ពលករខ្មែរ​នៅ​បាងកក និង​ស្ថានការណ៍​បោះឆ្នោត​ថៃ

ការបោះឆ្នោតនៅថៃ គួរតែជាទីចាប់អារម្មណ៍ សម្រាប់កម្ពុជាផងដែរ ពីព្រោះថា ការផ្លាស់ប្តូររបបដឹកនាំ នៅក្នុងប្រទេសជិតខាងមួយនេះ វាអាចនឹងមានឥទ្ធិពល ទៅលើទំនាក់ទំនងទ្វេភាគីជាមួយកម្ពុជា។ ជាការពិតណាស់ថា តាមការសង្កេតកន្លងមក យើងឃើញថា កម្ពុជាហាក់ដូចជាអាចសម្របខ្លួនបានច្រើន ទៅនឹងការផ្លាស់ប្តូររបបដឹកនាំនៅថៃ ក៏ប៉ុន្តែ ក៏បានឆ្លងកាត់នូវបញ្ហាស្មុគស្មាញមិនតិចនោះដែរ ជាពិសេស ទាក់ទងនឹងជម្លោះនៅតំបន់ប្រាសាទព្រះវិហារ។ នៅក្នុងការបោះឆ្នោតលើកនេះ ប្រសិនបើនិយាយពីផលប៉ះពាល់ដែលអាចកើតមានឡើង អ្នកដែលមានក្តីកង្វល់ជាងគេ គឺពលករខ្មែរជាច្រើន ដែលកំពុងធ្វើការនៅក្នុងប្រទេសថៃ ហើយជាក់ស្តែង ក្តីកង្វល់នេះ គឺពិតជាមានមែន នៅក្នុងគំនិតរបស់ពលករខ្មែរមួយចំនួន ដែលធ្វើការនៅក្នុងទីក្រុងបាងកក។