ពួកអ្នកប្រឆាំងរដ្ឋអំណាចចិន អំពាវនាវតាមបណ្តាញអិនធ័រណេតគាំទ្របដិវត្តន៍ផ្កាម្លិះ
សាររាប់មិនអស់ ត្រូវបានផ្ញើតាមបណ្តាញអិនធ័រណេត នៅក្នុងប្រទេសចិន ដោយអំពាវនាវឲ្យធ្វើបាតុកម្មនៅថ្ងៃអាទិត្យនេះ។ បាតុកម្មនឹងត្រូវធ្វើឡើងនៅតាមទីក្រុងចំនួន ១៣ មានជាអាទិ៍នៅប៉េកាំង សៀងហៃ កង់តុង និងតាមទីក្រុងធំៗចំនួន១០ ផ្សេងទៀត ដោយយកគំរូតាមបដិវត្តន៍ផ្កាម្លិះនៅទុយនីស៊ី។ ប៉ុន្តែ មិនទាន់ទាំងចាប់ផ្តើមធ្វើអ្វីផង ក្រុមមេធាវីនិងសកម្មជនការពារសិទ្ធិមនុស្ស ប្រមាណជា ១៥នាក់ត្រូវបាត់ខ្លួន ចាប់តាំងពីថ្ងៃសៅរ៍ម្សិលមិញមក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នុយ ប៊ែរណាដែត
នារយៈពេលប៉ុន្មានថ្ងៃចុងក្រោយនេះ សកម្មជនការពារសិទ្ធិមនុស្សចិនជាច្រើនរូប ត្រូវបាត់ខ្លួន ដោយហេតុនគរបាលចាប់ឃុំឃាំងខ្លួនចាប់តាំងពីថ្ងៃសៅរ៍ម្សិលមិញ។ អ្នកខ្លះទៀត បានទទួលការព្រមាន ហាមប្រាមមិនឲ្យចេញពីលំនៅឋាន ហើយទូរស័ព្ទដៃរបស់ពួកគេត្រូវបានបិទខ្ទប់មិនអាចប្រើប្រាស់បាន។ ការចាប់ខ្លួនសកម្មជនការពារសិទ្ធិមនុស្សទាំងនេះ បានប្រព្រឹត្តទៅនៅពេល ដែលសារអំពាវនាវ ធ្វើបាតុកម្មគាំទ្របដិវត្តន៍ផ្កាម្លិះត្រូវបាន ផ្សព្វផ្សាយ កាន់តែច្រើនឡើងៗតាមប្រព័ន្ធអិនធ័រណេត។
ម្យ៉ាងទៀត ការហៅទូរស័ព្ទទៅរកពួកសកម្មជនការពារសិទ្ធិមនុស្សជាច្រើនរូប ដូចជាលោក Teng Biao, Xu Zhiyong និង Jiang Tianyong ជាដើម នៅតែស្ងាត់ឈឹង ពុំទាន់មានការឆ្លើយតបមកវិញទេរហូតមកដល់ថ្ងៃអាទិត្យនេះ។ យោងតាមក្រុមគ្រួសាររបស់គេ សកម្មជនទាំងនោះ ត្រូវបាននគរបាលចិនឃុំឃាំងខ្លួនទុកជាបណ្តោះអាសន្ន។
សារនៅតាមអិនធ័រណេតមានន័យថា “យើងត្រូវជួយលើកទឹកចិត្តដល់ពួកពលករឥតការងារធ្វើនិងពួកជនរងគ្រោះដែលត្រូវគេបណ្តេញពីការងារទាំងបង្ខំ ឲ្យចូលរួមធ្វើបាតុកម្មយ៉ាងគគ្រឹកគគ្រេង និងស្រែកជាពាក្យស្លោកទាមទារសិទ្ធិសេរីភាព លទ្ធិប្រជាធិបតេយ្យនិង ទាមទារឲ្យធ្វើកំណែទម្រង់នយោបាយ ដើម្បីបិទបញ្ចប់ការអនុវត្តនយោបាយដែលមានគណបក្សតែមួយគត់នៅក្នុងប្រទេស។
រាល់សារដែលមានពាក្យថា”បដិវត្តន៍ផ្កាម្លិះ ត្រូវបានអាជ្ញាធរទីក្រុងប៉េកាំងបិទខ្ទប់ទាំងអស់”។ ជាការឥតសង្ស័យឡើយ សារអំពាវនាវទាំងនេះ ជាគំនិតផ្តួចផ្តើមរបស់ពួកអ្នកប្រឆាំងដែលកំពុងភៀសខ្លួនរស់នៅក្រៅប្រទេស ។
គួររំលឹកថា គ្រាន់តែមាន ការងើបបះបោរនៅប្រទេសទុយនីស៊ីដែលគេដាក់ឈ្មោះថា បដិវត្តន៍ផ្កាម្លិះភ្លាម ទីក្រុងប៉េកាំង ចាប់ផ្តើមរឹតត្បិតខ្លាំង មិនឲ្យសារព័ត៌មានផ្សព្វផ្សាយ ព្រឹត្តិការណ៍ដែលទាក់ទងនឹងការ ងើបបះបោររបស់ពលរដ្ឋទុយនីស៊ី ភាពឥតការងារធ្វើ ការឡើងថ្លៃទំនិញ សព្វសារពើ និង ការទាមទារលទ្ធិប្រជាធិបតេយ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ