ដំណើរទស្សនៈកិច្ចដ៏កម្ររបស់នាយករដ្ឋមន្រ្តីឥណ្ឌានៅកាណាដា
ប្រទេសកាណាដាបានទទួលដំណើរទស្សនៈកិច្ចដ៏កម្រមួយរបស់នាយករដ្ឋមន្រ្តីឥណ្ឌា លោក Narendra Modi ។ ជាដំណើរទស្សនៈកិច្ចលើកដំបូងបង្អស់ ក្នុងរយៈពេលជាង៤២ឆ្នាំចុងក្រោយនេះ បន្ទាប់ពីទស្សនៈកិច្ចរបស់លោកនាយករដ្ឋមន្ត្រី Indira Gandhi ក្នុងជំនួបជាមួយអតីតនាយករដ្ឋមន្រ្តីកាណាដា លោក Pierre Trudeau កាលពីឆ្នាំ១៩៧៣។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ដំណើរទស្សនកិច្ចរបស់នាយករដ្ឋមន្រ្តីឥណ្ឌា លោក Narendra Modi នឹងប្រព្រឹត្តទៅរយៈពេលបីថ្ងៃ។ ការចុះសំចតដំបូងគឺនៅរាជធានីអូតាវ៉ាកាលពីល្ងាចថ្ងៃអង្គារដើម្បីចូលរួមកិច្ចប្រជុំផ្លូវការរវាងកាណាដា និងឥណ្ឌា។ នាឱកាសនោះ លោក Narendra Modi បានទទួលការស្វាគមន៍យ៉ាងកក់ក្តៅពីសមភាគី គឺ នាយករដ្ឋមន្រ្តីកាណាដាលោក Stephen Harper ក្នុងកិច្ចពង្រឹងទំនាក់ទំនងរវាងប្រទេសទាំងពីរ។
រដ្ឋាភិបាលរបស់លោក Harper ក៏បានមើលឃើញពីសក្តានុពលក្នុងការបង្កើនការផ្តោះប្តូររវាងប្រទេសទាំងពីរ ទាំងក្នុងវិស័យពាណិជ្ជកម្ម អប់រំ ថាមពល និងទាំងវិស័យវិទ្យាសាស្រ្ត និងបច្ចេកវិទ្យា។ ហើយប្រទេសទាំងពីរក៏បានសន្យាថា នឹងពិភាក្សាគ្នាដើម្បីពិចារណាចុះកិច្ចព្រមព្រៀងមួយចំនួនផងដែរ នេះបើតាមបទយកការណ៍របស់ទូរទស្សន៍ជាតិ Radio-Canada។
នៅល្ងាចថ្ងៃពុធនេះស្មើនឹងពេលព្រឹកថ្ងៃព្រហស្បតិ៍ម៉ោងនៅភ្នំពេញ លោកនឹងថ្លែងសុន្ទរកថាទៅកាន់មនុស្សជាងប្រាំបីពាន់នាក់ដែលនឹងប្រមូលផ្តុំជួបជុំគ្នានៅក្រុង Toronto ខេត្ត Ontario ដើម្បីចាំស្តាប់ការថ្លែងសុន្ទរកថារបស់លោក Modi ។ បន្ទាប់មក លោក Modi នឹងទៅទស្សនាប្រាសាទហិណ្ឌូ និង Sikh នៅទីក្រុង Vancouver និង Surrey នៅក្នុងខេត្ត British Columbia ដែលស្ថិតនៅភាគខាងលិចក្នុងប្រទេសកាណាដា ហើយនៅទីនោះ ក៏គេរំពឹងថានឹងមានមនុស្សរាប់ពាន់នាក់ប្រមូលផ្តុំចាំទទួលលោក Modi ផងដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ