ប្រេងដូង៖ អ្នកជំនាញ ប្រជុំគ្នានៅប៉ារីស រិះរកវិធីដើម្បីគោរពបរិស្ថាន និងសង្គម
ផលិតផលប្រេង ដែលចំរាញ់ចេញពីដូងប្រេង បានគ្របដណ្តប់ទីផ្សារពិភពលោក ដោយសារតែប្រេងនេះ ត្រូវបានយកទៅប្រើប្រាស់ ក្នុងច្រើនវិស័យ មានទាំងវិស័យចំណីអាហារ វិស័យថាមពល និងវិស័យឱសថ ឬគ្រឿងសំអាងជាដើម។ តែយ៉ាងណា អង្គការបរិស្ថានជាច្រើន បានថ្កោលទោសឧស្សាហកម្មផលិតប្រេងដូងនេះ ថាបានពន្លឿនការកាប់បំផ្លាញព្រៃឈើ ព្រមទាំងបានរំលោភបំពានសិទ្ធិមូលដ្ឋានរបស់ប្រជាពលរដ្ឋម្ចាស់ស្រុកទៀតផង។ នៅថ្ងៃអង្គារ ទី២៦មិថុនា នៅទីក្រុងប៉ារីស អ្នកជំនាញក្នុងវិស័យនេះ កំពុងជួបប្រជុំគ្នា ដើម្បីរិះរកវិធីសាស្ត្រ កាត់បន្ថយផលប៉ះពាល់ បង្កឡើងដោយឧស្សាហកម្មប្រេងដូងនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
តំណាងអ្នកផលិត តំណាងអ្នកប្រើប្រាស់ ឈ្មួញកណ្តាល និងតំណាងកសិឧស្សាហកម្មចំណីអាហារ កំពុងជួបប្រជុំគ្នា នៅទីក្រុងប៉ារីស ដើម្បីពិភាក្សា ដោះដូរយោបល់ ស្តីពីផលិតផលប្រេងដូង ដែលជាផលិតផលចាំបាច់ តែទន្ទឹមនឹងនេះ ក៏គឺជាផលិតផលដែលបង្កផលប៉ះពាល់ ច្រើនដល់បរិស្ថានធម្មជាតិ និងបញ្ហាសង្គម។
សូមបញ្ជាក់ថា ចាប់តាំងពីឆ្នាំ២០០៤មក អ្នកជំនាញក្នុងវិស័យនេះ ដែលភាគច្រើននៅអឺរ៉ុប បានបង្កើតឲ្យមានអង្គភាពមួយឈ្មោះ RSPO (Round Table for Sustainable Palm Oil) ដើម្បីផ្តល់ផ្លាកសញ្ញាទទួលស្គាល់ ទៅលើផលិតផលប្រេងដូងណា ដែលត្រូវបានផលិតឡើង ដោយគោរពបរិស្ថានធម្មជាតិ មិនបំផ្លាញព្រៃឈើធម្មជាតិ និងគោរពសិទ្ធិមូលដ្ឋានរបស់ប្រជាជនម្ចាស់ស្រុក។
តែយ៉ាងណាក៏ដោយ ជាង១០ឆ្នាំមកនេះ អង្គភាពនេះ តែងតែត្រូវបានអង្គការ សមាគមនៅអឺរ៉ុប រិះគន់ជានិច្ច ថាមិនបានជួយអ្វីដល់ការកាត់បន្ថយផលប៉ះពាល់ បង្កឡើង ដោយឧស្សហកម្មនេះទេ។ ពីមួយឆ្នាំទៅមួយឆ្នាំ ឧស្សាហកម្មដូងប្រេងនេះ បានកាប់បំផ្លាញដីព្រៃធម្មជាតិ រាប់ម៉ឺនហិកតា នៅម៉ាឡេស៊ី នៅឥណ្ឌូណេស៊ីជាដើម ដែលនេះគឺជាផលប៉ះពាល់ធ្ងន់ធ្ងរបំផុត ដល់ប្រព័ន្ធជីវចម្រុះ ព្រមទាំងជីវភាពប្រជាជនមូលដ្ឋាន ដែលរស់នៅរំពឹងលើផលដែលបានមកពីព្រៃធម្មជាតិ។ អង្គការសមាគមខ្លះ បានអំពាវនាវ ឲ្យធ្វើពហិកា ឈប់ប្រើប្រាស់ផលិតផល ប្រេងដូងតទៅទៀត។
ប៉ុន្តែ លោក Stefano Savi អ្នកនាំពាក្យអង្គភាព RSPO បានលើកឡើងថា ផលិតផលប្រេងដូង ចាំបាច់ណាស់ ក្នុងឧស្សាហកម្មជាច្រើនវិស័យ។ បើទោះមិនប្រើប្រេងដូង គឺគេត្រូវប្រើប្រេងសណ្តែក។ ចំណែកប្រេងសណ្តែកនេះ គឺត្រូវការផ្ទៃដីធំលើសដល់ទៅ៤ដង ដើម្បីបានទិន្នផលស្មើនឹងប្រេងដូង។ ដូច្នេះការកាប់បំផ្លាញព្រៃឈើ គឺនៅតែមានដោយមិនអាចចៀសផុត។
អ្នកតំណាងអង្គភាពខាងលើនេះ បានអះអាងថា វេទិកាជជែកនៅទីក្រុងប៉ារីស ដើម្បីដាក់ចុះឲ្យមានការឆ្លើយឆ្លង ដោះដូរការយល់ឃើញ រវាងអង្គការសមាគមដែលប្រឆាំងផលិតផលប្រេងដូង ជាមួយនិងក្រុមឧស្សាហកម្មប្រេងដូង។ វេទិកានេះ ក៏ដើម្បីជម្រុញឲ្យមតិសាធារណៈបារាំង ស្វែងយល់ពីផលិតផលនេះ បើទោះបីផលប៉ះពាល់ខ្លះត្រូវតែមាន មិនអាចចៀសបាន។ ការធ្វើពហិការឈប់ប្រើ មិនមែនជាដំណោះស្រាយនោះទេ។
ក្នុងឆ្នាំ២០១៧ អង្គភាពRSPO ដែលមានសមាជិកចំនួន៣៨៧២ ទូទាំងពិភពលោក បានផ្តល់ផ្លាកសញ្ញាទទួលស្គាល់គុណភាព និងការគោរពបរិស្ថាន ទៅលើផលិតផលប្រេងដូងនេះ ចំនួន១២,២លានតោន ដែលស្មើនឹង១៩% នៃផលិតផលពិភពលោក។ អង្គភាពនេះ នឹងរៀបចំ ដាក់ចុះលក្ខខណ្ឌថ្មី ដែលមានលក្ខណៈឆ្លើយតបទៅនឹងតថៈភាពជាក់ស្តែង នឹងត្រូវសម្រេចអនុម័ត នៅក្នុងមហាសន្និបាទ ក្នុងខែវិច្ឆិកាខាងមុខ ដែលនឹងត្រូវធ្វើនៅកោះប័រណេអូ ប្រទេសម៉ាឡេស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ