ចិនចង់ធ្វើជារៀមច្បងគំរូសម្រាប់កូរ៉េខាងជើង
ចុះផ្សាយនៅថ្ងៃ៖
ស្តាប់ - ០៦:០៣
ថ្ងៃនេះហ្សង់-ហ្វ្រង់ស័រ តាន់ សូមបន្តពិនិត្យមើលទៅលើស្ថានភាពភូមិសាស្រ្តនយោបាយរបស់ប្រទេសចិនត ទៅទៀត ដោយសូមពិនិត្យមើលទៅលើទំនាក់ទំនងរវាងចិននិងកូរ៉េទាំងពីរ។
តាំងពីឆ្នាំ២០០២មក ឧបទ្វីបកូរ៉េជាតំបន់ប្រកបដោយអស្ថិរភាព ពីព្រោះសហគមន៍អន្តរជាតិសង្ស័យថាកូរ៉េខាងជើងលួចផលិតគ្រាប់បែក បរមាណូ។ ក្តីសង្ស័យបានក្លាយជាការពិត នៅខែតុលាឆ្នាំ២០០៦ នាពេលដែលកូរ៉េខាងជើងបានពិសោធសាកល្បងអាវុធនុយក្លេអ៊ែរជាលើកទី មួយបង្អស់។
ព្រឹត្តិការណ៍ដ៏គួរឲ្យតក់ស្លុតនេះបានផ្តើមធ្វើឲ្យទំនាក់ទំនងរវាងចិននិងកូរ៉េខាងជើងស្គាល់ភាពរអាក់រអួល។ ចិនរឹងរឹតតែអាម៉ាស់មុខ នៅពេលដែលកូរ៉េខាងជើងបានពិសោធអាវុធនុយក្លេអ៊ែរម្តងទៀត នៅឆ្នាំ២០០៩ រួចហើយបានដើរចេញពីតុចរចាប្រាំមួយភាគី រវាងសហរដ្ឋអាមេរិក ចិន រុស្ស៊ី ជប៉ុននិងកូរ៉េទាំងពីរនៅខែមេសាឆ្នាំ២០០៩។ មូលហេតុ គឺមកពីប៉ុន្មានឆ្នាំចុងក្រោយនេះ ចិនជាអ្នកចេញមុខរៀបចំកិច្ចចរចាប្រាំមួយភាគី ដើម្បីដោះស្រាយវិបត្តិនុយក្លេអ៊ែរកូរ៉េខាងជើង។ និយាយបែបផ្សេង ចិនបានចេញមុខធានាថា ខ្លួនអាចបញ្ចុះបញ្ចូលកូរ៉េខាងជើងឲ្យលះបង់ចោលបានមហិច្ឆតានុយក្លេអ៊ែរ។ នៅក្នុងន័យនេះ ការសាកល្បងអាវុធនុយក្លេអ៊ែររបស់កូរ៉េខាងជើងនិងការដើរចេញពីតុចរចារបស់ប្រទេសនេះ ស្តែងឲ្យឃើញនូវបរាជ័យនៃការទូតចិននិងធ្វើឲ្យចិនបាក់មុខ។
តាមពិត ថ្នាក់ដឹកនាំចិនមិនចង់ឲ្យកូរ៉េខាងជើងមានអាវុធនុយក្លេអ៊ែរទេ ពីព្រោះប្រការនេះនឹងអាចញ៉ាំងឲ្យជប៉ុន កូរ៉េខាងត្បូង ឬក៏តៃវ៉ាន់ ចង់បានអាវុធនុយក្លេអ៊ែរដែរ ឬក៏នឹងអាចញ៉ាំងឲ្យសហរដ្ឋអាមេរិកចូលមកលូកដៃកាន់តែជ្រៅក្នុងបញ្ហាឧបទ្វីបកូរ៉េ។ រីឯអគ្គមគ្គទេសក៍កូរ៉េខាងជើង គីម យ៉ុងអ៊ីល វិញ យល់ឃើញផ្សេង យល់ឃើញថា ប្រទេសខ្លួនចាំបាច់ត្រូវតែក្លាយជាមហាអំណាចនុយក្លេអ៊ែរ ដើម្បីកុំឲ្យសត្រូវ ជាពិសេសសហរដ្ឋ អាមេរិកមករំលំរបបកុម្មុយនិស្តរបស់ខ្លួនបាន។
ទន្ទឹមនេះ ចិនក៏ឈឺក្បាលនិងក្រពុលមុខខ្លាំងដែរ ដោយហេតុតែកូរ៉េខាងជើងចេះតែបន្តរករឿងកូរ៉េខាងត្បូង ជាអាទិ៍តាមរយៈការបាញ់ពន្លិចនាវាចម្បាំងមួយគ្រឿងរបស់កូរ៉េខាងត្បូងនៅខែមីនាឆ្នាំ២០១០។ កាលនោះ ទោះជាមានការប្រកែកដោះសាពីខាងទីក្រុងព្យុងយ៉ាង យ៉ាងណាក៏ដោយ ក៏ការស៊ើបអង្កេតបង្ហាញថា នាវាដែលលិចនិងដែលបណ្តាលឲ្យមានស្លាប់នាវិកកូរ៉េខាងត្បូង៤៦នាក់ត្រូវបានបាញ់កំទេចដោយនាវាមុជទឹករបស់កូរ៉េខាងជើងមែន។
មិនតែប៉ុណ្ណោះ ដោយហេតុតែមានការឈ្លានពានពីសំណាក់កូរ៉េខាងជើងទៅលើកូរ៉េខាងត្បូងអ៊ីចឹងហើយ បានជាសហរដ្ឋអាមេរិកនិងកូរ៉េខាងត្បូងបានធ្វើសមយុទ្ធរួមគ្នា នៅម្តុំសមុទ្រលឿង។ សមយុទ្ធទាំងនេះដែលបានប្រព្រឹត្តទៅ នៅចម្ងាយប្រមាណតែ៥០០គ.មពីទីក្រុងប៉េកាំងតែប៉ុណ្ណោះ មិនអាចធ្វើឲ្យចិនសប្បាយចិត្តទេ។
ចង់ឬមិនចង់ របបនយោបាយកូរ៉េខាងជើងគ្មានជម្រើសអ្វីផ្សេងក្រៅពីបន្តពឹងពាក់ប្រទេសចិនតទៅទៀត។ ពឹងពាក់ចិន ដើម្បីបន្តទប់ទល់នឹងអរិភាពពីសំណាក់បស្ចិមលោក ជាពិសេសសហរដ្ឋអាមេរិក។ ពឹងពាក់ចិន ដើម្បីទ្រទ្រង់សេដ្ឋកិច្ចនៃប្រទេស ពីព្រោះកូរ៉េខាងជើងត្រូវការជំនួយថវិកា ស្បៀងអាហារនិងថាមពលពីប្រទេសចិន។ ពឹងពាក់ចិន ពីព្រោះតទៅថ្ងៃមុខ កូរ៉េខាងជើងនឹងច្បាស់ជាជ្រើសយកគំរូអភិវឌ្ឍន៍របស់ចិន នោះគឺបើកចំហសេរីភាពសេដ្ឋកិច្ច ផ្ទុយទៅវិញបំបិទសិទ្ធិនយោបាយនិងបន្តឲ្យមានគណបក្សតែមួយ គឺបក្សកុម្មុយនិស្ត។
តាំងពីឆ្នាំ២០០៣មក ចិនបាននិងកំពុងបន្តបង្កើនទំនាក់ទំនងសេដ្ឋកិច្ចនិងពាណិជ្ជកម្មជាមួយកូរ៉េខាងជើង។ ប្រទេសជិតខាងទាំងពីរបានចុះហត្ថលេខាទទួលកិច្ចសន្យាសេដ្ឋកិច្ចមួយចំនួន នាឱកាសទស្សនកិច្ចជាបន្តបន្ទាប់របស់ប្រធានាធិបតីចិន ហ៊ូ ជិនតៅ និងរបស់នាយករដ្ឋមន្ត្រីវេន យ៉ាបៅ នៅកូរ៉េខាងជើងតាំងពីឆ្នាំ២០០៦មក។ ទន្ទឹមនេះ ចិនបន្តសាងសង់ឲ្យកូរ៉េខាងជើងផ្លូវថ្នល់និងផ្លូវដែក ជាពិសេសនៅតាមតំបន់បណ្តោយព្រំដែន។
យ៉ាងណាក៏ដោយ នៅក្នុងវិបត្តិកូរ៉េខាងជើង ចិនក្រពុលមុខកាន់តែខ្លាំង ពីព្រោះ ត្រូវបន្តដើរតួនាទីជាប្រទេសមិត្តរបស់ទីក្រុងព្យុងយ៉ាងផង និងត្រូវដើរតួនាទីជាអាជ្ញាកណ្តាលផង។
ការបន្តធ្វើជាមិត្តរបស់កូរ៉េខាងជើងជាការមួយចាំបាច់ សម្រាប់ថ្នាក់ដឹកនាំចិន។ ម្យ៉ាងគឺមកពីមូលហេតុប្រវត្តិសាស្រ្ត ដែលចងយ៉ាងជាប់របបកុម្មុយនិស្តប៉េកាំងនិងរបបកុម្មុយនិស្តព្យុងយ៉ាង។ ម្យ៉ាងទៀត គឺមកពីចិនដែលមានព្រំដែនជាប់ជាមួយកូរ៉េខាងជើង យល់ដឹងថា បើសិនជារបបព្យុងយ៉ាងមានបញ្ហា ដោយហេតុតែវិបត្តិសេដ្ឋកិច្ចឬក៏អស្ថិរភាពនយោបាយធ្ងន់ធ្ងរ ប្រជាជនកូរ៉េខាងជើងរាប់លាននាក់នឹងច្បាស់ជាភៀសខ្លួនចូលមកក្នុងទឹកដីប្រទេសចិនមិនខានឡើយ។ អ៊ីចឹងហើយបានជា ថ្នាក់ដឹកនាំចិនត្រូវបង្ខំចិត្តបន្តផ្តល់ជំនួយដល់កូរ៉េខាងជើង និងបន្តការពារថ្នាក់ដឹកនាំទីក្រុងព្យុងយ៉ាងតទៅទៀត។ ទន្ទឹមនេះ ចិនដែលកំពុងក្លាយជាមហាអំណាចពិភពលោក ក៏ត្រូវតែមានស្មារតីទទួលខុសត្រូវខ្ពស់ដែរ មិនអាចចេះតែអង្គុយការពារកូរ៉េខាងជើងអ៊ីចឹងទៅកើតទេ។
ចិនចង់ឃើញនិងចង់ឲ្យសហគមន៍អន្តរជាតិរាប់អានកូរ៉េខាងជើង។ ក៏ប៉ុន្តែ ឥរិយាបថវិជ្ជមានឬអវិជ្ជមានរបស់ពិភពលោក ក៏អាស្រ័យទៅលើមារយាទរបស់ថ្នាក់ដឹកនាំកូរ៉េខាងជើងដែរ។ ឧទាហរណ៍ចិនក៏ជាកុម្មុយនិស្ត វៀតណាមក៏ជាកុម្មុយនិស្ត ហើយកូរ៉េខាងជើងក៏ជាកុម្មុយនិស្តដូចគ្នា តែហេតុអ្វីបានជាសហគមន៍អន្តរជាតិរាប់រកចិននិងវៀតណាម តែបែរខ្នងដាក់កូរ៉េខាងជើង?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ