ចិនបរិហារទង្វើជ្រៀតជ្រែករបស់អាមេរិកនៅក្នុងសមុទ្រចិនខាងត្បូង
នៅថ្ងៃសុក្រ ទី២២ ឧសភា ចិនបានបញ្ចេញប្រតិកម្មមិនពេញចិត្តចំពោះទង្វើលូកដៃជ្រៀតជ្រែករបស់អាមេរិកនៅក្នុងសមុទ្រចិនខាងត្បូង។ ប្រតិកម្មក្តៅក្រហាយរបស់ចិនបានធ្វើឡើង បន្ទាប់ពីមានយន្តហោះទាហានអាមរិកំាងមួយគ្រឿងបានហោះចូលស៊ើបការណ៍ពីលើទីប្រជុំកោះដែលចិនកំពុងមានជម្លោះជាមួយបណ្តាប្រទេសអាស៊ានមួយចំនួននៅក្នុងតំបន់។ ប៉េកំាងបានចាត់ទុកទង្វើរបស់វ៉ាស៊ីនតោនថា គ្មានលក្ខណៈទទួលខុសត្រូវ និងប្រកបដោយគ្រោះថ្នាក់ ព្រមទំាងអំពាវនាវឲ្យអាមេរិកបញ្ឈប់រាល់ទង្វើបង្ករឿង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
ព័ត៌មានដ៏ក្តៅគគុកមួយនេះត្រូវបានផ្សព្វផ្សាយដោយទូរទស្សន៍ CNN ដែលបានបង្ហាញពីវត្តមានយន្តហោះស៊ើបការណ៍អាមេរិកំាងមួយគ្រឿងហោះពីលើទីប្រជុំកោះសិប្បនិមិត្មសាងសង់ដោយចិននៅក្នុងសមុទ្រចិនខាងត្បូង។ គឺជាតំបន់ដែលចិនកំពុងមានជម្លោះប្រទាញប្រទង់គ្នាយ៉ាងខ្លំាងជាមួយនឹងប្រទេសអាស៊ានមួយចំនួន ដូចជាវៀតណាម ហ្វីលីពីន ម៉ាឡេស៊ី ព្រុយណេ រួមទំាងតៃវ៉ាន់ផងដែរ។ ថ្លែងនៅចំពោះមុខក្រុមអ្នកកាសែត អ្នកនំាពាក្យក្រសួងការបរទេសចិនលោកហុង ឡេបានបញ្ជាក់ថា ទ័ពជើងទឹកចិនប្រចំាក្នុងតំបន់ក៏បានចេញប្រតិបត្តិការអំពាវនាវតាមរលកវិទ្យុឲ្យយន្តហោះអាមេរិកំាងចាកចេញពីតំបន់ភ្លាមៗ។ ទន្ទឹមគ្នានេះ លោកហុង ឡេក៏បានចាត់ទុកទង្វើរបស់អាមេរិកថា គ្មានការទទួលខុសត្រូវ និងប្រកបដោយគ្រោះថ្នាក់ខ្លំាង ព្រោះវាបានគំរាមកំហែងលើដែនសមុទ្ររបស់ចិន។
លោកហុង ឡេបានព្រមានថា ចិននឹងចាត់វិធានការគ្រប់បែបយ៉ាង និងចំាបាច់មួយចំនួនដើម្បីប្រឈមទប់នឹងទង្វើចូលជ្រៀតជ្រែកលើដែនសមុទ្ររបស់ចិន។ អ្នកនំាពាក្យក្រសួងការបរទេសចិនរូបនេះបានបន្ថែមថា ចិនការពារសិទ្ធិសេរីភាពនៃការធ្វើចរាចរណ៍ផ្លូវសមុទ្រ និងផ្លូវអាកាស តែនេះមិនមានន័យថា ប្រទេសផ្សេងអាចលូកដៃចូលចាត់ចែង ឬមួយក៏ចេញបញ្ជានៅក្នុងដែនសមុទ្រ ឬដែនអាកាសរបស់ប្រទេសមួយទៀតទេ។ កន្លងមក អាមេរិកធ្លាប់បានបញ្ជាក់ឲ្យដឹងពីគម្រោងបញ្ជូននាវា និងយន្តហោះទៅកាន់តំបន់ក្បែរទីប្រជុំកោះសិប្បនិមិត្មសាងសង់ឡើងដោយចិនក្នុងន័យចង់ប្រាប់ចិនថា អ្វីដែលចិនបានសាងសង់នោះមិនអាចធ្វើជាភស្តុតាងដែលបញ្ជាក់ពីការទាមទារដែនសមុទ្រ ឬដែនអាកាសរបស់ខ្លួននៅក្នុងតំបន់យុទ្ធសាស្រ្តនោះបានឡើយ។
ដោយឡែក លោកអនុរដ្ឋមន្រ្តីក្រសួងការបរទេសអាមេរិកទទួលបន្ទុកតំបន់អាស៊ីអាគ្នេយ៍ និងប៉ាស៊ីហ្វិកបានយល់ឃើញថា បេសកកម្មហោះហើរតាមដានមើលរបស់ទ័ពអាកាសអាមេរិកជារឿងសមហេតុ សមផល និងថា ទ័ពអាកាសអាមេរិកនឹងបន្តអនុវត្តន៍សិទ្ធិរបស់ខ្លួនក្នុងការតាមឃ្លំាមើលពីស្ថានការណ៍ទូទៅនៅក្នុងដែនទឹក និងដែនអាកាសអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ