អត្រាអតិផរណាដ៏ខ្ពស់ពុំដែលកើតមាននៅប្រទេសចិននារយៈពេលបីឆ្នាំចុងក្រោយនេះ
សម្រាប់ខែកក្កដាឆ្នាំ២០១១កន្លងទៅនេះ អត្រាអតិផរណាបានស្ទុះកើនឡើងដល់កម្រិតមួយដ៏ខ្ពស់ពុំដែលកើតមាននៅប្រទេសចិននារយៈពេលបីឆ្នាំចុងក្រោយនេះ ពោលគឺមានដល់ទៅ៦,៥%ក្នុង១ឆ្នាំ។ នេះជាការប្រកាសឲ្យដឹងនៅថ្ងៃអង្គារនេះដោយការិយាល័យជាតិខាងស្ថិតិ។
ចុះផ្សាយនៅថ្ងៃ៖
ស្តាប់ - ០២:២១
ចាប់តាំងពីខែមិថុនាឆ្នាំ២០០៨មក គេពុំដែលឃើញសោះឡើយអត្រាអតិផរណាដ៏សែនខ្ពស់បែបនេះនៅប្រទេសចិន។ ក្រោយពីបានប្រកាសឲ្យដឹងនៅខែមិថុនាឆ្នាំ២០១១ថាទំនិញបានឡើងថ្លៃប្រមាណ៦,៤% រដ្ឋាភិបាលចិនដែលបានប្រកាសកំណត់ពុំឲ្យមានអត្រាអតិផរណាលើសពី៤%ក្នុង១ឆ្នាំ ស្រាប់តែនៅពេលនេះ ការិយាល័យជាតិខាងស្ថិតិបានប្រកាសថា ទំនិញបានឡើងថ្លៃប្រមាណ៦,៥%ក្នុង១ឆ្នាំសម្រាប់ខែកក្កដាឆ្នាំ២០១១កន្លងទៅ។ តួលេខទំនិញឡើងថ្លៃសម្រាប់ខែកក្កដាឆ្នាំ២០១១នេះ ពិតជាបណ្តាលឲ្យគេបារម្ភយ៉ាងខ្លាំងដល់ហានិភ័យសង្គមនិងនយោបាយដែលអាចកើតមាន។ ដោយហេតុថា ទំនិញឡើងថ្លៃខ្លាំងធ្វើឲ្យប៉ះពាល់ដល់ជីវភាពរស់នៅរបស់ប្រជាជនចិនក្រីក្រ ហើយទាំងនេះក្នុងខណៈពេលដែលគម្លាតរវាងអ្នកមាននិងអ្នកក្រចេះតែឃ្លាតពីគ្នាកាន់តែឆ្ងាយទៅៗនៅក្នុងសង្គមចិនថ្មី។
តួលេខអត្រាអតិផរណាដ៏សែនខ្ពស់នេះក៏បានផងទៀតធ្វើឲ្យអ្នកដឹកនាំចិនរឹតតែបារម្ភកាន់តែខ្លាំងឡើងៗ នៅចំពោះមុខហានិភ័យអស្ថិរភាពនៃប្រទេសមហាអំណាចសេដ្ឋកិច្ចទីពីរពិភពលោក ក្នុងខណៈពេលដែលពិភពលោកកំពុងតែប្រឈមមុខទល់នឹងខ្យល់ព្យុះសង្ឃរាបោកបក់ទៅលើទីផ្សារហិរញ្ញវត្ថុ ក្រោយពីមានការបញ្ចុះចំណាត់ថ្នាក់ពី “AAA” របស់សហរដ្ឋអាមេរិកដោយទីភ្នាក់ងារវិភាគហានិភ័យប្រាក់បំណុលStandard and Poor’s ហើយនិងបញ្ហាប្រាក់បំណុលដ៏ច្រើនមហិមារបស់ប្រទេសអឺរ៉ុបសំខាន់ៗ។
បញ្ហាម្ហូបអាហារឡើងថ្លៃដល់ទៅ១៤,៨%នៅខែកក្កដាឆ្នាំ២០១១បានធ្វើឲ្យប៉ះពាល់យ៉ាងខ្លាំងដល់ស្រទាប់វណ្ណៈប្រជាជនចិនក្រីក្រដែលត្រូវចំណាយដល់ទៅ១/៣នៃថវិការបស់ខ្លួនសម្រាប់ទិញម្ហូបអាហារបរិភោគ។ នេះបើយោងតាមការិយាល័យជាតិខាងស្ថិតិ។
គួរកត់សម្គាល់ថា នារយៈពេលប៉ុន្មានខែចុងក្រោយនេះ មានចលនាជាច្រើនប្រឆាំងនឹងទំនិញឡើងថ្លៃនៅប្រទេសចិន មានជាអាទិ៍អ្នកបើកបរតាក់ស៊ីនិងអ្នកបើកបររថយន្តដឹកទំនិញរាប់ពាន់រាប់ម៉ឺននាក់បាននាំគ្នាសម្ដែងការប្រឆាំងនឹងតម្លៃប្រេងសាំងឡើងថ្លៃ។
នៅទីបំផុត លោកនាយករដ្ឋមន្ត្រីចិនWen Jiabao បានសម្រេចប្រកាសនៅខែមិថុនាកន្លងទៅថា រដ្ឋាភិបាលចិននឹងខិតខំធ្វើយ៉ាងណាពុំឲ្យមានអត្រាអតិផរណាលើសពី៥%ឡើយក្នុង១ឆ្នាំ។ ប៉ុន្តែ នៅពេលនេះគេហាក់ដូចជាគ្មានបានឃើញផ្លែផ្កានៃវិធានការរបស់រដ្ឋាភិបាលសោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ