លោកបារ៉ាក់អូបាម៉ា៖« យើងត្រូវប្រើពេលយូរទៀតដើម្បីយកជ័យជំនះលើពួកអាល់កៃដា »
កាលពីថ្ងៃព្រហស្បតិ៍ថ្ងៃទី១៦ធ្នូម្សិលមិញ លោកប្រធានាធិបតី អាមេរិក បានបង្ហាញរបាយការណ៍ប្រចាំឆ្នាំរបស់លោក ស្តីពីយុទ្ធសាស្ត្ររបស់អាមេរិកនៅ អាហ្វហ្កានិស្តង់និងប៉ាគីស្តង់ ដោយបានស្នើសុំឲ្យយោធាអាមេរិកធ្វើការវាយតម្លៃយុទ្ធសាស្ត្ររបស់លោក។ យោងតាមប្រធានាធិបតីអាមេរិក សង្គ្រាមនៅអាហ្វហ្កានិស្តង់ នៅតែជា « បញ្ហាមួយដ៏ពិបាក» តែលោកអូបាម៉ា ក៏ចង់ឃើញដែរ ការរីកចំរើនរបស់កងទ័ពសម្ព័ន្ធមិត្តនៅក្នុងការប្រយុទ្ធប្រឆាំងជាមួយពួកតាលីបង់និងបណ្តាញភេរវនិយមអាល់កៃដា និងបានទាមទារឲ្យប៉ាគីស្តង់បង្កើនការប្រយុទ្ធប្រឆាំងរបស់ខ្លួនទៅលើទីជម្រកសំខាន់ៗរបស់ពួកអ៊ីស្លាមជ្រុលនិយមនៅលើទឹកដីប៉ាគីស្តង់ដែរ ពីព្រោះនៅលើវិស័យនេះ ទីក្រុងអីស្លាម៉ាបាត នៅយឺតយ៉ាវខ្លាំងណាស់។ ក៏ប៉ុន្តែជាបឋម លោកអូបាម៉ា បានសំដែងគារវកិច្ចចំពោះ លោក Richard Holbrooke ដែលបានចូលមរណភាពកលពីដើមសប្តាហ៍នេះដែរ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នុយ ប៊ែរណាដែត
លោក Richard Holbrooke បានទទួលអានិច្ចកម្មកាលពីថ្ងៃចន្ទទី១៣ធ្នូ កន្លងមក ជាបេសកជនពិសេស របស់លោកប្រធានាធិបតីអាមេរិក សំរាប់ អាហ្វហ្កានិស្តង់និងប៉ាគីស្តង់។ លោក បារ៉ាកអូបាម៉ា បានស្វាគមចំពោះ « ការងារដ៏ធំសម្បើមអស្ចារ្យនេះ »ដែលលោក Richard Holbrookeបានបំពេញកន្លងមក។
លោកប្រធានាធិបតីអាមេរិក បានទទួលស្គាល់ដែរថា ការប្រយុទ្ធប្រឆាំងទល់នឹងពួកតាលីបង់និងអាល់កៃដានៅក្នុងអាហ្វហ្កានិស្តង់និងប៉ាគីស្តង់ មានការរីកចំរើនតែ ជាការរីកចំរើនមួយក្នុងលក្ខណៈផុយស្រួយនិងមិនស្ថិតស្ថេរ។
នៅចំពោះមុខបណ្តាអ្នកកាសែត លោកបារ៉ាកអូបាម៉ា បានថ្លែងជាច្រើនដងថា « ការប្រយុទ្ធប្រឆាំង យកជ័យជំនះលើពួកភេរវនិយម អាល់កៃដា នឹងត្រូវប្រើពេលវេលាដ៏យូរថែមទៀត”។ នេះជាការទទួលស្គាល់របស់លោកប្រធានាធិបតីអាមេរិក ដែលបានសន្យា ថាសហរដ្ឋអាមេរិក នឹងចូលរួមយ៉ាងសកម្មក្នុងការប្រយុទ្ធប្រឆាំងទល់នឹងពួកភេរវនិយម ក៏ប៉ុន្តែ លោកអូបាម៉ាបានគូសបញ្ជាក់ដែរថា អាមេរិកនឹងដកយោធារបស់ខ្លួនបន្តិចម្តងៗចេញពីអាហ្វហ្កានិស្តង់ នៅក្នុងអំឡុងពេល៣ឆ្នាំខាងមុខទៀត។
ការដកកងទ័ពដែលនឹងត្រូវចាប់ផ្តើមជាដំបូងនៅខែកក្កដា ២០១១ និងត្រូវបញ្ចប់នៅឆ្នាំ២០១៤ ដូចសេចក្តីព្រមព្រៀងនៅក្នុងជំនួបកំពូលអូតង់ នៅទីក្រុងLisbonne កាលពីខែមុន។ ទន្ទឹមនេះ លោក បារ៉ាក់អូបាម៉ា ធ្វើការដាក់សម្ពាធទៅលើប៉ាគីស្តង់ ដោយតម្រូវឲ្យទីក្រុងអ៊ីស្លាម៉ាបាត ធ្វើការប្រយុទ្ធប្រឆាំងកំចាត់ឲ្យអស់ទីជម្រកសំខាន់ៗរបស់ពួកអ៊ីស្លាមជ្រុលនិយម នៅលើទឹកដីខ្លួន។ នៅទីបញ្ចប់ លោកប្រធានាធិបតីអាមេរិក វាយតម្លៃថា “ ការរីកចំរើនរបស់ប៉ាគីស្តង់នៅក្នុងវិស័យប្រយុទ្ធប្រឆាំងទល់នឹងអំពើភេរវនិយម នៅមិនទាន់បានលឿនរហ័សនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ