ទីក្រុងបាងកកស្លុតចិត្ត នៅចំពោះមុខការខូចខាតខ្ទេចខ្ទី
ម្សិលមិញ ក្រោយពីក្រុមមេដឹកនាំរបស់ពួកគេបានសុំចុះចាញ់និងបានប្រគល់ខ្លួន ទៅឲ្យអាជ្ញាធររួចមក ពួកបាតុករអាវក្រហមខ្លះដែលនៅមិនសុខចិត្ត បាននាំគ្នាដុតបំផ្លាញអគារនិងមជ្ឈមណ្ឌលពាណិជ្ជកម្មជាច្រើនកន្លែង ក្នុងទីក្រុងបាងកក។ នៅថ្ងៃព្រហស្បតិ៍ទី២០ឧសភានេះ ភាពស្ងប់ស្ងាត់បានវិលមកវិញបណ្តើរៗហើយ។
ចុះផ្សាយនៅថ្ងៃ៖
ព័ត៌មានឆ្លើយឆ្លងពីទីក្រុងបាងកក ដែលប្រែសម្រួលដោយ តាន់ ហ្សង់-ហ្វ្រង់ស័រ
មួយថ្ងៃ ក្រោយពីកងទ័ពបានវាយលុកទៅលើជំរំរបស់ពួកអាវក្រហមរួចមក ភាពស្ងប់ស្ងាត់បានវិលមកគ្របដណ្តប់ទៅលើទីក្រុងបាងកកវិញហើយ។ ក៏ប៉ុន្តែ ទិដ្ឋភាពរួមបង្ហាញឲ្យឃើញនូវស្លាកស្នាមនៃអំពើហិង្សា។ ចំនួនអ្នកស្លាប់ក្នុងអន្តរាគមន៍យោធា កាលពីម្សិលមិញ បានកើនទៅដល់១៦នាក់។ អគារនៃមជ្ឈមណ្ឌលពាណិជ្ជកម្មមួយដែលមានកម្ពស់៧ជាន់ បានបាក់រលំ ក្រោយពីត្រូវបានឆេះភ្លើង ពេញមួយយប់មិញ។
ពីអ្នកឆ្លើយឆ្លងព័ត៌មានរបស់វិទ្យុRFI នៅបាងកកប្រទេសថៃ Arnaud Dubus
«គេបានរកឃើញសាកសពអ្នករងគ្រោះ៩នាក់ទៀតជាបន្ថែមនៅថ្ងៃព្រហស្បតិ៍ទី២០ឧសភានេះនៅក្នុងវត្តPathum Wanaram ជាទីដែលពេញមួយយប់មិញពួកបាតុករអាវក្រហមជិតមួយពាន់នាក់បានទៅពួនលាក់ខ្លួន។ជនរងគ្រោះទាំង៩នាក់សុទ្ធតែបានត្រូវគ្រាប់របួសរួចហើយស្លាប់កាលពីយប់មិញ។
នៅជិតវត្តនោះគឺជាទីតាំងនៃមជ្ឈមណ្ឌលពាណិជ្ជកម្ម Central World។ អគារដ៏ធំនេះ ដែលមានកម្ពស់៧ជាន់ ប្រវែង២០០ម៉ែត្រត្រូវបានគេដុតបំផ្លាញបានឆេះពេញមួយយប់ និងបានបាក់រលំនៅសល់តែគ្រោងឆ្អឹង។
នៅលើផ្លូវRajdamari វិញ ជាទីប្រយុទ្ធគ្នាកាលពីម្សិលមិញរវាងកងទ័ព និងពួកអាវក្រហម ផ្សារទំនិញឈ្មោះBiC C ដែលក៏ត្រូវបានគេដុតបំផ្លាញដែរនោះ នៅបន្តមានផ្សែងភ្លើងនៅឡើយកាលពីព្រឹកមិញ ពីព្រោះ កាលពីយប់មិញ ក្រុមអ្នកពន្លត់អគ្គីភ័យមិនអាចចូលទៅធ្វើអន្តរាគមន៍នៅទីនោះបាន»។
នៅថ្ងៃនេះ កាសែតចេញផ្សាយនៅទីក្រុងបាងកក បាននាំគ្នាធ្វើអត្ថាធិប្បាយទៅលើអំពើហិង្សាកាលពីម្សិលមិញ និងទៅលើស្ថានការណ៍ទូទៅនៃប្រទេស។
យើងបន្តស្តាប់អ្នកឆ្លើយឆ្លងព័ត៌មានរបស់វិទ្យុRFI នៅបាងកក Arnaud Dubus
«ចំណងជើងធំៗរបស់កាសែតចេញផ្សាយនៅបាងកក ចាប់អារម្មណ៍ទៅលើទិដ្ឋភាពរួមនៃទីក្រុងដែលបានទទួលរងការបំផ្លិចបំផ្លាញ។ Bangkok Post សរសេរថា បាងកក ខ្ទេចខ្ទី។ រីឯThe Nation វិញ ដាក់ថា អនាធិបតេយ្យ។ The Nation ដដែល សម្តែងឲ្យឃើញនូវការស្លុតចិត្ត និងការខឹងសម្បារ នៅចំពោះមុខការខូចខាតខ្ទេចខ្ទីបង្កឡើង កាលពីយប់មិញដោយពួកបាតុករអាវក្រហម។
កាសែតទាំងនេះដែលមានជំហរគាំទ្ររដ្ឋាភិបាលនិងដែលមិនពេញចិត្តនឹងពួកអាវក្រហមសរសេរគាំទ្រនាយករដ្ឋមន្ត្រីអាភីស៊ីត និងយុទ្ធសាស្រ្តរបស់លោក ក្នុងដំណោះស្រាយវិបត្តិនយោបាយនេះ ។ Bangkok Post ថែមទាំងប្រៀបប្រដូចអាភីស៊ីត ទៅនឹងអតីតប្រធានាធិបតីអាមេរិក សម័យសង្គ្រាមអបគមន៍ គឺលោកLincoln ទៀតផង។
សម្រាប់Bangkok Post ក្នុងរយៈកាលខ្លី អន្តរាគមន៍យោធាបង្ក្រាបពួកអាវក្រហម នឹងច្បាស់ជានាំមកនូវផលវិបាកវិជ្ជមានដល់លោកអាភីស៊ីត ដោយសារថារដ្ឋាភិបាលរបស់លោក នឹងអាចបន្តដឹកនាំប្រទេសរហូតទៅដល់ឆ្នាំក្រោយ២០១១។ ក៏ប៉ុន្តែ ក្នុងរយៈកាលវែង នៅពេលដែលនឹងត្រូវរៀបចំបោះឆ្នោត ពេលដែលពលរដ្ឋនឹងនឹកឃើញទៅដល់ជនស៊ីវិល ច្រើនសន្ធឹកសន្ធាប់ដែលបានស្លាប់ ពេលនោះបក្សប្រជាធិបតេយ្យរបស់អាភីស៊ីតនឹងអាចបាត់បង់ ប្រជាប្រិយ៍ភាព»។
អ្វីដែលជាក់ច្បាស់ គឺរដ្ឋាភិបាលអាភីស៊ីតនឹងច្បាស់ជាឈ្នះចម្បាំង នៅទីក្រុងបាងកកពីព្រោះ នៅពេលនេះ ពួកមេដឹកនាំអាវក្រហមបានសុំចុះចាញ់អស់ហើយ រីឯភាពស្ងប់ស្ងាត់និងសណ្តាប់ធ្នាប់នឹងវិលមកវិញជាបណ្តើរៗ នៅក្នុងរាជធានី។ ក៏ប៉ុន្តែ អាភីស៊ីតមិនទាន់ឈ្នះសង្គ្រាមទេ ពីព្រោះដូចដែលថាក់ ស៊ីនបានប្រកាសប្រាប់ ទីភ្នាក់ងារReuters អ៊ីចឹងថា អន្តរាគមន៍យោធាវាយបង្ក្រាបពួកអាវក្រហមកាលពីម្សិលមិញ នឹងអាចបង្កឲ្យមានសង្គ្រាមទ័ពពៃ្រ នៅតាមជនបទស្រុកស្រែចម្ការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ