តាលីបង់៖សេតវិមានផ្តល់ភ្លើងខៀវឲ្យទាហានអាមេរិក ធ្វើប្រតិបត្តិការវាយប្រហារនៅអាហ្វហ្កានីស្ថាន
ផ្ទុយពីអ្វីដែលលោកបារ៉ាក់ អូបាម៉ា ធ្លាប់បានសន្យា ថានឹងដកទ័ពចេញពីអាហ្វហ្គានីស្ថាន ទាំងស្រុងនៅមុនពេលចប់អាណត្តិលោក តែនៅពេលនេះ រដ្ឋាភិបាលសហរដ្ឋអាមេរិក ទើបបានសម្រេចថានឹងបើកភ្លើងខៀវ អនុញ្ញាតិឲ្យកងទ័ពអាមេរិក អាចធ្វើប្រតិបត្តិការវាយប្រហារដោយផ្ទាល់ ដើម្បីជួយកងទ័ពរដ្ឋាភិបាលអាហ្វហ្កានីស្ថាន។ ការសម្រេចបែបនេះ គឺជាការទាមទាររបស់អគ្គបញ្ជាការកងទ័ពអាមេរិក ដោយគេសង្កេតឃើញថា កងទ័ពអាហ្វហ្កានីស្ថាន កំពុងធ្លាក់ដៃខ្លាំង ហើយត្រូវការជំនួយ ដើម្បីទប់ទល់ជាមួយពួកតាលីបង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៥០
ធ្វើសង្រ្គាម១៥ឆ្នាំ ទីបំផុតក្រុមតាលីបង់ខ្លាំងលើសដើម៖
ដូចយើងដឹងស្រាប់ហើយ សង្រ្គាមនៅអាហ្វហ្កានីស្ថាន បានចាប់ផ្តើម កាលពីឆ្នាំ២០០១ ក្រោយពេលដែលពួកតាលីបង់ បានវាយប្រហារភេរវកម្មនៅសហរដ្ឋអាមេរិក។ មកត្រឹមពេលនេះ គឺ១៥ឆ្នាំហើយ តែសង្រ្គាមនេះមិនទាន់ចប់ទេ វាក៏ជាសង្រ្គាមដ៏វែងអន្លាយរបស់សហរដ្ឋអាមេរិកដែរ។ សង្រ្គាមមិនត្រឹមតែមិនចប់ តែក្រុមតាលីបង់ កាន់តែមានកម្លាំងខ្លាំង ជាងមុនទៀត ព្រោះរាល់ថ្ងៃនេះ ក្រុមតាលីបង់ មានដែនដីគ្រប់គ្រងនៅអាហ្វហ្កានីស្ថាន ធំជាងកាលពីមុនអន្តរាគមន៍របស់អាមេរិក នៅឆ្នាំ២០០១ទៅទៀត។ ចង់មិនចង់ យើងអាចសន្មត់ថា អាមេរិកចាញ់សង្រ្គាមទៅហើយ។
លោកអូបាម៉ា ពេលដែលបានចូលកាន់តំណែងជាប្រធានាធីបតី បានសន្យាថា នឹងដកទ័ពចេញពីអាហ្វហ្គានីស្ថាន ទុកឲ្យនៅតែ៥០០០នាក់ ប៉ុណ្ណោះនៅពេលលោកចប់អាណត្តិ ចុងឆ្នាំ២០១៦។ ក៏ប៉ុន្តែកាលពីឆ្នាំ២០១៥ គាត់បានទទួលស្គាល់ថា ស្ថានភាពនៅសមរភូមិផ្ទាល់ គឺវាខុសពីអ្វីដែលរំពឹងទុក ដូច្នេះការដកទ័ព ត្រូវតែធ្វើដោយប្រុងប្រយ័ត្ន និងដោយយោងទៅលើស្ថានភាពជាក់ស្តែងនៅអាហ្វហ្កានីស្ថាន។ បច្ចុប្បន្ននេះ ទាហានអាមេរិក ដែលឈរជើងនៅអាហ្វហ្គានីស្ថាន មានចំនួនប្រមាណជា១ម៉ឺននាក់។
ប្តូរយុទ្ធសាស្ត្រ៖
សម្រាប់យុទ្ធសាស្ត្រថ្មីនាពេលនេះ ខាងសេតវិមានបានបញ្ជាក់ថា លោកបារ៉ាក់អូបាម៉ា បានយល់ព្រមសុខចិត្តផ្តល់លទ្ធភាពថ្មីបន្ថែមទៀត ទៅឲ្យកងទ័ពអាមេរិក ក្នុងការចូលរួមធ្វើប្រតិបត្តិការវាយប្រហារដោយផ្ទាល់ ព្រោះថាកន្លងមករហូតមកដល់ពេលនេះ កងទ័ពអាមេរិកដែលនៅសល់ គឺមិនមានសិទ្ធិទៅប្រយុទ្ធ រឺធ្វើអន្តរាគមន៍ តទល់ជាមួយនឹងក្រុមតាលីបង់ទេ។ កងទ័ពអាមេរិកមានតួនាទី ចាំជួយកងទ័ពរដ្ឋាភិបាលអាហ្វហ្កានីស្ថាន ផ្នែកយុទ្ធសាស្ត្រ ជួយហ្វឹកហាត់និងផ្នល់ទិន្ន័យតែប៉ុណ្ណោះ។
ដូច្នេះជាមួយនឹងការបើកភ្លើងខៀវនាពេលនេះ មានន័យថា ទាហានអាមេរិក អាចអន្តរាគមន៍ជួយកងទ័ពអាហ្វហ្កានីស្ថានបាន នៅជិតសមរភូមិផ្ទាល់ តាមរយៈការប្រើយន្តហោះទម្លាក់គ្រាប់ រឺយន្តហោះប្រដេញជាដើម។ តែយ៉ាងណាក៏ដោយ ទាហានថ្មើរជើងអាមេរិក នៅតែមិនអាចនៅជួរមុខដដែល លើកលែងតែក្រុមកុម្មង់ដូពិសេសរបស់អាមេរិកទេ។
កងទ័ពអាហ្វហ្កានីស្ថាន គ្មានសមត្ថភាពតទល់ក្រុមតាលីបង់៖
តាតមពិតទៅ អ្វីៗមិនមែនលោកអូបាម៉ា សម្រេចតែម្នាក់ឯងទេ។ ការបើកភ្លើងខៀវ ផ្តល់លទ្ធភាពធ្វើអន្តរាគមន៍របស់កងទ័ពអាមេរិក គឺត្រូវបានខាងកងទ័ព ខាងមេបញ្ជាការធំៗរបស់អាមេរិកខ្លួនឯងផ្ទាល់ ទាមទារជាច្រើនខែមកហើយ។ បើយើងគិតទៅ គឺវាមិនខុសពីមនុស្សម្នាក់ ដែលឃើញភ្លើងឆេះផ្ទះ តែមិនអាចទៅជួយពន្លត់បាន ព្រោះត្រូវគេចងដៃចងជើងជាប់។ កងទ័ពអាមេរិក ក៏អញ្ចឹងដែរ។
កងទ័ពអាមេរិកដែលប្រចាំការនៅអាហ្វហ្កានីស្ថាន បានឃើញយ៉ាងច្បាស់ ពីភាពទន់ខ្សោយទាំងខាងបច្ចេកទេស ទាំងខាងយុទ្ធសាស្ត្ររបស់កងទ័ពអាហ្វហ្កានីស្ថាន។ កងទ័ពអាហ្វហ្កានីស្ថាន ខ្វះការគ្រប់គ្រងដែលមានប្រសិទ្ធភាព ខ្វះសម្ភារៈសំខាន់ៗ ដូចជាយន្តហោះស៊ើបការណ៍ ឧត្ថម្ភាគចក្រជាដើម។ កងទ័ពអាមេរិក បានត្រឹមតែឱបដៃមើល កងទ័ពអាហ្វហ្កានីស្ថាន ដកថយម្តងបន្តិចៗ បោះបង់ចោលដែនដី ព្រោះចាញ់ក្រុមអ៊ីស្លាមតាលីបង់។ គ្រាន់តែក្នុងឆ្នាំ២០១៥មួយ មានទាហានអាហ្វហ្កានីស្ថានស្លាប់ដល់ទៅ៥០០០នាក់។ ដូច្នេះ បើបន្តទៅមុខទៀត ក្រុមតាលីបង់ អាចនឹងកាន់កាប់អាហ្វហ្កានីស្ថានទាំងមូលមិនខានទេ។
ធម៌ត្រជាក់មិនបានផល ប្រើធម៌ក្តៅ៖
ចំនុចមួយទៀត ដែលជំរុញឲ្យរដ្ឋាភិបាលលោកអូបាម៉ា ប្តូរយុទ្ធសាស្ត្រនាពេលនេះ គឺដោយសារនយោបាយត្រជាក់ ចង់ដោះស្រាយបញ្ហា ដោយការចរចាសន្តិភាព វាមិនបានលទ្ធផលសោះ។ កាលពីដើមខែឧសភា កន្លងទៅនេះ រដ្ឋាភិបាលអាហ្វហ្កានីស្ថាន និងសហរដ្ឋអាមេរិក បានព្យាយាមរៀបចំ កិច្ចប្រជុំចរចាជាច្រើនលើក តែក្រុមតាលីបង់បានបដិសេធមិនចូលតុចរចាទេ។
សហរដ្ឋអាមេរិក ដឹងយ៉ាងច្បាស់ថា មេដឹកនាំធំរបស់តាលីបង់ ដែលឈ្មោះ Akhtar Mansour គឺជាមនុស្សរឹងទទឹងណាស់។ មនុស្សនេះ មិនព្រមចុះញ៉ម មកចរចាជាដាច់ខាត។ អញ្ចឹងហើយ បានជានៅថ្ងៃទី២១ ឧសភា កងទ័ពអាមេរិក ដោយមានការបើកដៃពីសេតវិមាន បានប្រើយន្តហោះដ្រូនបាញ់កម្ទេច ដើម្បីសំលេះ ជនឈ្មោះ Akhtar Mansour នេះចោល។
គ្រាន់តែមនុស្សនេះស្លាប់ភ្លាម ពួកតាលីបង់បានតែងតាំងមនុស្សថ្មីភ្លាម គឺឈ្មោះ Haibattullah Akhundzada។ ហើយតាមការប៉ាន់ស្មាន មនុស្សថ្មីនេះ រឹតតែសាហាវ និងរឹងរូសជាងមេពួកវាមុនទៅទៀត។ ដូច្នេះ បើប្រើធម៌ត្រជាក់មិនបានផល អាមេរិកត្រូវប្រើធម៌ក្តៅ។ លោកអូបាម៉ា ធ្លាប់បានមានប្រសាសន៍ថា ចង់បញ្ចប់សង្រ្គាម គឺជារឿងមួយលំបាកណាស់ មិនដូចបង្កើតសង្រ្គាមទេ។ ដកទ័ពដកពេលណាក៏បាន តែសួរថាបើដកទៅ ដើម្បីទុកឲ្យក្រុមតាលីបង់គ្រប់គ្រងអាហ្វហ្កានីស្ថាន តើវាជារឿងគួរធ្វើដែររឺទេ?
ប៉ាគីស្ថាន ជាពស់ក្បាលពីរ៖
ប៉ាគីស្ថាន មានតួនាទីសំខាន់ណាស់ ជុំវិញបញ្ហាពួកតាលីបង់។ ប៉ាគីស្ថានជាបង្អែករបស់ក្រុមតាលីបង់ ប៉ាគីស្ថានជាជង្រុកលាក់ខ្លួន របស់មេតាលីបង់។ អ្នកវិភាគខ្លះ ហ៊ានដល់ទៅនិយាយទៀតថា គឺប៉ាគីស្ថានតែម្តង ដែលចិញ្ចឹមពួកតាលីបង់។ ជាផ្លូវការ រដ្ឋាភិបាលប៉ាគីស្ថាន បង្ហាញពីគោលជំហរ ក្នុងការជួយជ្រោមជ្រែង ជួយសម្រួលដល់ការចរចាសន្តិភាព រវាងពួកតាលីបង់ និងរដ្ឋាភិបាលអាហ្វហ្កានីស្ថាន។ តែធាតុពិត គឺកងទ័ពប៉ាគីស្ថាននេះតែម្តង ដែលជួយលាក់ ជួយទំនុកបំរុង ពួកតាលីបង់ខ្លះ ដែលមានមូលដ្ឋាន នៅភាគខាងជើងប៉ាគីស្ថាន។
យុទ្ធសាស្ត្ររបស់ប៉ាគីស្ថាន ត្រូវបានអ្នកវិភាគយល់ថា ប៉ាគីស្ថានចង់ប្រើក្រុមតាលីបង់ជាឈ្នាន់ ដើម្បីអាចមានឥទ្ធិពលទៅលើរដ្ឋាភិបាលអាហ្វហ្កានីស្ថាន។ ធ្វើអញ្ចឹង គឺដើម្បីទប់ កុំឲ្យអាហ្វហ្កានីស្ថាន ធ្លាក់ទៅក្នុងឥទ្ធិពលរបស់ឥណ្ឌា ដែលជាសត្រូវធំរបស់ប៉ាគីស្ថាន។ ពួកមេទ័ពធំៗរបស់ប៉ាគីស្ថាន នៅតែចិញ្ចឹមចិត្តថា ថ្ងៃណាមួយនឹងធ្វើសង្រ្គាមជាមួយឥណ្ឌា។ ដូច្នេះ ប៉ាគីស្ថានត្រូវប្រមូលក្រុមតាលីបង់ ឲ្យនៅខាងខ្លួន ដើម្បីប្រើប្រាស់ដែនដីតាលីបង់នៅភាគខាងជើងអាហ្វហ្កានីស្ថាន ជាសមរភូមិក្រោយ ក្នុងករណីដែលឥណ្ឌា វាយលុក។
តែមកដល់តំណាក់កាលនេះ រដ្ឋាភិបាលលោកអូបាម៉ា មិនអាចអត់ទ្រាំនឹងនយោបាយពស់ក្បាលពីររបស់ប៉ាគីស្ថានបានទៀតទេ។ ប៉ាគីស្ថានជាមិត្តរបស់អាមេរិក មែនពិត តែបើមិត្តម្នាក់នេះ លួចលាក់លៀម បោះដៃទៅឲ្យសត្រូវធំរបស់អាមេរិក គឺអាមេរិកមិនអាចទុកមុខឲ្យទេ។ ពេលនេះ រដ្ឋាភិបាលលោកអូបាម៉ា លែងសង្ឃឹមរឿងចរចា ដែលប៉ាគីស្ថានសន្យាថាជួយទៀតហើយ។ ពេលនេះ អាមេរិកបើកលទ្ធភាពឲ្យកងទ័ពខ្លួន ធ្វើអន្តរាគមន៍ដោយផ្ទាល់ ដើម្បីកម្ទេចក្រុមតាលីបង់។ មេបញ្ជាការធំៗរបស់អាមេរិក បានទាមទារថា ត្រូវតែរក្សាកម្លាំងដែលនៅសល់ប្រមាណ១ម៉ឺននាក់ ឲ្យនៅឈរជើងបន្តទៀត។ តែតាមការឲ្យដឹងពីអ្នកនាំពាក្យសេតវិមាន រដ្ឋាភិបាលអាមេរិក និងធ្វើការសម្រេចចិត្ត ក្រោយពេលបើកការប្រជុំជាមួយនឹងអង្គការOTAN នៅថ្ងៃទី៨ កក្កដា ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ