នាយករដ្ឋមន្ត្រីណាអូតូកានចង់បើកចំហប្រទេសជប៉ុនឲ្យធំទូលាយក្នុងការដោះដូរសេរីអន្តរប៉ាស៊ីហ្វិក
លោកនាយករដ្ឋមន្ត្រីណាអូតូកានបានសន្យានៅថ្ងៃអង្គារនេះថា”នឹង ចង់បើកចំហប្រទេសជប៉ុន”ឲ្យបានធំទូលាយក្នុងការដោះដូរសេរី អន្តរប៉ាស៊ីហ្វិកនៅពេលដែលប្រទេសជប៉ុនចូលជាសមាជិកនៃ”តំបន់ដោះដូរ ពាណិជ្ជកម្មសេរីអន្តរប៉ាស៊ីហ្វិក” ទោះបីជាមានការប្រឆាំងយ៉ាងខ្លាំងក្លាពីសំណាក់កសិករជប៉ុនដែលបារម្ភ ខ្លាចមានការប៉ះពាល់ដល់ផលប្រយោជន៍និងអាយុជីវិតនៃកសិកម្មជប៉ុន ក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
នាឱកាសធ្វើសុន្ទរកថានៅពេលបុណ្យចូលឆ្នាំថ្មី លោកនាយករដ្ឋមន្ត្រីណាអូតូកានបានថ្លែងប្រកាសឲ្យដឹងថា លោកចង់ធ្វើឲ្យឆ្នាំ២០១១ក្លាយជាឆ្នាំទីមួយនៃការបើកចំហប្រទេសជប៉ុនក្នុងការដោះដូរពាណិជ្ជកម្មសេរីអន្តរប៉ាស៊ីហ្វិក។
លោកនាយករដ្ឋមន្ត្រីណាអូតូកានជាអ្នកការពារយ៉ាងមោះមុតក្នុងការបញ្ចូលខ្លួនប្រទេសជប៉ុនទៅក្នុង”តំបន់ដោះដូរពាណិជ្ជកម្មសេរីអន្តរប៉ាស៊ីហ្វិក”ឬជា”ដៃគូអន្តរប៉ាស៊ីហ្វិក”ជាភាសាអង់គ្លេសហៅថាTrans-Pacific Partnership ( TPP )។ ក៏ប៉ុន្តែទាំងនេះបានទទួលការប្រឆាំងយ៉ាងខ្លាំងក្លាពីសំណាក់កសិករជប៉ុនដែលបារម្ភភ័យខ្លាចមានការនាំផលិតផលដែលមានតម្លៃថោកពីបរទេស។
”ដៃគូអន្តរប៉ាស៊ីហ្វិក”ជាភាសាអង់គ្លេសហៅថាTrans-Pacific Partnership ( TPP )បច្ចុប្បន្ននេះមានបួនប្រទេសជាសមាជិកដែលក្នុងនោះមាន ប្រទេសBrunei ប្រទេសChili សិង្ហបុរី និងប្រទេសNouvelle-Zélande។ ហើយនៅមានប្រាំប្រទេសទៀតបានត្រៀមលក្ខណៈជាស្រេចនឹងចូលជាសមាជិកដែលក្នុងនោះមាន សហរដ្ឋអាមេរិក ប្រទេសអូស្ត្រាលី ប្រទេសម៉ាឡេស៊ី ប្រទេសប៉េរូនិងប្រទេសវៀតណាម។
លោកនាយករដ្ឋមន្ត្រីជប៉ុនបានថ្លែងបញ្ជាក់ទៀតថា “យើងត្រូវតែធ្វើឲ្យកសិកម្មជប៉ុនមានសកម្មភាពរស់រវើកឡើងវិញ ហើយនិងជំរុញឲ្យមានការដោះដូរសេរីក្នុងវិស័យពាណិជ្ជកម្ម” ដើម្បីធ្វើឲ្យប្រទេសជប៉ុនមានកំណើនសេដ្ឋកិច្ចខ្លាំងក្លា។
វិធានការដែលរដ្ឋាភិបាលជប៉ុនគ្រោងមានគឺ ផ្តល់ជំនួយហិរញ្ញវត្ថុដើម្បីជំរុញឲ្យយុវជនជប៉ុនមានទំនុកចិត្តនិងបង្កើនមធ្យោបាយផលិតកម្មក្នុងវិស័យកសិកម្ម។ ដោយហេតុថា បច្ចុប្បន្ននេះ អាយុមធ្យមនៃកសិករជប៉ុនមានដល់ទៅ៦៥ឆ្នាំ ចំណែកឯអាយុមធ្យមនៃប្រជាជនជប៉ុនជាទូទៅវិញមានត្រឹមតែ៤៥ឆ្នាំប៉ុណ្ណោះ។ រីឯប្រាក់ចំណូលរបស់កសិករជប៉ុនវិញបានបាត់បង់អស់៥០%នារយៈកាល២០ឆ្នាំចុងក្រោយនេះ ហើយសភាពគ្រប់គ្រាន់ក្នុងវិស័យចំណីអាហាររបស់ប្រទេសជប៉ុនដែលធ្លាប់មាន៧៣%នៅឆ្នាំ១៩៦៥បានធ្លាក់មកនៅត្រឹម៤០%ប៉ុណ្ណោះបច្ចុប្បន្ននេះ។
ជាយូរណាស់មកហើយ ប្រទេសជប៉ុនតែងមាននយោបាយការពារវិស័យកសិកម្មជាពិសេសវិស័យដាំស្រូវដែលបច្ចុប្បន្ននេះបានធ្វើឲ្យរដ្ឋាភិបាលជប៉ុនចំណាយអស់ប្រាក់យ៉ាងច្រើនក្នុងការទប់ទល់នឹងការនាំអង្ករចូលពីសហរដ្ឋអាមេរិក អូស្ត្រាលី ឬប្រទេសវៀតណាមដែលអង្ករមានតម្លៃសែនថោកបើប្រៀបផ្ទឹមទៅនឹងអង្ករដែលផលិតដោយកសិករជប៉ុន។
ដើម្បីធ្វើការទប់ទល់នឹងការនាំអង្ករចូលពីសហរដ្ឋអាមេរិក អូស្ត្រាលី ឬប្រទេសវៀតណាម ប្រទេសជប៉ុនបានដាក់ពន្ធគយដ៏ខ្ពស់ដែលមានអត្រាដល់ទៅជិត៨០០% ហើយ២៥០%សម្រាប់ស្រូវសាលីដែលនាំចូលពីបរទេស។ ដូច្នេះបើប្រទេសជប៉ុនចូលជាសមាជិកនៃ”តំបន់ដោះដូរពាណិជ្ជកម្មសេរីអន្តរប៉ាស៊ីហ្វិក” នោះពន្ធគយដែលមានអត្រាដ៏សែនខ្ពស់ទាំងនោះនឹងត្រូវលុបចោល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ