អ៊ុងសានស៊ូជី ត្រូវបានអញ្ជើញអោយបំពេញទស្សនកិច្ចនៅប្រទេសកាណាដា
បន្ទាប់ពីត្រូវបានដោះលែងឲ្យមានសេរីភាព កាលពីពាក់កណ្តាលខែ វិច្ឆិកាកន្លងទៅ មេដឹកនាំបក្សប្រឆាំងភូមារូបនេះ បានបន្តប្រឡូកយ៉ាងសកម្ម ក្នុងការទាមទារសេរីភាពឲ្យប្រទេសរបស់ខ្លួន។ ឆាកនយោបាយនៅក្រៅប្រទេស ក៏បើកទ្វាររង់ចាំ អតីតជ័យលាភីរង្វាន់ណូបែលសន្តិភាពរូបនេះផងដែរ។ កាលពីថ្ងៃចន្ទម្សិលមិញ នាយករដ្ឋមន្ត្រី កាណាដា បានអញ្ជើញលោកស្រី ឲ្យមកទទួលជាផ្លូវការ នូវ ឋានៈ “ជាពលរដ្ឋកិត្តិយស របស់ កាណាដា” ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អ៊ុង ច័ន្ទសោភា
« យើងដឹងច្បាស់ណាស់ថា កិច្ចការចំបងដែលលោកស្រីអ៊ុងសានស៊ូជី ត្រូវតែធ្វើជាប្រញាប់នៅពេលនេះ គឺការចរចាជាមួយរបបសឹកភូមា។ រីឯការបំពេញទស្សនកិច្ចនៅក្រៅប្រទេស គឺជារឿងបន្ទាប់។ តែទោះជាយ៉ាងណា យើងសង្ឃឹមថា លោកស្រីនឹងយល់ព្រមមកតាមសំណើរបស់យើង ក្នុងឱកាសដ៏សំខាន់នេះ » នេះជាប្រសាសន៍របស់លោក Stephen Harper នាយករដ្ឋមន្រ្តីកាណាដា ។ លោកបានផ្ញើលិខិតជាផ្លូវការ កាលពីថ្ងៃចន្ទម្សិលមិញ ទៅអោយមេដឹកនាំបក្សប្រឆាំងរូបនេះ ដើម្បីមកទទួលឋានៈជា “ពលរដ្ឋកិត្តិយសរបស់កាណាដា។ ឋានៈដែលបានសំរេចផ្តល់ទៅអោយលោកស្រីតាំងពីឆ្នាំ២០០៧។
កន្លងមក ឋានៈនេះក៏ត្រូវបានផ្តល់ទៅអោយលោក Nelson Mandela អតីតប្រធានាធិបតីអាហ្រ្វិកខាងត្បូង សមេ្តចសង្ឃពុទ្ធសាសនានៅ ទីបេ Dalai Lama និងឥស្សរជនមួយចំនួនផងដែរ។ ការផ្តល់កិត្តិយសទៅអោយ អតីតជ័យលាភីរង្វាន់ណូបែលសន្តិភាពរូបនេះ មិនមែនជាការចៃដន្យទេ។ លោកស្រី ក៏មានម្តាយក្មេកជាជនជាតិកាណាដាផងដែរ។ ហើយប្រជាជនប្រទេសនេះ តែងតែធ្វើការគាំទ្រកិច្ចការនយោបាយរបស់លោកស្រី។
លោក Harper នាយករដ្ឋមន្រ្តីកាណាដាអះអាងថា ប្រទេសរបស់លោកមានការសោកស្តាយយ៉ាងខ្លាំង ចំពោះការឃុំឃាំងរាប់ឆ្នាំទៅលើលោកស្រីពីសំណាក់របបសឹកភូមា។ នេះជាការប្រមាថយ៉ាងធ្ងន់ធ្ងរដល់សិទ្ធិមនុស្ស។ លោកអំពាវនាវអោយមានការចរចាដោយសន្តិវិធីរវាងភាគីទាំងពីរ។
គួររំលឹកដែរថា មេដឹកនាំបក្សប្រឆាំងភូមាដ៏ល្បីល្បាញរូបនេះ ត្រូវបានឃុំខ្លួននៅក្នុងគេហដ្ឋានជាង១៥ឆ្នាំ។ គាត់ត្រូវបានចាត់ទុកជាសត្រូរដ៏មានឥទ្ធិពល របស់រដ្ឋាភិបាលភូមា ដោយសារគាត់ចង់រំដោះប្រទេសពីរបបផ្តាច់ការ។ លោកស្រីដែលបច្ចុប្បន្នមានវ័យ ៦៥ឆ្នាំ ត្រូវបានដោះលែងអោយមានសេរីភាពកាលពីពាក់កណ្តាលខែ វិច្ឆិកាកន្លងទៅ គឺមូយអាទិត្យ ក្រោយពីការបោះឆ្នោតថ្មី។ ការបោះឆ្នោតដែលត្រូវបានរិះគន់ពីសំណាក់សហគមន៍អន្តរជាតិ ដោយសារតែគ្មានយុត្តិធ៌ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ