ជំនួបកំពូលប្រចំាឆ្នំាត្រីភាគី ស្ថិតក្រោមវិបត្តិនៅឧបទ្វីបកូរ៉េ
ជំនួបកំពូលប្រចំាឆ្នំាត្រីភាគី រវាងប្រទេសកូរ៉េខាងត្បូង ជប៉ុន និងប្រទេសចិនបានបិទបញ្ចប់សម័យប្រជុំរយៈពេល ២ថ្ងៃនៅលើកោះ Jeju ក្នុងទឹកដីកូរ៉េខាងត្បូង។ វិបត្តិរវាងកូរ៉េខាងជើង និងខាងត្បូងគឺជាប្រធានបទចម្បងនៃជំនួបកំពូលត្រីភាគីប្រចំាឆ្នំា ២០១០ រវាងប្រទេសកូរ៉េខាងត្បូង ជប៉ុន និងប្រទេសចិន។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ គួច គន្ធារ៉ា
វត្តមានរបស់ប្រទេសចិន គឺលោកនាយករដ្ឋមន្រ្តី Wen Jiabao វត្តមានរបស់ប្រទេសជប៉ុន គឺលោកនាយករដ្ឋមន្ត្រី Yukio Hatoyama និងវត្តមានរបស់កូរ៉េខាងត្បូងដែលជាម្ចាស់ផ្ទះ គឺលោកប្រធានាធិបតី លីម្យ៉ុងបាក់ (Lee Myung-Bak)។ គោលដៅសំខាន់នៃជំនួបកំពូលត្រីភាគីប្រចំាឆ្នំា គឺការពង្រឹងកិច្ចសហប្រតិបត្តិការនៅលើគ្រប់វិស័យមានដូចជា វិស័យសេដ្ឋកិច្ច សន្តិសុខ ការការពារបរិស្ថាន និងការផ្តោះប្តូរនៅក្នុងវិស័យវប្បធម៌រវាងគ្នាជាដើម។
និយាយពីកិច្ចសហប្រតិបត្តិការសេដ្ឋកិច្ច ប្រមុខរដ្ឋ និងប្រមុខរដ្ឋាភិបាលទំាង៣រូបបានប្តេជ្ញាចិត្តថា នឹងសម្រេចឲ្យបានចាប់ពីពេលនេះ រហូតដល់ឆ្នំា ២០១២ នូវកិច្ចព្រមព្រៀងផ្តោះប្តូរដោយសេរីរវាងប្រទេសទំាងបី ពោលគឺបង្កើតឲ្យបានតំបន់សេដ្ឋកិច្ចរួមគ្នាមួយ និងការពង្រីកបន្ថែមនូវបរិមាណនៃការផ្តោះប្តូរពាណិជ្ជកម្មចាប់ពីពេលនេះរហូតដល់ឆ្នំា ២០២០។ ជាមួយគ្នានេះ ភាគីទំាងបីក៏នឹងត្រូវបន្តការចរចាស្តីពីកិច្ចព្រមព្រៀងលើវិស័យវិនិយោគ ក្នុងគោលដៅបង្កលក្ខណៈងាយស្រួលដល់កិច្ចសហប្រតិបត្តិការរវាងក្រុមអ្នកវិនិយោគនៅក្នុងតំបន់។ មួយវិញទៀត ភាគីទំាងបីក៏បានបញ្ជាក់ជាថ្មីម្តងទៀត អំពីសារៈសំខាន់នៅក្នុងកិច្ចសហប្រតិបត្តិការនៅក្នុងវិស័យហិរញ្ញវត្ថុ វិទ្យាសាស្រ្ត និងបច្ចេកវិទ្យា។ ភាគីទំាងបីយល់ឃើញថា ការបើកឲ្យមានប្រព័ន្ធពាណិជ្ជកម្មរួមមួយដែលមានលក្ខណៈសេរី និងយុត្តិធម៌ គឺបានផ្តល់ផលប្រយោជន៍ឲ្យទំាងប្រទេសចិន ជប៉ុន កូរ៉េខាងត្បូង និងពិភពលោក។
និយាយពីកិច្ចសហប្រតិបត្តិការការពារបរិស្ថាន ថ្នាក់ដឹកនំាទំាងបីបានគូសបញ្ជាក់អំពីភាពចំាបាច់ដែលប្រទេសទំាងបីត្រូវតែមានជំហររួមគ្នា ក្នុងការជួយជំរុញឲ្យជំនួបកំពូលស្តីពីអាកាសធាតុនៅក្នុងប្រទេសម៉ិចស៊ិក នាចុងឆ្នំា ២០១០ ទទួលបានជោគជ័យ។
ទាក់ទងនឹងសន្តិភាព និងស្ថិរភាពនៅក្នុងតំបន់វិញ ប្រមុខរដ្ឋ និងប្រមុខរដ្ឋាភិបាលទំាង៣រូបបានបញ្ជាក់រួមគ្នាថា ឧបទ្វីបកូរ៉េគ្មានអាវុធនុយក្លេអ៊ែរនឹងនំាមកនៅសន្តិភាពយូរអង្វែង សន្តិសុខ និងសេដ្ឋកិច្ចរុងរឿងនៅក្នុងតំបន់។
ចិនបានអំពាវនាវឲ្យស្ងប់ស្ងាត់ និងមិនព្រមថ្កោលទោសកូរ៉េខាងជើង
ការអំពាវនាវនេះត្រូវបានធ្វើឡើងតាមរយៈសេចក្តីថ្លែងការណ៍របស់លោកនាយករដ្ឋមន្រ្តីចិន Wen Jiabao។ នៅក្នុងសេចក្តីថ្លែងការណ៍នោះ លោក Wen Jiabao បានជៀសវាងមិននិយាយពីជំហររបស់ចិនចំពោះសម្ព័ន្ធមិត្តកូរ៉េខាងជើងរបស់ខ្លួនទេ។ ចំពោះលោក Wen Jiabao អ្វីដែលសំខាន់ និងជាបន្ទាន់នៅចំពោះមុខ គឺកាត់បន្ថយភាពតានតឹង និងជៀសវាងការប្រឈមមុខដាក់គ្នាតាមផ្លូវសង្រ្គាម។ លោក Wen Jiabao បានបន្ថែមថា បើឧបទ្វីបកូរ៉េគ្មានសន្តិភាព និងស្ថិរភាពទេ នោះក៏គ្មានការអភិវឌ្ឍន៍នៅក្នុងតំបន់អាស៊ីបូព៌ាដែរ។ ការប្រកាសរបស់លោក Wen Jiabao នៅពេលនេះ មិនបានធ្វើឲ្យគេភ្ញាក់ផ្អើលទេ ព្រោះថាតំាងពីវិបត្តិកូរ៉េបានផ្ទុះជាថ្មីមក ចិនគ្មានចេតនាណាមួយ ដើម្បីដាក់ទណ្ឌកម្មលើកូរ៉េខាងជើងទេ។
លោកប្រធានាធិបតីកូរ៉េខាងត្បូង លីម្យ៉ុងបាក់ បានយល់ច្បាស់ណាស់ថា ដើម្បីអាចឲ្យក្រុមប្រឹក្សាសន្តិសុខអង្គការសហប្រជាជាតិថ្កោលទោស និងដាក់ទណ្ឌកម្មលើកូរ៉េខាងជើងបាន លុះត្រាតែមានវត្តមានគំាទ្រពីប្រទេសចិន។ ទណ្ឌកម្មលើកូរ៉េខាងជើងអាចចេញរួចឬមិនរួច គឺអាស្រ័យលើចិនដែលជាសមាជិកអចិន្រ្តៃយ៍និងជាខ្នងបង្អែករបស់កូរ៉េខាងជើង។ សូមរំលឹកជូនថា ភាពតានតឹងរវាងកូរ៉េខាងជើង និងខាងត្បូងបានផ្ទុះដល់កំពូលជាថ្មី បន្ទាប់ពីមានភស្តុតាងដែលបញ្ជាក់ថា កូរ៉េខាងជើងជាអ្នកបាញ់ពន្លិចនាវាចម្បំាងកូរ៉េខាងត្បូងកាលពីខែមិនាកន្លងទៅ ដោយបានផ្តាច់ជីវិតទាហានកូរ៉េខាងត្បូងចំនួន ៤៦នាក់។
រហូតមកទល់ពេលនេះ របបក្រុងសេអ៊ូលបានចាត់វិធានការយ៉ាងចាស់ដៃទៅលើរបបក្រុងព្យុងយ៉ាង តាមរយៈការផ្តាច់ទំនាក់ទំនងពាណិជ្ជកម្ម ការបិទផ្លូវនាវាចរណ៍ និងចាប់ផ្តើមដាក់មីក្រូឡើងវិញនៅតាមព្រំដែន ដើម្បីផ្សព្វផ្សាយព័ត៌មានរិះគន់របបកុម្មុយនិស្តក្រុងព្យុងយ៉ាង។ វិធានការផ្ទៃក្នុងទំាងអម្បាលម៉ានរបស់កូរ៉េខាងត្បូងដែលត្រូវបានទទួលការគំាទ្រទំាងស្រុងពីសំណាក់ប្រទេសជប៉ុន និងសហរដ្ឋអាមេរិក។
សង្រ្គាមកូរ៉េផ្ទុះជាថ្មី ?
តំាងពីពេលដែលកូរ៉េខាងត្បូងបានទទួលភស្តុតាងថា កូរ៉េខាងជើងជាអ្នកបាញ់ពន្លិចនាវាចម្បំាងរបស់ខ្លួនមក លោកប្រធានាធិបតីកូរ៉េខាងត្បូង លី ម្យ៉ុងបាក់ (Lee Myung-bak) បានប្រកាសឲ្យដឹងនូវវិធានការមួយចំនួន មានទំាងវិធានការតាមផ្លូវយោធាផង ដើម្បីជាការតបតនឹងកូរ៉េខាងជើង។ ប៉ុន្តែក្រុមអ្នកវិភាគបានយល់ឃើញថា វិបត្តិរវាងកូរ៉េនាពេលបច្ចុប្បន្នអាចនឹងនំាឲ្យមានការប៉ះទង្គិចគ្នាតាមផ្លូវអាវុធ តែមិនរហូតដល់ផ្ទុះសង្រ្គាមរវាងគ្នាដូចក្នុងទសវត្សឆ្នំា ៥០ -៥៣ទេ ព្រោះថាទីមួយ៖ កូរ៉េខាងត្បូងគ្មានប្រយោជន៍អ្វីនឹងធ្វើសង្រ្គាមជាមួយកូរ៉េខាងជើងទេ ទោះបីជាទាហានរបស់ខ្លួនមានការហ្វឹកហ្វឺន មានសព្វាវុធទំនើបៗ និងមានវត្តមានទ័ពអាមេរិកំាងប្រចំាការនៅទីនោះជិត ៣ម៉ឺននាក់ក៏ដោយ និងទីពីរទៀតនៅកូរ៉េខាងត្បូង គ្មានពលរដ្ឋណាម្នាក់ចង់ឃើញសង្រ្គាមកូរ៉េផ្ទុះឡើងសាជាថ្មីទេ។ នៅខាងកូរ៉េខាងជើងវិញ របប Staline និយមរបស់លោក គីម យ៉ុងអ៊ីល ក៏មិនហ៊ានប្រថុយប្រថានវាយប្រហារទៅលើកូរ៉េខាងត្បូងទេ ទោះបីជាខ្លួនមានចំនួនទ័ពច្រើនជាងកូរ៉េខាងត្បូងក៏ដោយ។
ដូច្នេះបើពិនិត្យជារួមជម្រើសកាត់ផ្តាច់ទំនាក់ទំនងពាណិជ្ជកម្មជាមួយកូរ៉េខាងជើងដែលលោកប្រធានាធិបតីកូរ៉េខាងត្បូង លី ម្យ៉ុងបាក់ (Lee Myung-bak) បានសម្រេចនាពេលនេះជាជម្រើសមួយសមរម្យដោយមិនចំាបាច់សុំការយល់ព្រមពីប្រទេសណាមួយទេ។ សំណួរដែលចោទនៅត្រង់ថា តើវិធានការនេះនឹងមានប្រសិទ្ធិភាពកំរិតណា ?
និយាយពីទណ្ឌកម្មរបស់អន្តរជាតិវិញក៏ដូចគ្នាដែរ។ កន្លងមកទណ្ឌកម្មថ្កោលទោសលើកូរ៉េខាងជើងធ្លាប់មានជាហូរហែទាក់ទងនឹងសំណុំរឿងនុយក្លេអ៊ែរ។ តែមិនដែលបានធ្វើឲ្យកូរ៉េខាងជើងរាងចាលទេ។ ផ្ទុយទៅវិញរឹតតែជំរុញឲ្យរបបក្រុងព្យុងយ៉ាងកាន់តែបន្តផ្គើនសហគមន៍អន្តរជាតិបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ