ភាពក្រីក្រដែលគេមើលមិនឃើញនៅជប៉ុន
បុគ្គលិករាប់លាននាក់មានការងារមិនឋិតថេរ ស្រ្តីជាម្តាយចិញ្ចឹមកូនតែម្នាក់ឯងមានកាន់តែច្រើន និងមនុស្សចាស់ដែលពិបាកនឹងរកទទួលទាន ចិញ្ចឹមជីវិត។ ភាពតោកយ៉ាកទាំងនេះដែលគេឲ្យឈ្មោះថា ភាពក្រីក្រដែលគេមើលមិនឃើញ កំពុងរំខានជប៉ុន មហាអំណាចសេដ្ឋកិច្ចពិភពលោកទីពីរបន្ទាប់ពីអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តី រាយការណ៍របស់ឈាង បុប្ផា
ប្រជាជនជប៉ុនរស់នៅក្នុងជីវភាពរុងរឿង។ រូបភាពនេះបានក្លាយទៅជារឿងព្រេងទៅហើយ នៅពេលដែលលទ្ធផលស្រាវជ្រាវមួយបង្ហាញថា នៅពេលបច្ចុប្បន្ននេះ ប្រជាជនជប៉ុនម្នាក់ក្នុង ចំណោម៦ នាក់កំពុងរស់នៅក្រោមខ្សែបន្ទាត់នៃភាពក្រីក្រ។ ការស្រាវជ្រាវដែលបានចេញផ្សាយ នាចុងឆ្នាំមុន និងជាលើកទីមួយ នៅប្រទេសជប៉ុនបានធ្វើឲ្យប្រជាជនជប៉ុនន្ធត់ចិត្តយ៉ាងខ្លាំង។ ប្រជាជនជប៉ុនដែលធ្លាប់គិតថា ពួកគេរស់នៅក្នុងប្រទេសមួយដែលមានប្រជាជនរស់នៅក្នុងភាពស្មើភាពគ្នា។
ជាការពិត សេដ្ឋកិច្ចជប៉ុនធ្លាប់ទទួលភាពរុងរឿងក្នុងទសវត្សរ៍ឆ្នាំ ៦០ និងឆ្នាំ ៧០ រហូតទទួលបានឈ្មោះជាប្រទេសនាគក្នុងតំបន់អាស៊ី។ ប៉ុន្តែភាពរុងរឿងនេះបានលិចបាត់បន្តិចម្តងៗ ចាប់តាំងពីទសវត្សរ៍ឆ្នាំ ៩០ ពោលគឺ នៅពេលដែលកុងត្រាការងារអស់មួយជីវិតត្រូវគេលុបចោល។ ជាជំនួសមកវិញ ការងារមិនឋិតថេរ និងកុងត្រារយៈពេលខ្លី កាន់តែកើនឡើង និងធ្វើឲ្យប្រជាជនជប៉ុនធ្លាក់ទៅក្នុងភាពក្រីក្រ ដោយមិនដឹងខ្លួន។ វិបត្តិសេដ្ឋកិច្ចពិភពលោក ចាប់តាំងពីឆ្នាំ ២០០៨ ដែលជប៉ុនជួបប្រទះដូចគេ ដូចឯង បានបណ្តាលឲ្យមានអ្នកអត់ការងារជាច្រើនលាននាក់ ជាពិសេសក្រោយផែនការកាត់បន្ថយបុគ្គលិករបស់ក្រុមហ៊ុន។
ក្នុងអត្ថបទស្រាវជ្រាវ គេបានលើកយកឧទាហរណ៍មួយដែលបង្ហាញថា ស្រ្តីដែលចិញ្ចឹមកូនតែម្នាក់ឯងភាគច្រើនមានត្រូវធ្វើការងារពីរ។ ពួកនាងធ្វើការនៅពេលព្រឹក និងថ្ងៃ។ ក្រោយចេញពីធ្វើការ នាងត្រូវត្រឡប់មកផ្ទះធ្វើម្ហូបឲ្យកូន មុននឹងចេញទៅធ្វើការយប់មួយទៀត។
គេគួរដឹងថា ប្រជាជនជប៉ុនកាន់តែច្រើន មានរបៀបរបបរស់នៅបែបលោកខាងលិច ដោយចាកចេញទៅបង្កើតគ្រួសារថ្មី និងមិនរស់នៅជាមួយឪពុកម្តាយ។ ការរស់នៅបែកខ្ញែកគ្នារវាងកូនៗ និងឪពុកម្តាយ ដែលត្រូវគេទុកចោល មិនបានទទួលការយកចិត្តទុកដាក់ពីគ្រួសារ និងរដ្ឋក៏ជាមូលហេតុមួយទៀតនៃភាពក្រីក្រ។
ប្រភពមួយទៀតដែលធ្វើឲ្យមានភាពក្រីក្រ នៅជប៉ុន គឺ ខុសពីប្រទេសអ្នកមានផ្សេងទៀត ជប៉ុនខ្លួនឯងបានអនុវត្តយកពន្ធច្រើនពីគ្រួសារដែលមានជីវភាពមធ្យម។
ជាលទ្ធផល ភាពក្រីក្របានបណ្តាលឲ្យមានការធ្វើអត្តឃាត ការធ្វើបាបលើកុមារ។ ដោយសារតែភាពក្រីក្រនេះ គ្រួសារជប៉ុនរឹតតែមានកូនតិចទៅៗ និងសុខភាពកាន់តែធ្លាក់ដុនដាប។ មនុស្សមួយចំនួនបានអះអាងថា ជាញឹកញយខ្លួនហូបអាហារមួយពេលក្នុងមួយថ្ងៃ។ ប៉ុន្តែទោះជាយ៉ាងណា អ្នកស្រាវជ្រាវបង្ហាញថា ក្នុងសភាពក្រីក្របែបនេះ មានមនុស្សចំនួនតិចប៉ុណ្ណោះសុខចិត្តធ្វើជាអ្នកសុំទាន និងប្រព្រឹត្តបទឧក្រិដ្ឋ។
អ្នកស្រាវជ្រាវបានអំពាវនាវការធ្វើអន្តរាគមន៍ជាបន្ទាន់ពីរដ្ឋាភិបាល។ នាយករដ្ឋមន្រ្តីថ្មីរបស់ជប៉ុន លោកណាអូតូ កានបានសន្យាកាត់បន្ថយបញ្ហាដែលធ្វើឲ្យប្រជាជនជប៉ុនមិនសប្បាយចិត្ត។ ប៉ុន្តែ គេមើលឃើញថា បរាជ័យរបស់គណបក្សរបស់លោកនាយករដ្ឋមន្រ្តីនៅព្រឹទ្ធសភា នឹងមិនអាចឲ្យនាយករដ្ឋមន្រ្តីធ្វើបានតាមការសន្យារបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ