសអូស្ត្រាលីមករស់នៅលើទឹកដីកម្ពុជាបានក្លាយជាប្រធានបទក្តៅគគុកមួយរយៈពេលចុងក្រោយនេះ។ មានហេតុផលច្រើនយ៉ាងណាស់ដែលបញ្ជាក់ថា វាមិនទាន់ដល់ពេលដែលកម្ពុជាត្រូវបំពេញការតព្វកិច្ចអន្តរជាតិដ៏ធំនេះទេ។ ប៉ុន្តែ រដ្ឋាភិបាលក្រុងភ្នំពេញបានដើរលឿនជាងសភាពការណ៍តាមរយៈការធ្វើសេចក្តីសម្រេចចិត្ត«ធំហួសមាឌ»។ ក្រៅពីនោះកង្វះព័ត៌មាននៅតែជាចំណោទដ៏ធំធេងមួយដែលនាំឲ្យមានសំណួរថា តើមានអ្វីនៅពីក្រោយការសម្រេចចិត្តនេះ?
ក្នុងនាមជារដ្ឋសមាជិករបស់អង្គការសហប្រជាជាតិ ការទទួលយកជនភៀសខ្លួនឲ្យមករស់នៅលើទឹកដីកម្ពុជាមិនមែនជារឿងគួរឲ្យស្តីបន្ទោសឡើយប្រសិនបើជាពេលវេលាសមស្របឬក៏ជាស្ថានការណ៍តម្រូវ។ ប៉ុន្តែ ទាំងសាធារណៈមតិជាតិនិងអន្តរជាតិសុទ្ធតែមើលឃើញដូចគ្នាថា វាមិនទាន់ដល់ពេលដែលកម្ពុជាត្រូវបំពេញកាតព្វកិច្ចអន្តរជាតិទេពីព្រោះមានប្រទេសច្រើនណាស់ដែលមានស្ថានភាពល្អជាងកម្ពុជា។
ជាការពិតណាស់ កម្ពុជាជាប្រទេសក្រីក្រមួយដែលទើបងើបផុតពីសង្គ្រាមនិងជម្លោះនយោបាយផ្ទៃក្នុងយ៉ាងបង្ហូរឈាមរហូតដល់ក្លាយជាវាលពិឃាតក្រោមការដឹកនាំនៃរបបខ្មែរក្រហម។ បច្ចុប្បន្ន ថ្វីបើប្រទេសនេះបានស្គាល់សន្តិភាពនិងការអភិវឌ្ឍគួរឲ្យកត់សម្គាល់ ប៉ុន្តែ កម្ពុជានៅតែរស់ពឹងផ្អែកលើជំនួយបរទេសយ៉ាងខ្លាំងនៅឡើយ។ ក្រៅពីភាពក្រីក្រ កម្ពុជាក៏កំពុងប្រឈមុខនឹងបញ្ហារាប់រយជំពូកដែលត្រូវធ្វើកំណែទម្រង់ជាបន្ទាន់។
ក្នុងស្ថានភាពបែបនេះ កម្ពុជាមានហេតុផលគ្រប់គ្រាន់ក្នុងការបដិសេធមិនទទួលយកជន ភៀសខ្លួនបរទេសឲ្យមករស់នៅលើទឹកដីរបស់ខ្លួន។ រីឯជនភៀសខ្លួនទាំងឡាយទៀតសោតក៏ប្រហែលជាមិនប្រាថ្នាចង់ជ្រើសរើសយកកម្ពុជាជាទីជម្រកដ៏សុខសាន្តរបស់ខ្លួននោះដែរ។ និយាយបែបនេះមិនមែនមានន័យថាកម្ពុជាមានស្ថានភាពអាក្រក់ជាងគេឯងក្នុងលោកនោះ ទេ ប៉ុន្តែ ប្រទេសនេះមានបញ្ហាផ្ទាល់ខ្លួនច្រើនណាស់ដែលត្រូវដោះស្រាយ។
ក្នុងន័យនេះ ការសម្រេចចិត្តរបស់រដ្ឋាភិបាលទីក្រុងភ្នំពេញក្នុងការទទួលយកជនភៀសខ្លួនពីប្រទេសអូស្ត្រាលីត្រូវគេមើលឃើញជាទូទៅថាជាការសម្រេចិត្ត«ធំហួសមាឌ»ដែលបង្កឲ្យមានសំណួរដ៏ធំមួយថា តើមានអ្វីនៅពីក្រោយការសម្រេចចិត្តបែបនេះ? មូលហេតុសំខាន់មួយដែលគេនាំគ្នាផ្តោតជាសំខាន់នោះគឺបញ្ហាថវិកាថវិកា ៣០-៤០ លានដុល្លារដែលរដ្ឋា ភិបាលអូស្ត្រាលីសន្យាផ្តល់ឲ្យ។
បើទោះជារដ្ឋាភិបាលបដិសេធថាថវិកានោះមិនមែនជាថ្នូរនឹងការទទួលយកជនភៀសខ្លួនក៏ដោយ ក៏រដ្ឋាភិបាលហាក់គ្មានហេតុផលអ្វីផ្សេងមកពន្យល់គួរឲ្យជឿជាក់ជាងនេះបានទេ។ ម្យ៉ាងទៀត កង្វះព័ត៌មានជុំវិញការសម្រេចចិត្តរបស់រដ្ឋាភិបាលក៏បានបង្កឲ្យមានក្តីមន្ទិល សង្ស័យកាន់តែខ្លាំងអំពីហេតុផលនៅពីក្រោយការទទួលយកជនភៀសខ្លួនបរទេសមករស់នៅលើទឹកដីរបស់ខ្លួននៅក្នុងស្ថានភាពបែបនេះ។
យ៉ាងណាក៏ដោយចុះ កិច្ចព្រមព្រៀងត្រូវបានចុះហត្ថលេខារួចទៅហើយពោលគឺពេលនេះអង្ករបានក្លាយទៅជាបាយរួចទៅហើយ។ ដូច្នេះការតវ៉ាជំទាស់រឿងនេះនឹងគ្មានប្រយោជន៍អ្វីទៀតទេ។ ប៉ុន្តែ អំណឹះតទៅ ការផ្តល់ព័ត៌មានច្បាស់លាស់និងការពន្យល់ហេតុផលសមរម្យប្រកបដោយតម្លាភាពដល់ពលរដ្ឋម្ចាស់ប្រទេសគឺជាអ្វីរដ្ឋាភិបាលមិនអាចមើលរំលងបាន ឡើយ។
សូមកុំភ្លេចថា ព័ត៌មានគឺជាកត្តាស្លាប់រស់នៅក្នុងបរិបទដែលប្រទេសកម្ពុជាកំពុងឈានចូលក្នុងយុគសម័យដែលអ្វីៗត្រូវបើកចំហជាសាធារណៈ និងខណៈដែលសារព័ត៌មានដែលគេចាត់ទុកថាជា«អំណាចទី៤»កំពុងមានឥទ្ធិពលកាន់តែខ្លាំងឡើងៗជាលំដាប់។ ម្យ៉ាងទៀត ក្នុងសង្គមប្រជាធិបតេយ្យ រាល់កិច្ចការសំខាន់ៗដែលទាក់ទងនឹងប្រទេសជាតិ ប្រជាពលរដ្ឋត្រូវតែទទួលបានព័ត៌មានគ្រប់គ្រាន់។ ក្នុងន័យនេះ វាជាកំហុសឆ្គងដ៏ធំមួយប្រសិនបើរដ្ឋាភិបាលព្យាយាមលាក់បាំងព័ត៌មានដែលពលរដ្ឋស្រេកឃ្លានចង់ដឹង។
ជាក់ស្តែង ការបិទបាំងព័ត៌មានឬក៏ការមើលស្រាលចំពោះព័ត៌មានទាក់ទងនឹងបញ្ហាជន ភៀសខ្លួននេះបាននាំឲ្យរដ្ឋាភិបាលរងការរិះគន់យ៉ាងខ្លាំងនិងបានធ្វើឲ្យប៉ះពាល់ដល់ប្រជាប្រិយភាពរបស់គណបក្សកាន់អំណាចមិនតិចទេទម្រាំតែក្រសួងការបរទេសនិងក្រសួង មហាផ្ទៃចេញមុខមកបកស្រាយ។ នេះជាមេរៀនដែលបង្ហាញថា កុំថាឡើយដល់ទៅការលាក់បាំង សូម្បីតែយឺតពេលមួយជំហានក៏វាបង្កឲ្យមានផលវិបាកអវិជ្ជមានយ៉ាងធំធេងបានដែរ។ មេរៀនសំខាន់ម្យ៉ាងទៀតគឺ អំណឹះតទៅ ការសម្រេចចិត្តនានាមិនគួរមើលរំលងការព្រួយបារម្ភរបស់ពលរដ្ឋម្ចាស់ប្រទេសបានទេ។
សរុបមកវិញ ប្រសិនបើគ្មានអ្វីអាថ៌កំបាំងនៅពីក្រោយខ្នងទេ រដ្ឋាភិបាលទំនងជាគ្មានហេតុ ផលគ្រប់គ្រាន់ក្នុងការធ្វើសេចក្តីសម្រេចចិត្ត«ធំហួសមាឌ»ទាក់ទងនឹងការទទួលយកជន ភៀសខ្លួនពីប្រទេសអូស្ត្រាលីនោះឡើយ។ ដូច្នេះ បើគ្មានការលាតត្រដាងព័ត៌មានឲ្យបាន ច្បាស់លាស់ទេ ផលវិបាកអាក្រក់ចំពោះរដ្ឋាភិបាលទំនងជាមានទំហំធំធេងជាងការរំពឹងទុកទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ