ចិន៖ ៣៧នាក់ត្រូវចាប់ខ្លួន ពីបទលក់ថ្នាំវ៉ាក់សាំងហួសកាលបរិច្ឆេទ
យ៉ាងហោចណាស់ មានជនជាតិចិនប្រមាណជា៣៧នាក់ ដែលត្រូវចាប់ខ្លួនដោយអាជ្ញាធរចិន ក្រោមបទចោទប្រកាន់ថាបានលក់ និងចែកចាយថ្នាំវ៉ាក់សាំងបង្ការជម្ងឺជាច្រើនមុខ ដែលខូចគុណភាព ព្រោះហួសកាលបរច្ឆេទប្រើប្រាស់ និងដែលត្រូវបានរក្សាទុកដោយមិនគោរព ទៅតាមលក្ខខណ្ឌសុខាភិបាល។ នេះជាករណីរឿងអាស្រូវសុខភាពដ៏ធំមួយទៀត បន្ទាប់ពីមានរឿងអាស្រូវមួយកាលពីឆ្នាំ២០០៨ ទាក់ទិននឹងម្សៅទឹកដោះគោក្លែងក្លាយ មានជាតិពុលបង្ករឲ្យស្លាប់ទារក ៦នាក់ និងពុលទារកប្រមាណជា៣សែននាក់នៅចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
មនុស្ស៣៧នាក់ ត្រូវបានចាប់ខ្លួន ដែលក្នុងនោះមាន១៣នាក់ គឺជាពាណិជ្ជករលក់បោះដុំ ទាក់ទិនក្នុងសំណុំរឿងអាស្រូវថ្មីនៅចិន គឺការលក់ចែកចាយថ្នាំវ៉ាក់សាំងខូចគុណភាព ហួសកាលបរិច្ឆេទប្រើប្រាស់។ តាមការរាយការណ៍ពីទីភ្នាក់ងារសារព័ត៌មានស៊ីនហួ បានឲ្យដឹងថា ថ្នាំវ៉ាក់សាំងជាច្រើនប្រភេទត្រូវ បានគេលក់ រក្សាទុក និងដឹកជញ្ជូន ក្នុងលក្ខខណ្ឌមិនត្រឹមត្រូវទៅតាមក្រិត្យក្រមសុខាភិបាល ដែលសកម្មភាពទាំងអស់នេះ គឺជាសកម្មភាពខុសច្បាប់។
មនុស្សសំខាន់ ក្នុងចំណោមអ្នកជាប់ចោទក្នុងរឿងអាស្រូវនេះ គឺស្ត្រីពីរនាក់ម្តាយកូន ជនជាតិចិននៅខេត្ត ស្ហាងទុង ភាគខាងកើតប្រទេសចិន។ តាមការរាយការណ៍របស់ទីភ្នាក់ងារចិនស៊ីនហួដដែល បានឲ្យដឹងថា ពីរនាក់ម្តាយកូននេះ បានលក់ថ្នាំវ៉ាក់សាំងខូចគុណភាព ប្រមាណជា២៥ប្រភេទ តាំងពីឆ្នាំ២០១០មកម្លេះ។ ទឹកប្រាក់សរុបនៃជំនួញខុស របស់ពីរនាក់ម្តាយកូននេះច្បាប់នេះ មានតម្លៃប្រមាណជា ៥៧០លានយាន់ ពោលគឺស្មើនឹង៧៨លានអឺរ៉ូ។ ក្នុងចំណោមថ្នាំវ៉ាក់សាំងទាំងនោះ មានជាអាទិ៍ ថ្នាំវ៉ាក់សាំងការពារជំងឺគ្រុនស្វិតដៃជើង វ៉ាក់សាំងជំងឺឆ្កួត និងជំងឺថ្លើមប្រភេទBជាដើម។
អាជ្ញាធរគ្រប់គ្រងផលិតផលចំណីអាហារនិងថ្នាំពេទ្យ ប្រចាំខេត្តស្ហាងទុង បានធ្វើការកំណត់មុខសញ្ញា អ្នកបោះដុំថ្នាំពេទ្យចំនួន១០៧នាក់ ដែលបានផ្គត់ផ្គង់ថ្នាំវ៉ាក់សាំងឲ្យស្ត្រីពីរនាក់ម្តាយកូនខាងលើ ហើយនិងអ្នកលក់ជាម៉ូយរបស់អ្នកបោះដុំទាំងនោះ ចំនួន១៩៣នាក់ផ្សេងទៀត។
យ៉ាងណាក៏ដោយ អង្គការសុខភាពពិភពលោក បានចេញសេចក្តីប្រកាសមួយថា ថ្វីបើថ្នាំវ៉ាក់សាំងត្រូវផុតកាលបរិច្ឆេទប្រើប្រាស់ រឺត្រូវបានរក្សាទុកក្នុងលក្ខខណ្ឌមិនត្រឹមត្រូវ តែថ្នាំវ៉ាក់សាំងទាំងនោះ មិនបង្ករជាបញ្ហាដល់សុខភាពនោះទេ។ គឺមានករណីតិចបំផុត ដែលថ្នាំវ៉ាក់សាំងផុតកាលបរិច្ឆេទ អាចបង្ករគ្រោះថ្នាក់។ ថ្នាំវ៉ាក់សាំងផុតកាលបរិច្ឆេទ គឺមានន័យថាជាថ្នាំខូចគុណភាព ពោលគឺមិនមានប្រសិទ្ធិភាពអ្វីទាំងអស់ ក្នុងការការពារជំងឺ។ ដូច្នេះអ្វីដែលអ្នកប្រើប្រាស់អាចប្រឈមមុខ គឺការឆ្លង រឺមានជំងឺផ្សេងៗ ដោយសារតែមិនបានចាក់ថ្នាំវ៉ាក់សាំង ដែលមានគុណភាពត្រឹមត្រូវ។
ជុំវិញរឿងអាស្រូវដ៏ធំ និងដ៏សំខាន់ទាក់ទិននឹងអាយុជីវិតរបស់ប្រជាជនចិន មតិសាធារណៈចិនមានការតវ៉ា និងរិះគន់ជាខ្លាំងទៅលើចំណាត់ការរបស់អាជ្ញាធរ ដែលមានភាពស្ពិកស្រពន់ មិនថាក្នុងការទប់ស្កាត់ចរាចរណ៍លក់ដូរផលិតផលខូចគុណភាព ក៏ដូចជាក្នុងការផ្តល់ដំណឹងជូនប្រជាជន។ យ៉ាងណាមិញ ការចាប់ខ្លួនស្ត្រីពីរនាក់ម្តាយកូន ដែលជាអ្នកលក់ថ្នាំវ៉ាក់សាំង គឺបានធ្វើឡើងតាំងតែពីខែមេសា ឆ្នាំ២០១៥ម្លេះ តែពេលនេះទើបតែប្រកាសឲ្យដឹង។ នេះបង្ហាញពីចំណាត់ការគ្មានតម្លាភាព ការលាក់បាំង និងអសម្ថភាពរបស់អជ្ញាធរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ