អង្គការអន្តរជាតិស្វាគមន៍ការដាក់សេចក្តីសម្រេចស្តីពីការសង់ទំនប់សាយ៉ាបូរីទៅថ្នាក់រដ្ឋមន្ត្រី
ក្រុមអ្នកជំនាញនៃប្រទេសមេគង្គក្រោមទាំងបួនបានដាក់សេចក្តីសម្រេចចិត្តលើការសាងសង់វារីអគ្គីសនីទៅថ្នាក់រដ្ឋមន្ត្រី។ ក្រុមអង្គការអន្តរជាតិនានាដែលធ្វើការលើការងារទន្លេបានអបអរចំពោះសេចក្តីសម្រេចរបស់ក្រុមជំនាញយ៉ាងនេះ ដោយចាត់ទុកថា នេះគឺជាការពន្យាពេលមួយ ខណៈពេលដែលក្រុមអង្គការអន្តរជាតិទាំងនេះយល់ឃើញថា ទំនប់នេះនឹងបង្កអោយមានការប៉ះពាល់យ៉ាងខ្លាំងដល់ជីវភាពរបស់មនុស្ស និងបរិស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច
អង្គការWWFអន្តរជាតិបានធ្វើសេចក្តីប្រកាសព័ត៌មានបន្ទាន់មួយដោយសរសេរថា ការដាក់សេចក្តីសម្រេចចិត្តលើការសាងសង់ទំនប់វារីអគី្គសនីសាយ៉ាបូរីនៅប្រទេសឡាវទៅថ្នាក់រដ្ឋមន្ត្រីនោះ គឺជាសញ្ញារបស់ក្រុមអ្នកជំនាញដែលទទួលស្គាល់អំពីផលប៉ះពាល់អវិជ្ជមានដែលអាចកើតមានពីទំនប់ដ៏ធំនេះ។ សេចក្តីប្រកាសព័ត៌មានរបស់WWFដដែលបានបន្តថា ការសម្រេចចិត្តយ៉ាងដូច្នេះ ត្រូវបានធ្វើឡើងដោយផ្អែកលើភស្តុតាងជាច្រើន ដែលគេបានដាក់ជូនគណៈកម្មការ ហើយដែលបង្ហាញពីហានិភ័យនានាចំពោះជីវចម្រុះ ជលផល និងការចិញ្ចឹមជីវិតរបស់ប្រជាជនរាប់លាននាក់ដែលរស់នៅក្នុងតំបន់នៃអាងទន្លេមេគង្គ។
អង្គការទន្លេអន្តរជាតិក៏បានធ្វើសេចក្តីប្រកាសព័ត៌មានមួយផងដែរដើម្បីបញ្ជាក់ថាទំនប់ដ៏ធំរបស់ប្រទេសឡាវមួយនេះនឹងបង្កផលប៉ះពាល់យ៉ាងច្រើន។ សេចក្តីប្រកាសព័ត៌មានរបស់អង្គការទន្លេអន្តរជាតិដែលចេញផ្សាយកាលពីថ្ងៃទី១៩មេសាបានសរសេរថា ទំនប់សាយ៉ាបូរី ប្រសិនជាត្រូវបានសាងសង់មែននោះ នឹងត្រូវបណ្តេញប្រជាពលរដ្ឋជាង២១០០នាក់ពីលំនៅដ្ឋានពួកគេ និងបង្កផលប៉ះពាល់ដោយផ្ទាល់ចំពោះប្រជាជនជាង២សែននាក់ និងគំរាមកំហែងដល់ពូជត្រីប្រមាណ៤១ប្រភេទ។ ជាសង្ខេប បើយោងតាមសេចក្តីប្រកាសព័ត៌មាននេះ ផលប៉ះពាល់ទាំងអស់នឹងពាក់ព័ន្ធដល់ជីវភាព និងសន្តិសុខស្បៀងរបស់ប្រជាជនរាប់លាននាក់នៅក្នុងតំបន់។
លោកឈិត សំអាត នាយកប្រតិបត្តិរបស់អង្គការវេទិការនៃអង្គការក្រៅរដ្ឋាភិបាលស្តីពីកម្ពុជា បានអត្ថាធិប្បាយថា ការសម្រេចរបស់ក្រុមជំនាញនៅពេលនេះ គឺជាការទទួលស្គាល់មួយចំពោះក្តីព្រួយបារម្ភទៅលើផលប៉ះពាល់នៃប្រព័ន្ធអេកូឡូស៊ីរបស់ទន្លេ និងជីវិតរបស់មនុស្សរាប់លាននាក់នៅក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ