ប្រមុខការទូតអាមេរិកចន ឃ៊ែរីផ្តើមទស្សនកិច្ចនៅតំបន់មជ្ឈិមបូព៌ា និងអាស៊ីអាគ្នេយ៍
លោកប្រមុខការទូតអាមេរិកចន ឃ៊ែរីផ្តើមទស្សនកិច្ចមួយជុំតំបន់មជ្ឈិមបូព៌ា និងអាស៊ីអាគ្នេយ៍រយៈពេល ១សប្តាហ៍ដោយចាប់ផ្តើមពីថ្ងៃសៅរ៍ ទី២ សីហានេះដល់ថ្ងៃសៅរ៍ ទី៨ សីហាសប្តាហ៍ក្រោយ។ អេហ្ស៊ីប ជាប្រទេសដែលលោកឃ៊ែរីផ្តើមទស្សនកិច្ចមុនគេក្នុងថ្ងៃនេះ មុននឹងបន្តដំណើរទៅកាន់ប្រទេសកាតានៅរាត្រីយប់ថ្ងៃអាទិត្យនេះ។ បន្ទាប់មក លោកឃ៊ែរីនឹងបន្តដំណើរទស្សនកិច្ចទៅកាន់ប្រទេសអាស៊ីចំនួន ៣ នៅតំបន់អាស៊ីអាគ្នេយ៍ គឺសិង្ហបុរី ម៉ាឡេស៊ី និងប្រទេសវៀតណាម។ វត្តមានរបស់លោកឃ៊ែរីនៅតំបន់មជ្ឈិមបូព៌ាបានធ្វើឡើង ចំពេលដែលបណ្តាប្រទេសមួយចំនួនកំពុងបារម្ភពីកិច្ចព្រមព្រៀងនុយក្លេអ៊ែរអ៊ីរ៉ង់ដែលសហគមន៍អន្តរជាតិទើបបានចុះហត្ថលេខាជាមួយអ៊ីរ៉ង់កាលពីថ្ងៃទី១៤ កក្កដាកន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៤០
កម្មវត្ថុនៃដំណើរទស្សនកិច្ចរបស់លោកប្រមុខការទូតអាមេរិកចន ឃ៊ែរីនៅក្នុងប្រទេសអេហ្ស៊ីបថ្ងៃនេះ គឺផ្តល់សន្ទុះឡើងវិញនូវ « កិច្ចសន្ទនាយុទ្ធសាស្រ្ត » រវាងទីក្រុងគែរ និងទីក្រុងវ៉ាស៊ីនតោន។ ហើយនេះជាលើកទី១ បើគិតតំាងពីឆ្នំា ២០០៩ មក។ គួរជម្រាបជូនថា អេហ្ស៊ីបគឺជាសម្ព័ន្ធមិត្តចាក់ទឹកមិនលិចរបស់អាមេរិក ហើយអាចថាជាប្រទេសតែមួយគត់នៅក្នុងតំបន់ដែលអាមេរិកត្រូវការ និងដែលអាមេរិកអាចពឹងពាក់បានសម្រាប់ជួយដោះស្រាយសំណុំរឿងផ្សេងទៀតនៅក្នុងតំបន់ ពិសេសជម្លោះដ៏រុំារ៉ៃរវាងប៉ាឡេស្ទីន និងអ៊ីស្រាអែល។
តែគេក៏ត្រូវហ៊ានទទួលស្គាល់ថា តំាងពីអេហ្ស៊ីបបានភ្លួករសជាតិបដិវត្តន៍អារ៉ាប់ក្នុងឆ្នំា ២០១១ ដែលឈានដល់ទម្លាក់លោកប្រធានាធិបតីមូបារ៉ាក់មក ទំនាក់ទំនងរវាងអាមេរិក និងអេហ្ស៊ីបហាក់ដូចជាមិនសូវល្អូកល្អឺនប៉ុន្មានទេ។ ធ្ងន់ធ្ងរជាងគេ គឺការដែលលោកប្រធានាធិបតី ឧត្តមសេនីយអេហ្ស៊ីបសព្វថ្ងៃអាល់ស៊ីស៊ីបានធ្វើរដ្ឋប្រហារទម្លាក់លោកប្រធានាធិបតីស្របច្បាប់ម័រស៊ីកាលពីថ្ងៃទី៣ ខែកក្កដា ឆ្នំា ២០១៣។ ប៉ុន្មានថ្ងៃក្រោយការធ្លាក់ពីតំណែងរបស់លោកម័រស៊ី ពោលនៅថ្ងៃទី៩ កក្កដា អាមេរិកក៏បានសម្រេចព្យួរជំនួយទៅឲ្យអេហ្ស៊ីបដែលអាមេរិកបានប្រគល់ជារៀងរាល់ឆ្នំាចំនួន ១ ៥០០លានដុល្លារ ក្នុងនោះមានជំនួយយោធាចំនួន ១ ៣០០លានដុល្លារ។
កាយវិការរបស់ទីក្រុងវ៉ាស៊ីនតោនកាលណោះ គឺដើម្បីប្រឆំាងនឹងរដ្ឋប្រហារយោធាទម្លាក់លោកម័រស៊ីដែលជាប្រធានាធិបតីជ្រើសចេញពីការបោះឆ្នោតរបស់ប្រជាជន។ គឺទើបតែនៅដំណាច់ខែមីនាកន្លងទៅថ្មីៗនេះទេដែលអាមេរិកបានប្រកាសផ្តល់ជំនួយយោធាជាថ្មីឲ្យអេហ្ស៊ីបក្នុងទឹកប្រាក់ចំនួន ១ ៣០០លានដុលារក្នុង ១ឆ្នំា។ ជាក់ស្តែងនៅថ្ងៃសុក្រ ទី១ សីហា អាមេរិកបានប្រកាសពីការប្រគល់យន្តហោះចម្បំាងប្រភេទ F១៦ ចំនួន ៨គ្រឿង ក្នុងចំនួនសរុប ១២គ្រឿងទៅឲ្យទាហានអេហ្ស៊ីប។
បញ្ហាសិទ្ធិមនុស្សនៅអេហ្ស៊ីប ជាប្រធានបទដែលអាមេរិកមិនអាចមើលរំលង
ទោះជាយ៉ាងនេះក្តី អេហ្ស៊ីបរបស់លោកប្រធានាធិបតីអាល់ស៊ីស៊ីកំពុងជាប់ចោទពីបទរំលោភសិទ្ធិមនុស្ស ព្រោះតំាងពីក្រោយរដ្ឋប្រហារទម្លាក់លោកម័រស៊ីមក មានសកម្មជនរបស់លោកម័រស៊ី ក៏ដូចជាក្រុមអ្នកភាតរៈអ៊ីស្លាមជាច្រើននាក់ត្រូវបានគេកាត់ទោសដាក់ពន្ធនាគារ។ នេះពិតជារឿងដ៏រសើបមួយដែលអាមេរិកមិនអាចមើលរំលងបានទេ។ គឺនៅក្នុងន័យនេះហើយបានជានាដំណើរទៅកាន់ប្រទេសអេហ្ស៊ីបថ្ងៃនេះ លោកចន ឃ៊ែរីបាននំាលោកតុម ម៉ាលីនូវស្គីទៅជាមួយ។ លោកតុម ម៉ាលីនូវស្គី គឺជាអនុរដ្ឋមន្រ្តីការបរទេសអាមេរិកទទួលបន្ទុកសិទ្ធិមនុស្ស។
គេមិនដឹងថា តើលោកឃ៊ែរីនឹងលើកយកបញ្ហាសិទ្ធិមនុស្សនៅអេហ្ស៊ីបទៅនិយាយជាមួយលោកប្រធានាធិបតីអាល់ស៊ីស៊ីយ៉ាងម៉េចទេ។ តែការដែលលោកឃ៊ែរីបាននំាលោកម៉ាលីនូវស្គីទៅជាមួយពេលនេះ គឺជាសក្ខីកម្មមួយដែលស បញ្ជាក់ឲ្យឃើញថា អាមេរិកពិតជាបារម្ភ និងមិនធ្វើព្រងើយកន្តើយចំពោះបញ្ហារំលោភសិទ្ធិមនុស្សនៅអេហ្ស៊ីបបានទេ។ តែទន្ទឹមគ្នានេះ គេក៏ត្រូវហ៊ាននិយាយថា បញ្ហាសិទ្ធិមនុស្សនៅអេហ្ស៊ីបគ្រាន់តែជាក្តីកង្វល់មួយជ្រុងតូចរបស់អាមេរិកប៉ុណ្ណោះ។ អ្វីដែលអាមេរិកកំពុងព្រួយបារម្ភខ្លំាងជាងគេ គឺកំណើនឥទ្ធិពលរបស់ក្រុមភេរវជននៅក្នុងឧបទ្វីបអេហ្ស៊ីបស៊ីណៃ ពិសេសនៅតំបន់ប៉ែកខាងជើងស៊ីណៃដែលជាជង្រុករបស់ពួកជីហាត Ansar Beït al-Maqdess និងដែលពួកនេះកំពុងភ្ជាប់ទំនាក់ទំនងជាមួយអង្គការរដ្ឋអ៊ីស្លាមនៅអ៊ីរ៉ាក់ និងស៊ីរី។
គឺស្ថានភាពអសន្តិសុខប្រកបដោយគ្រោះថ្នាក់នៅតំបន់ស៊ីណៃនោះឯងដែលនាដំណាច់ខែកក្កដាថ្មីៗកន្លងទៅនេះ រដ្ឋាភិបាលទីក្រុងគែរបានសម្រេចពន្យារការប្រកាសអាសន្នដែលបានដាក់តំាងពីខែតុលា ឆ្នំា ២០១៤។ ទីក្រុងគែរ និងវ៉ាស៊ីតោនបានយល់ឃើញដូចគ្នាពីផលប្រយោជន៍រួមបានមកពីដៃគូយុទ្ធសាស្រ្តមិនអាចខ្វះបាន ពិសេសគឺការប្រយុទ្ធប្រឆំាងទល់នឹងសត្រូវតែមួយ គឺអង្គការរដ្ឋអ៊ីស្លាមនៅក្នុងតំបន់។
នៅកាតា លោកឃ៊ែរីត្រូវនិយាយធានាសមភាគីក្រុមប្រឹក្សាសហប្រតិបត្តិការឈូងសមុទ្រពែក្ស
បន្តពីប្រទេសអេហ្ស៊ីប លោកឃ៊ែរីនឹងបន្តដំណើរទៅកាន់ប្រទេសកាតានៅយប់ថ្ងៃអាទិត្យនេះ។ នៅថ្ងៃចន្ទ ទី៣ សីហា លោកឃ៊ែរីត្រូវចូលជួបសមភាគីនៃប្រទេសអារ៉ាប៊ីសាអូឌីត អូម៉ង់ គូវ៉ែត បារ៉ែន អេមីរ៉ាអារ៉ាប់រួម និងប្រទេសកាតាដែលសុទ្ធសឹងជាសមាជិកនៃក្រុមប្រឹក្សាសហប្រតិបត្តិការឈូងសមុទ្រពែក្ស។ ប្រធានបទសំខាន់ដែលលោកឃ៊ែរីត្រូវលើកយកទៅនិយាយ គឺពន្យល់បកស្រាយប្រាប់ប្រទេសទំាងនោះពីមូលហេតុដែលអាមេរិក និងប្រទេសលោកខាងលិចផ្សេងទៀតបានយល់ព្រមចុះហត្ថលេខាជាមួយអ៊ីរ៉ង់លើកិច្ចព្រមព្រៀងស្តីពីនុយក្លេអ៊ែរអ៊ីរ៉ង់កាលពីថ្ងៃទី១៤ កក្កដាកន្លងទៅ។
គួរជម្រាបជូនថា អ្វីដែលបណ្តាប្រទេសមហាអំណាចស៊ុយនីតក្នុងតំបន់បាន និងកំពុងបារម្ភខ្លំាងនៅពេលនេះ គឺមហិច្ឆតាក្នុងតំបន់របស់ប្រទេសអ៊ីរ៉ង់ឈីអ៊ីត។ ដូច្នេះកាតព្វកិច្ចរបស់លោកឃ៊ែរី គឺនិយាយបញ្ចុះបញ្ចូល និងធានាដល់ប្រទេសទំាងនោះថា កិច្ចព្រមព្រៀងស្តីពីនុយក្លេអ៊ែរអ៊ីរ៉ង់ដែលទើបសម្រេចបាននឹងទប់កុំឲ្យអ៊ីរ៉ង់ផលិតគ្រាប់បែបបរិមាណូ ពោលមិនមែនជួយជម្រុញតម្លើងឥទិ្ធពលអ៊ីរ៉ង់ឲ្យអាងយ៉ាងនៅក្នុងតំបន់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ