អារ៉ាប៊ីសាអូឌីតបានយល់ព្រមផ្តល់សិទ្ធិបន្ថែមឲ្យអ្នកបម្រើជនជាតិឥណ្ឌូណេស៊ី
ប្រទេសឥណ្ឌូណេស៊ី និងអារ៉ាប៊ីសាអូឌីតទើបបានចុះហត្ថលេខាលើកិច្ចព្រមព្រៀងមួយដែលនឹងអនុញ្ញាតឲ្យអ្នកបម្រើតាមផ្ទះជាជនជាតិឥណ្ឌូណេស៊ីទទួលបានសិទ្ធិបន្ថែមទៀត។ កិច្ចព្រមព្រៀងនេះបានធ្វើឡើង ក្រោយពីមានស្រ្តីជនជាតិឥណ្ឌូណេស៊ីជាច្រើនបានសម្តែងការមិនសប្បាយចិត្តចំពោះលក្ខខ័ណ្ឌការងារដ៏លំបាករបស់ពួកគេក្នុងនាមជាអ្នកបម្រើនៅតាមគ្រួសារអារ៉ាប៊ីសាអូឌីត ពិសេស ការបំពានលើរាងកាយ ការចាប់រំលោភផ្លូវភេទ ការមិនឲ្យហូបគ្រប់គ្រាន់ និងការយកលិខិតឆ្លងដែនទុកជាដើម។
ចុះផ្សាយនៅថ្ងៃ៖
ស្តាប់ - ០១:៤១
គឺសំណុំរឿងនេះហើយដែលបានធ្វើឲ្យរដ្ឋាភិបាលទីក្រុងហ្សាការតា និងទីក្រុងរីយ៉ាដមើលមុខគ្នាមិនសូវចំតំាងពីជាង ៤ឆ្នំាកន្លងមក។ ជាង ៤ឆ្នំា ដែលរដ្ឋាភិបាលឥណ្ឌូណេស៊ីបានចាត់វិធានការផ្ទាល់ខ្លួន តាមរយៈកាត់បន្ថយការបញ្ជូនប្រជាជនខ្លួនឲ្យទៅធ្វើការក្នុងប្រទេសអារ៉ាប៊ីសាអូឌីត។ ដូច្នេះឃើញថា កិច្ចព្រមព្រៀងដែលទីក្រុងហ្សាការតាបានទទួលពីទីក្រុងរីយ៉ាដនៅពេលនេះ ពិតជាជោគជ័យមួយមិនអាចប្រកែកបាន បន្ទាប់ពីឥណ្ឌូណេស៊ីបានដាក់គំនាបលើអារ៉ាប៊ីសាអូឌីតអស់រយៈពេលជាង ៤ឆ្នំាកន្លងមក។
អ្វីដែលរដ្ឋាភិបាលឥណ្ឌូណេស៊ីបានទាមទារពីរដ្ឋាភិបាលអារ៉ាប៊ីសាអូឌីតជាអាទិភាពនោះ គឺការគោរពសិទ្ធិពលករឥណ្ឌូណេស៊ីទូទៅ ពិសេសស្រ្តីបម្រើនៅតាមផ្ទះដែលត្រូវបានគេមើលឃើញថា ជាអ្នកដែលបានទទួលរងការធ្វើបាប ជិះជាន់ច្រើនជាងគេពីសំណាក់ម្ចាស់ផ្ទះ។ កាលពី ៣ឆ្នំាមុន រដ្ឋាភិបាលទីក្រុងហ្សាការតាបានកម្រិតការបញ្ជូនស្រ្តីអ្នកបម្រើទៅកាន់ប្រទេសអារ៉ាប៊ីសាអូឌីត។ ជាមួយនឹងកិច្ចព្រមព្រៀងនេះ ម្ចាស់ផ្ទះដែលជួលអ្នកបម្រើជនជាតិឥណ្ឌូណេស៊ីត្រូវតែគោរពសិទ្ធិអ្នកបម្រើខ្លួន ដោយមិនត្រូវយកលិខិតឆ្លងដែនទុក ផ្តល់ប្រាក់ខែសមរម្យ និងទៀងទាត់ ផ្តល់ថ្ងៃឈប់សម្រាកប្រចំាខែ ព្រមទំាងពេលឈប់សម្រាកចំនួន ១ខែរៀងរាល់ ២ឆ្នំាម្តង។ ជាថ្នូរត្រឡប់វិញ ស្រ្តីអ្នកបម្រើត្រូវតែរៀនសូត្រសាសនាអ៊ីស្លាម។
គួររម្លឹកជូនថា តំាងពីថ្ងៃទី៤ វិច្ឆិកាមក រដ្ឋាភិបាលអារ៉ាប៊ីសាអូឌីតបានបណ្តេញពលករបរទេសខុសច្បាប់ចំនួនជិត ១លាន ៥សែននាក់ចេញពីទឹកដីខ្លួន ក្នុងនោះមានជនជាតិ អាហ្រ្វិក ស្រីលង្កា ឥណ្ឌា និងជនជាតិប៉ាគីស្ថាន។ សព្វថ្ងៃ យុទ្ធនាការបណ្តេញជនអន្តោប្រវេស៍ខុសច្បាប់កំពុងបន្តមាននៅទូទំាងប្រទេសអារ៉ាប៊ីសាអូឌីត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ